काठमाडौं- आगामी प्रतिनिधि सभा र प्रदेश सभा निर्वाचन अघि नै नेकपा माओवादी केन्द्र र नेकपा एकीकृत समाजवादीबीच पार्टी एकता हुने विषय सार्वजनिक भइरहेको छ। नेकपा माओवादी केन्द्रका शीर्ष नेताहरुले यस विषयमा सार्वजनिक रुपमा आफ्नो धारणा राखिरहेका छन्।
तत्कालीन नेपाल कम्युनिस्ट पार्टी (नेकपा) मा हुँदा अहिलेको नेकपा माओवादी केन्द्रका अध्यक्ष पुष्पकमल दाहाल 'प्रचण्ड', नेकपा एकीकृत समाजवादीका अध्यक्ष माधवकुमार नेपालसहित वरिष्ठ नेता झलनाथ खनाल र माओवादी केन्द्रका नेता नारायणकाजी श्रेष्ठ एकै समूहमा रहेका थिए।
केपीशर्मा ओलीसँग तिक्ताता बढिरहँदा सर्वोच्च अदालतले एमाले र एकीकृत माओवादीबीचको एकतालाई ब्युँताइदिएको थियो। यसरी ब्युतिएको एमाले विभाजित भएको छ। माधवकुमार नेपालले नयाँ दल एकीकृत समाजवादी गठन गरेका छन्।
उनीहरुबीच निर्वाचन अघि एकता गर्ने विषयमा छलफल चलिरहेका विषय सार्वजनिक भइरहेका छन्। सोमबार नेकपा एकीकृत समाजवादीको सचिवालयको बैठक बसेको छ। बैठकमा पछिल्लो समय वाम एकताका विषयमा नेताहरुले दिइरहेका अभिव्यक्तिका विषयमा पनि छलफल भएको छ।
समाजवादीका उपमहासचिव एवम् प्रवक्ता जगन्नाथ खतिवडा माओवादीका नेताहरुले समाजवादीसँग एकताका विषयमा सार्वजनिक अभिव्यक्ति दिइरहे पनि आफूहरुको पार्टीमा यस विषयले प्रवेश भने नपाएको दाबी गर्छन्।
‘माओवादीका साथीहरुले बोलिरहनुभएको छ। तर, यो विषयमा अहिले नै हाम्रो पार्टीका आधिकारीक कमिटीका बैठकमा छलफलको विषय बनेको छैन,’ उनले भने, ‘वाम पार्टीबीच एकता हुनु स्वभाविक हो। तर, यस विषयमा देशभरका नेता कार्यकर्ताको पनि राय सुझाव बुझ्न जरुरी हुन्छ।’
आइतबार तत्कालीन नेकपाका बहुमत सचिवाल सदस्यहरुको बैठक बसेसँगै दुई दलबीच एकताको विषय चर्चामा रहेको हो। खतिवडाका अनुसार नेकपा एकता राष्ट्रिय अभियानका संयोजक वामदेव गौतमको पहलमा उक्त बैठक बसेको थियो।
बैठकमा गौतमले नेकपा ब्युँत्याउने विषयमा प्रस्ताव राखेको समाजवादीका अध्यक्ष माधवकुमार नेपालले एकीकृत समाजवादीको आइतबारको सचिवालय बैठकमा ब्रिफिङ गरेका थिए।
‘हिजो नेकपा पार्टी आज तीन ठाउँमा विभाजन भएको अवस्था छ। त्यही नेकपा ब्युँत्याउने वा कसरी अघि बढ्ने भन्ने विषयमा छलफल भएको छ,’ माधव नेपालको भनाई उधृत गर्दै बैठकमा सहभागी समाजवादीका अर्का एक नेताले भने, ‘नेकपामा रहेको एउटा शक्तिलाई प्रतिगामी भनेर हामीले भनिरहेका बेला उ नसच्चिकन हिजोको संगोलो नेकपा कसरी ब्युँतिन्छ।’
माओवादीले अहिले समाजवादी र माओवादीबीच एकताको कुरा गरे पनि जारी केन्द्रीय कमिटी बैठकमा अध्यक्ष पुष्पकमल दाहालले एकीकृत समाजवादीले हैसियत भन्दा बढी माग गरेको राजनीतिक प्रतिवेदनमा उल्लेख गरेका छन्।
यस विषयमा समाजवादीका प्रवक्ता भन्छन्, ‘माओवादीले आफ्नो प्रतिवेदनमा हामीले हैसियत भन्दा बढी माग्यौं भनेर भनेको छ। त्यहाँ लेख्दा देखिने गरी त्यो लेखिए पनि उद्देश्य नदेखिने हो भन्ने लाग्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
