निर्वाचन विशेष

पूर्वसहकर्मीबाटै पटक-पटक किन घेरिन्छन् महन्थ ठाकुर ?

नवीन झा सोमबार, असोज ३१, २०७९ ०६:२२

काठमाडौं- लोकतान्त्रिक समाजवादी पार्टी, नेपालका अध्यक्ष महन्थ ठाकुर महोत्तरी- ३ बाट प्रतिनिधि सभामा उम्मेदवार बनेका छन्। २०७४ को निर्वाचनमा पनि उनी यही क्षेत्रबाट निर्वाचित भएका थिए।

तराई-मधेशमा अग्ला कदका नेताको रुपमा परिचित ठाकुरले यो पटक आफ्नै दुई पूर्व सहकर्मीको चुनौती खेपिरहेका छन्।

२०६४ मा नेपाली कांग्रेसबाट बाहिरिएर तराई-मधेश लोकतान्त्रिक पार्टी गठन गर्दा ठाकुरका प्रमुख सहयोगी थिए बृषेशचन्द्र लाल। लाल पनि आफूले लामो समय राजनीति गरेको पार्टी नेपाली कांग्रेस परित्याग गर्दै ठाकुरसँग मधेशको राजनीतिमा होमिएका थिए।

एक वर्ष अगाडिसम्म पनि ठाकुरको प्रमुख सहयोगीकै रुपमा थिए लाल। तर आगामी मंसिर ४ मा हुने निर्वाचनमा उनै लाल ठाकुरको प्रतिस्पर्धी भएर मैदानमा खडा भएका छन्। ठाकुरकै क्षेत्र महोत्तरी- ३ मा लाल पनि प्रतिनिधि सभाका उम्मेदवार बनेका छन्।

एक वर्षअघि ठाकुरसँग असन्तुष्ट हुँदै तमलोपा ब्युँताएर अध्यक्ष बनेका लाल भन्छन्, ‘ठाकुरजीसँगको मित्रता मुद्दाका लागि थियो। उहाँहरुले मुद्दा नै विर्सजन गरेपछि मित्रता पनि रहेन।’

डेढ वर्षअघि ठाकुर नेतृत्वको लोसपा एमाले अध्यक्ष केपी ओली नेतृत्वको सरकारमा सहभागी भएपछि आफू उहाँसँग टाढिएको लालले नेपाल लाइभलाई बताए।

‘पछिल्लो समयमा मधेशी शीर्ष नेताहरुको गतिविधिका कारण मधेशका मुद्दामा गम्भीर असर पुगेको छ,’ लालले भने, ‘मुद्दामाथि नै खेलवाड हुन थाले म आफ्नो बाटो लागेको हुँ।’ लाल कुनैबेला ठाकुरलाई निकै सम्मान गर्थे।

लाल मात्रै होइन, कांग्रेसमा रहँदा आफूसँगै राजनीति गरेका जसपा नेता हरिनारायण यादवदेखि स्वतन्त्र उम्मेदवार रामआधार कापडसम्मले महोत्तरी-३ ठाकुरलाई चुनौती दिएका छन्।

महोतरी- ३ को प्रदेश सभा 'क' बाट उम्मेदवारी दिएका दिपेन्द्र झा पनि विगतमा ठाकुरको निकट रहेर काम गरेका व्यक्ति हुन्।

२०७४ को निर्वाचनमा ठाकुर नेतृत्वकै तत्कालीन राजपाबाट समानुपातिक सूचीमा समेत झाको नाम राखिएको थियो। तर उनी समानुपातिक तर्फबाट संसद बन्न नपाएपछि उपेन्द्र यादवको तत्कालीन संघीय समाजवादीतिर लागेर मधेश प्रदेशमा न्यायाधिवक्ता बनेका थिए।

ठाकुरसँग महोत्तरी- ३ मा यो पटक प्रतिस्पर्धा गरिरहेका अधिकांश अनुहार विगतमा ठाकुरसँग नजिक रहेर काम गरेका नेताहरु नै छन्। जानकारहरु यसलाई ठाकुरमाथि आफ्नैबाट आइलागेको चुनौतीको रुपमा व्याख्या गर्छन्।

नेपाली कांग्रेसको लामो राजनीति गरेका ठाकुर २०४८ देखि नै लागातार निर्वाचन लड्ने नेतामा पर्छन्। २०४८, २०५१ र २०५६ मा सर्लाहीबाट प्रतिनिधि सभामा निर्वाचित भएका ठाकुर २०६४ र २०७० को संविधान सभा निर्वाचनमा भने पराजित भए।

संयोग कस्तो भने, २०६४ र २०७० को निर्वाचनमा पनि ठाकुर आफ्नै पूर्व सहयोगीबाटै पराजित भएका थिए। २०७० मा उनी कांग्रेसका अमरेश सिंहसँग परिजित भए। सिंह पनि कुनै बेला ठाकुरको सहयोगी भूमिकामा थिए।

२०६४ मा पनि सिंहले उम्मेदवारी दिएका थिए। तर तत्कालीन मधेशी जनअधिकार फोरम नेपालका शिवपुजन रायसँग पराजित भए।

आफ्नै पूर्वसहकर्मीबाट घेरिने ठाकुरको नियति जस्तै देखिन्छ। मधेशका नागरिक अगुवा भोगेन्द्र झा महन्थ ठाकुर स्वयंको व्यक्तिगत समस्याका कारण यस्तो परिस्थिति देखिएको बताउँछन्।

मधेश प्रदेशका नीति आयोगका अध्यक्ष समेत रहेका झा ठाकुर सधैं मान्छेको क्षमता हेरेर भूमिका दिन चुकेको दावी गर्छन्। ‘मधेशमा उहाँहरुप्रति एउटा सम्मान छ,’ झाले नेपाल लाइभसँग भने, ‘तर यहाँको व्यवस्थापन क्षमताका कारण उहँले त्यसलाई सदुपयोग गरेको देखिएन।’

ठाकुरले यस पटक सत्ता गठबन्धनको साझा उम्मेदवारको रुपमा मनोनयन दर्ता गराएका छन्। २०७४ मा उनी संघीय समाजवादी र राजपा गठबन्धनको उम्मेदवार थिए।

२० हजारभन्दा बढी मतान्तरले अघिल्लो पटक निर्वाचन जितेका ठाकुरलाई यो पटक आफ्नै पूर्व सहकर्मीहरुबाट घेरिएपछि चुनौती थपिएको छ। यद्यपि, वैशाखमा सम्पन्न स्थानीय तहको निर्वाचन परिणाम अनुसार गठबन्धनको मत बलियो देखिन्छ। तर नेपाली कांग्रेसका स्थानीय नेता-कार्यकर्ता ठाकुरको पक्षमा अघिल्लो पटक जस्तो गरी यो पटक खुलेर लागेको देखिँदैन।