काठमाडौं- नागरिक अगुवाहरुले अर्थमन्त्री जनार्दन शर्माको राजीनामा माग गरेका छन्। बजेटमा भएको अनधिकृत व्यक्तिको प्रवेशका कारण उनले नैतिकताका आधारमा राजीनामा दिनुपर्ने उनीहरुको तर्क छ।
पूर्व प्रधानन्यायाधीश शुसिला कार्की, पूर्व उपकुलपति केदारभक्त माथेमा र चिकित्सा शिक्षाका अभियान्ता डा गोविन्द केसीले संयुक्त विज्ञप्ति जारी गर्दै अर्थमन्त्री शर्माको राजीनामा माग गरेका हुन्।
‘हाल सत्तासीन दलका विभिन्न पदाधिकारी र नेताहरुले सिर्जना गरेको आर्थिक तथा न्यायिक अराजकताबारे पछिल्लो समय मिडियामा आइरहको समाचारहरुप्रति हाम्रो गम्भीर ध्यानाकर्षण भएको छ’ विज्ञप्तिमा भनिएको छ, ‘बजेट निर्माणका क्रममा अनधिकृत व्यक्ति संलग्न भएको र कुनै स्वार्थ समुहको इशारामा करको दर हेरफेर गरिएको भन्ने समाचार यस अगाडि नै आएको थियो। त्यस विषयमा संसदीय छानविन समिति बनाउनुपर्ने प्रतिपक्षको मागलाई सत्तारुढ गठबन्धनका दलहरुले लत्याएको र त्यस विषयमा अर्थमन्त्रीले चित्त बुझ्दो जवाफ नदिएको पृष्ठभुमिमा अहिले त्यो समयको सिसिटीभी फुटेज गृह मन्त्रालयले जारी गरेको सिसिटीभी जडान तथा सञ्चालन कार्यविधि २०७२को प्रतिकुल हुने गरी असमयमै हटाइएको भन्ने समाचारहरु अहिले आइरहेका छन्।’
यस्ता अराजकता र दण्डहीनता कुनै पनि नेपाली नागरिकलाई स्वीकार्य हुन नसक्ने उनीहरुको विज्ञप्तिमा उल्लेख छ। ‘आधारभुत नैतिकता समेत गुमाएका व्यक्तिहरु मन्त्री पदमा बसिरहँदा त्यो पदको समेत गरिमा खण्डित हुने र सरकारको छवि थप धमिलिने देखिन्छ’ विज्ञप्तिमा भनिएको छ, ‘अर्थमन्त्रीको इमानबारे विवाद र बहस भइसकेको अवस्थामा या त अर्थमन्त्रीले कुनै अकाट्य प्रमाणसहित अनधिकृत व्यक्तिले बजेट निर्माणमा भुमिका नखेलेको प्रमाणित गर्न, हैन भने तत्काल नैतिकताका आधारमा राजीनामा गर्न माग गर्दर्छौं।’
साथै सीसीटीभी जडान तथा सञ्चालन कार्यविधि २०७२ उल्लंघन गर्ने कार्यमा संलग्न व्यक्ति वा निकाय वा दुवैलाई तत्काल कानुन बमोजिम कारबाही गर्न पनि उनीहरुले माग गरेका छन्।
हालैको निजगढ भ्रमणमा सत्ता गठबन्धनका नेताहरुले त्यहाँ विमानस्थल बनाउँछौं भनेको तर सर्वोच्च अदालतले कायम गरेका बन्देज र दिएको आदेश पालना गर्ने कुरा खुलेर नभनेकोमा समेत उनीहरुले आपत्ति जनाएका छन्। ‘आगामी दिनमा उक्त अन्तर्राष्ट्रिय विमानस्थलसम्बन्धी कुनै पनि काम न्यायालयको आदेश प्रतिकुल वा मान हानि हुने गरी नगर्न पनि ध्यानाकर्षण गराउँछौं ’ उनीहरुको विज्ञप्तिमा भनिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
