विवादित बनेको अस्ट्रेलिया भ्रमण सकेर स्वदेश फर्किए प्रधान सेनापति शर्मा

सुरक्षा/अपराध

नेपाल लाइभ शनिबार, साउन २१, २०७९ १०:४२

काठमाडौं– नेपाली सेनाका प्रधान सेनापति प्रभुराम शर्मा अस्ट्रेलिया भ्रमण पूरा गरि स्वदेश फर्किएका छन्। अस्ट्रेलियाको सिड्नीमा भएको रक्षा प्रमुखहरुको वार्षिक सम्मेलनमा सहभागी भएर शर्मा शनिबार स्वदेश फर्किएका हुन्।

उक्त सम्मेलनमा सहभागी हुन शर्मा गत शनिबार (साउन ७ गते) अस्ट्रेलिया प्रस्थान गरेका थिए।

प्रधान सेनापति शर्मा अस्ट्रेलियाको रक्षा बलको संयोजकत्वमा अमेरिकी सेनाको इन्डोप्यासिफिक कमाण्डले आयोजना गरेको रक्षा प्रमुखहरुको सम्मेलनमा सहभागी भएका थिए। उक्त सम्मेलनमा सहभागिताका लागि मन्त्रिपरिषद्‌को असार ३१ गतेको बैठकले प्रधान सेनापतिको भ्रमण स्वीकृत गरेको थियो।

सम्मेलनमा एसिया प्रशान्त क्षेत्रका राष्ट्रका सेना प्रमुखहरुले वर्तमान अन्तर्राष्ट्रिय सुरक्षा र सहयोगका बारेमा छलफल भएको नेपाली सेनाको जनसम्पर्क तथा सूचना निर्देशनालयले जानकारी दिएको छ।

उक्त सम्मेलन साउन ९ गतेदेखि ११ गतेसम्म चलेको थियो। सम्मेलन सकिएपछि पनि प्रधान सेनापति शर्मा भने घर बिदा स्वीकृत गराएर साउन २० गतेसम्म त्यहाँ रहेका थिए। सम्मेलनका क्रममा शर्मा अन्तर्राष्ट्रिय सुरक्षा वातावरण, प्रविधि, जलवायु परिवर्तन लगायतका विषयहरुमा भाएका छलफल तथा अन्तर्क्रियामा सहभागी भएका नेपाली सेनाले जानकारी दिएको छ।

शर्माको भ्रमणलाई लिएर नेपालमा भने सांसदहरुले विरोध जनाएका थिए। साउन १० गतेको प्रतिनिध सभाको बैठकको शुन्य समयमा बोल्दै माओवादी केन्द्रका सांसद्‌हरुले अमेरिकाको इन्डोप्यासिफिक स्ट्राटेजी (आईपीएस)सँग जोडिएको कार्यक्रममा प्रधान सेनापति शर्मा सहभागी हुनु उचित नभएको बताएका थिए।

नेपाल आइपीएसको अंग हैन भनेर संसद्‌बाट विशेष घोषणा नै पारित गरिएको तथा असंग्लन परराष्ट्र नीति र पञ्चशीलको सिद्धान्त अनुसार निरन्तर अघि बढिरहेको देशको सेना प्रमुखले सैन्य रणनीति जोडिएको कार्यक्रममा सहभागी हुनुले राष्ट्रियता नै खतरामा पर्ने अवस्था सिर्जना गरेको सांसद्हरुको जिकिर थियो।

माओवादी केन्द्रकी सांसद अमृता थापाले भूराजनीतिक संवेदनशीलताका बेला प्रधान सेनापतिको उक्त कार्यक्रमको सहभागिता नेपालको परराष्ट्र नीतिविरुद्ध हुने बताएकी थिइन्।

जंग अड्डाले भने उक्त सम्मेलनमा नेपाली सेना २०५६ सालदेखि सहभागी हुँदै आएको बताउँदै यस किसिमको कार्यक्रमले सैनिक कुटनीतिमार्फत् नेपालको परराष्ट्र नीतिलाईसमेत सकारात्मक योगदान पुग्ने दाबी गरेको थियो।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

अमेरिकामा गैरकानुनी रूपमा बस्दै आएका आफ्ना नागरिकलाई फिर्ता गर्न भारत तयार

मधेशको सरकारी कामकाजी भाषासम्बन्धी विधेयकको विरोधमा प्रदेशसभा अगाडि प्रदर्शन

रविका वकिलको पालो नआइ आजको बहस सकियो