काठमाडौं–श्रम, रोजगार तथा सामाजिक सुरक्षामन्त्री शेरबहादुर कुँवरले विदेशमा कमाएको पैसा विलासितामा खर्च भइरहेकाले त्यसलाई उत्पादनका क्षेत्रमा लगानी गर्नुपर्ने बताएका छन्।
चन्द्रलोक प्रतिष्ठानद्वारा शुक्रबार आयोजित 'वैदेशिक रोजगारका क्षेत्रमा देखिएका समस्या र समाधानका उपाय' विषयक अन्तरक्रिया एवं सम्मान कार्यक्रममा बोल्दै मन्त्री कुँवरले विदेशमा दु:ख गरेर कमाएको पैसा स्वदेशमा विलासिताका सामान किन्नमा खर्च भइरहेकाले त्यसलाई उत्पादनको क्षेत्रमा लगाउनु पर्ने बताएका हुन्।
उनले विदेशी पुँजी र र सीपलाइ देशनिर्माणमा लगाउन सबैमा आग्रहसमेत गरे। 'नेपालीहरुले दु:ख गरी विदेशमा पैसा कमाउनुहुन्छ तर त्यो पैसा विलासिताका सामान किन्नमा खर्च भइरहेको छ। त्यो रकमलाई उत्पादनका क्षेत्रमा लगाउन सक्यो भने बिस्तारै विदेश जाने बाध्यता पनि हटेर जान्छ र त्यसले रोजगारी पनि सिर्जना गर्छ,' उनले भने।
नेपालीहरु वैदेशिक रोजगारमा जानु रहर नभई बाध्यता भएकाले विदेशमा कमाएको पैसालाई पनि त्यहीअनुसार उपयोग गर्न पनि उनले सुझाव दिए।
मन्त्री कुँवरले गैरकानुनी रुपमा विदेश गएका कामदारका शव नेपाल ल्याउन नसकिरहेको अवस्थामा आफूले परराष्ट्र मन्त्रालयसँग आवश्यक छलफल गरिरहेका समेत जानकारी गराए।
वैदेशिक रोजगारका नाममा ठगिनेहरुको संख्या धेरै भएकाले यसबारे नागरिकहरु आफैँ सचेत हुनुपर्ने मन्त्री कुँवरको भनाइ छ। विदेश जाँदा सबै जानकारी लिएर मात्रै जान उनले आग्रहसमेत गरे। रोजगारीमा विदेश पठाईदिन्छु भन्दै विभिन्न बहानामा ठगी गर्नेहरुलाई उजुरीका आधारमा सरकारले कारबाही गरिरहेको समेत उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
