काठमाडौं- भ्रमणकारी भारतले तेस्रो टी–२० आई खेलमा घरेलु टोली वेस्ट इन्डिजलाई ७ विकेटले पराजित गरेको छ। योसँगै पाँच टी–२० आई खेलको सिरिजमा भारतले २–१ को अग्रता लिएको छ।
जितको लागि १६५ रनको विजयी लक्ष्य पछ्याएको भारतले १९ ओभरमा ३ विकेट गुमाउँदै पूरा गर्यो। भारतका सूर्यकुमार यादवले सर्वाधिक ७६ रनको इनिङ्स खेले। उनले ४४ बलमा ८ चौका र ४ छक्का प्रहार गरे।
यता, विकेटकिपर ऋषभ पन्त २६ बलमा ३ चौका र १ छक्कासहित ३३ रनमा अविजित रहे। श्रेयस ऐर २७ बलमा २ चौकासहित २४ रनमा आउट भए।
यता, कप्तान रोहित शर्मा ११ रनमै रिटार्यट हर्ट भएका थिए। दीपक हुड्डा १० रनमा अविजित रहे।
वेस्ट इन्डिजका जेसन होल्डर, डोमिनिक ड्रेक्स र अकिल हुसैनले १/१ विकेट लिए।
त्यसअघि सेन्ट किट्समा टस हारेर पहिला ब्याटिङको निम्तो पाएको वेस्ट इन्डिजले निर्धारित २० ओभरमा ५ विकेट गुमाउँदै १६४ रन बनाएको थियो।
वेस्ट इन्डिजका ओपनर काइल मेयर्सले सर्वाधिक ७३ रन बनाए। उनले ५० बलमा ८ चौका र ४ छक्का प्रहार गरे।
रोभम्यान पावेलले १४ बलमा २ चौका र १ छक्कासहित २४ रनमा क्याच आउट भए। कप्तान निकोलस पुरन २३ बलमा २ चौका र १ छक्कासहित २२ रनमा आउट भए।
यता, शिम्रन हेटमायर र ब्रेन्डन किंगले समान २० रन बनाए। भारतका भुवनेश्वर कुमारले २ विकेट लिए। हार्दिक पान्ड्या र अर्शदीप सिंहले १/१ विकेट लिए। पहिलो खेलमा भारत ६८ रनले विजयी हुँदा दोस्रो खेलमा ५ विकेटले पराजित भएको थियो। चौथो खेल शनिबार र पाँचौं तथा अन्तिम खेल आइतबार हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
