फुटबल

साफ यू–२० : नेपाली टोली सदाबहार उपाधि दाबेदार

दीप सुवेदी सोमबार, साउन ९, २०७९ ०७:३३

काठमाडौं- अखिल नेपाल फुटबल संघ (एन्फा) सही रुपले चल्थ्यो भने यतिबेला नेपाली फुटबल निक्कै व्यस्त हुन्थ्यो। घरकै एक कुनामा थन्किएर बसेका बुट र जर्सीले मात्रै होइन फुटबल खेलेरै पेट पाल्ने सपना बुनेका सयौं खेलाडी मैदानमा उत्रिरहेका हुन्थे।

तर, एन्फामा देखिएको राजनीतिक र आर्थिक संकटले यतिबेला नेपालमा फुटबलको गतिविधि शून्य छ। जसको असर साफ यू–२० च्याम्पियनसिपको फाइनल खेल्ने योजना बुनेर भारतको भुवनेश्वर पुगेको युवा टोलीमा पनि देखिने लगभग पक्का छ।

सोमबारदेखि सुरु हुने प्रतियोगिताको उद्घाटन खेलमा नेपालले माल्दिभ्ससँग खेल्दै छ भने श्रीलंकाले बंगलादेशसँग। भारतको पहिलो खेल २७ जुलाईमा श्रीलंकासँग हुनेछ। नेपाल र माल्दिभ्सबीचको खेल भुवनेश्वरको कालिंगा रंगशालामा सोमबार नेपाली समयअनुसार दिउँसो ४:१५ मा सुरू हुनेछ। नेपालले पहिलो खेलमा नै जित हात पार्दै उपाधि जित्ने लक्ष्य बनाएको छ।

‘नेपालमा मात्र नभई दक्षिण एसियामै उमेर समूहका खासै प्रतियोगिता भएको छैन्। अन्य टोलीमा पनि थुप्रै परिवर्तन भएको कारण प्रतिद्धन्दीका विषयमा खासै जानकारी छैन। तर, हाम्रो टिम बलियो छ। हामी यहाँ जित्न आएका हौं। हामीले जितका लागि तयारी गरेका छौं,’ च्याम्पियनसिपको प्रि–म्याच कन्फ्रेन्समा आइतबार मुख्य प्रशिक्षक मेघराज केसीले भने।

नेपालले यस प्रतियोगिताको लागि २ महिनायता नै तयारी गर्दै आएको थियो। तर, त्यसको अधिकांश समय भने खेलाडी छनोट मै बित्यो। टोलीका मुख्य प्रशिक्षक केसीले खुला छनोटमार्फत् ७०० खेलाडीबाट ३० जना छान्न निकै पापड झेल्नु पर्‍यो।

बिशेषगरी कोरोना महामारीपछि अस्तव्यस्त बनेको नेपाली फुटबल र नयाँ नेतृत्व पदकै लागि लडिरहँदा आयोजना हुनुपर्ने नेपाल सुपर लिग मात्रै होइन उमेर समूहका प्रतियोगिता पनि सञ्चालन भएनन्। यसले टोली बनाउन निक्कै गाह्रो परेको केसीको भनाइ छ।

‘कोभिडले पनि असर गर्‍यो। यू-२० टिम बनाउँदा सपोर्टिङ टिम थिएन। आज भन्दा ५-६ वर्षअघि यू-१६ खेलेको टिम मात्र थियो सपोर्टका लागि। तर, अहिले त्यो छैन। त्यसैले अहिले नेपाली फुटबल जसरी चलिराछ त्यसकै असरले गर्दा अहिले यसरी टिम बनाउनुपरेको हो,’ केसीले भारत पुग्नु अघि भने।

यसअघि उमेर समूहमा ललित स्मृति यू–१८ च्याम्पियनससिप हुन्थ्यो। त्यसबाट यू–१९ राष्ट्रिय टिमका लागि खेलाडी छनोट गरिन्थ्यो। तर, यसपटक त्यो प्रतियोगिता भएन। जसले गर्दा पुराना खेलाडीको उमेर कटिसक्यो भने नयाँ खेलाडी आएका छैनन्।

यद्यपि, उनले खुला छनोटमार्फत् भएपनि ‘ए’ डिभिजन लिगको अनुभव संगालेका आयुष घलना, क्रितिश रत्न छुन्जु, मनग्य नकर्मी, आशिष राई जस्ता खेलाडीहरुलाई समेटेर टोली बनाएका छन्।

आयुष सिनियर राष्ट्रिय टोलीमा नियमित रहँदा क्रितिश र आशिष बन्द प्रशिक्षणमा परिसकेका छन्। अनुभवी र कम अनुभव तर सक्षम खेलाडीहरुको संयोजनले टोली बलियो बनेको र यही टोलीले साफ जित्नेमा ढुक्क छन् प्रशिक्षक केसी।

‘साफ रिजनको कुरा गर्दा सबै टोली एउटै स्तरका छन्। पहिलो म्याच माल्दिभ्ससँग छ। दुवै बराबरीका टिम हुन्। हामीले केही फरक तयारी गरेका छौं। यसमा थप काम गर्न सके उनीहरुलाई सजिलै हराउन सक्नेछौं,’ उनले भने।

यसअघि साफ यू–१८ र साफ यू–१९ को नामबाट प्रतियोगिता भएको थियो। तर, फुटबलको सर्वोच्च निकाय फिफाको प्रतियोगितामा एसियाली टिमलाई पनि प्रतिस्पर्धात्मक बनाउन एएफसीले एसियाली उमेर समूहको प्रतियोगितामा परिवर्तन गरेको छ। जसकारण यसपटक यू–२० लेभलमा प्रतियोगिता हुँदैछ।

सन् २०१५ मा पहिलो पटक साफ यू–१९ च्याम्पियनसिप आयोजना हुँदा घरेलु टोली नेपालले भारतलाई हराउँदै उपाधि उचालेको थियो। त्यसको दुई वर्षपछि भुटानमा यू–१८ को नामबाट भयो। सिंगल राउन्ड रोविन लिगको आधारमा भएको उक्त प्रतियोगितामा नेपाल शीर्ष स्थानमा रहेर सिधै च्याम्पियन बनेको थियो।

२०१९ मा तेस्रो संस्करण नेपालमै आयोजना भएको थियो। उपाधिमा ह्याट्रिक गर्ने लक्ष्य साथ मैदान उत्रिएको नेपालले अघिल्लो संस्करणमा जस्तो प्रभावसाली खेल प्रदर्शन गर्न सकेन र समूह चरणबाटै बाहिरियो। घरेलु मैदानमा नेपालले माल्दिभ्ससँग बराबरी खेल्दा भुटानसँग पराजित भएको थियो। फाइनलमा भारतले बंगलादेशलाई पराजित गरेर उपाधि जित्यो।

यद्यपि, साफको सदाबहार दाबेदार टोली रहेको भन्दै मुख्य प्रशिक्षक केसीले यसपटक पनि उपाधि रक्षा गर्ने बताए। ‘नेपाल साफको सदाबहार दाबेदार टोली हो। उमेर समूहको टोली मात्र हैन, हामीले व्यवस्थापन सहि तरिकाले अघि बढाउन सक्यौं भने जुनसुकै साफ प्रतियोगिताको दाबेदार रहन्छौं। दाबेदारी प्रस्तुत गर्न सुरुमा प्रदर्शन उच्च रहन पर्‍यो। त्यसमा हामीले विशेष जोड दिएका छौं,’ उनले भने।

सुरुआती ३ अंक
नेपालले पहिलो खेलमा माल्दिभ्सलाई हराउँदै महत्त्वपूर्ण ३ अंक जोड्ने लक्ष्य लिएको छ। यसैका लागि धेरै मिहिनेत गरेको कप्तान घलान बताउँछन्। ‘पहिलो म्याच माल्दिभ्ससँग छ। हामीलाई कुनै दवाब छैन। हामी तीन अंकका लागि खेल्नेछौं। हामी अन्तिमसम्म फाइट गर्नेछौं,’ उनले भने।

नेपाल र माल्दिभ्सले यो स्तरमा यसअघि दुई पटक खेलेका छन्। जसमा नेपालले एक खेल जित्दा माल्दिभ्सले एक खेल बराबरीमा रोकेको छ। तर, माल्दिभ्सका प्रशिक्षक अहमद शाकिरले भने नेपाली युवा टोली आफ्ना लागि नौलो रहेको बताउँदै खेल्न कठिन हुने बताउँछन्।

उनले व्यक्तिगत रुपमा भारतलाई बलियो टोली मान्दै नेपालविरुद्धको खेलको नतिजा आफ्नो पक्षमा आउने उनले विश्वास व्यक्त गरे। ‘म व्यक्तिगत रूपमा भारतलाई राम्रो टिम ठान्छु किनभने उनीहरू करिब २-३ वर्षदेखि सँगै छन्। हामीसँग राष्ट्रिय टोलीको प्रारम्भिक टोलीमा छनोट भएका तीन खेलाडी छन्। म प्रतियोगिताको लागि धेरै उत्सुक छु,’ उनले भने।

साफ यू–२० च्याम्पियनसिपमा नेपाल र आयोजक भारतसहित बंगलादेश, माल्दिभ्स र श्रीलंकाले प्रतिस्पर्धा गर्नेछन्। सिंगल राउन्ड रोविन लिगपछि शीर्ष दुईमा रहने टोलीले उपाधिका लागि खेल्नेछन्।

नेपालले ११ साउनमा श्रीलंका, १५ साउनमा भारत तथा १७ साउनमा बंगलादेशसँग खेल्नेछ। सिंगल राउन्ड रोविनको खेलपछि अंकतालिकामा शीर्ष दुईमा रहने टोलीले २० साउनमा फाइनल खेल्नेछन्।

नेपाली टिम:
गोलरक्षक : ईश्वर गुरुङ, उनेश चौधरी, जियारथ शेख
डिफेन्डर: अमर श्रेष्ठ, सोनित दाहाल, आयुष श्रेष्ठ, अजय चौधरी, सुमित श्रेष्ठ, सिर्जन दानी, रोशन थापा, अभिशेक वाइबा
मिडफिल्डर : दीपेश गुरुङ, आशिष राई, सन्दीप कार्की, जन्मजय धामी, मोहित गुरुङ, कृतिश रत्न छुन्जु, सुगम सुवाल, मनग्य नकर्मी, आयुष घलान
फरवार्ड : रोहित सुब्बा, निरन्जन मल्ल, रोहन खड्गी