फाइल तस्बिर
वीरगञ्ज– नेपाल सरकारका लागि सबैभन्दा बढी राजस्व संकलन गर्ने पर्साको वीरगञ्जस्थित भन्सार कार्यालयले चालु आर्थिक वर्ष ०७९/०८० को सुरुदेखि नै लक्ष्यअनुसार राजस्व संकलन गर्न असफल भएको छ।
कार्यालयका अनुसार चालु आवको साउन महिनाका लागि दिइएको लक्ष्यको ८५ प्रतिशत र भदौ महिनाका लागि दिइएको लक्ष्यको ७३ प्रतिशत मात्र राजस्व संकलन भएको छ।
नेपालीको महान चाड दशैं पर्व नजिकिँदै जाँदा अघिल्ला वर्षको तुलनामा पर्साको वीरगञ्ज नाका भएर नेपाल भित्रिने सामग्रीमा यस वर्ष निकै कमि आएको छ। चालु आवको पहिलो दुई महिनामा दशैंलगायतका अन्य चाड पर्व लक्षित विभिन्न खाद्यान्न तथा लत्ता कपडाजन्य सामग्रीको आयातमा कमी आएको हो।
सरकारले पछिल्लोपटक आयातमा रोक लगाएका विभिन्न सामानबाहेक अन्य खाद्यान्न तथा लत्ताकपडाजन्य सामग्रीहरु आयात भए पनि अघिल्लो वर्षका समीक्षा अवधिको तुलनामा निकै काम मात्रामा भित्रिएका हुन्। गत असार ३१ गते नेपाल सरकारले राजपत्रमा सूचना प्रकाशित गरी चारपाङ्ग्रे सवारी साधनलगायतका विभिन्न विलासीजन्य वस्तुको आयातमा प्रतिबन्ध लगाएको छ।
चालु आवको साउन महिनाका लागि भन्सार विभागले १५ अर्ब २० करोड ७ लाख राजस्व संकलन गर्न लक्ष्य दिएको थियो। तर कार्यालयले लक्ष्यभन्दा २ अर्ब २१ करोड आठ लाख कम अर्थात १२ अर्ब ९८ करोड ९९ लाख रुपैयाँ मात्र राजस्व संकलन गरेको थियो।
त्यसैगरी भदौ महिनाका लागि १९ अर्ब २९ करोड ४५ रुपैयाँ लाख राजस्व संकलनको लक्ष्य पाएको कार्यालयले ५ अर्ब १५ करोड २० लाख कम अर्थात १४ अर्ब १४ करोड २५ लाख रुपैयाँ मात्र राजस्व संकलन गरेको छ।
वैदेशिक मुद्राको सञ्चितीकरणलाई मध्यनजर गर्दै सरकारले विभिन्न वस्तुको आयातमा लगाएको रोकका कारण कार्यालयको राजस्व संकलनमा प्रभावित भएको वीरगञ्ज भन्सार कार्यालयले जनाएको छ।
कार्यालयका अनुसार सबैभन्दा बढी राजस्व संकलन हुने ठूला तथा साना सवारी साधन, मोइबाइल फोनलगायतका विलासीसहित विभिन्न १० वस्तुको आयातमा सरकारले लगाएको प्रतिबन्धको प्रत्यक्ष प्रभाव राजस्व संकलनमा देखिएको हो।
गत आर्थिक वर्ष ०७८/०७९ को भदौ मसान्तसम्ममा राजस्व संकलनको कारोवारका लागि १६ हजार चार सय ३७ वटा प्रज्ञापनपत्र प्रयोग भएकामा चालु आवको सोही अवधिसम्ममा चार हजार पाँच सय ८९ प्रज्ञापनपत्र मात्र प्रयोग भएको कार्यालयले जनाएको छ।
चारपाङ्ग्रे सवारी साधनलगायतका विभिन्न विलासीजन्य वस्तुको आयातमा प्रतिबन्ध लगाइएपछि वीरगञ्ज नाका प्रयोग गरी हुने कारोवारमा अन्य समयको तुलनामा करिब २८ प्रतिशतले कमी देखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1746000894.jpg)
-1764146706.png)
