काठमाडौं– प्रमुख प्रतिपक्ष दल नेकपा एमालेका अध्यक्ष केपी शर्मा ओलीले वर्तमान सरकारले कृषि क्षेत्रको उत्थान गर्न नसक्ने दाबी गरेका छन्। अखिल नेपाल किसान महासंघले शनिबार पार्टी केन्द्रीय कार्यालय च्यासलमा आयोजना गरेको कार्यक्रममा बोल्दै उनले यस्तो दाबी गरेका हुन्।
पूर्व प्रधानमन्त्रीसमेत रहेका ओलीले सरकारले अझै पनि किसानका लागि मल ल्याउने प्रबन्ध कहिँ पनि नगरेको दाबी गरे। प्रधानमन्त्री शेरबहादुर देउवाले संसद्को रोस्टममा उभिएर किसानलाई मलको तत्काल आपूर्ति गर्ने मिठो कुरा गरे पनि मल ल्याउनका लागि कुनै प्रबन्ध गर्न नसकेको उनको भनाइ छ।
उनले सरकारलाई प्रश्न गर्दै भने, ‘कहीँ पनि प्रबन्ध नगरेपछि किसानले कसरी मल पाउँछन?’ सरकारले किसानलाई अलमल्याउने, छक्याउने काम गरिरहेको भन्दै अध्यक्ष ओलीले यस सरकारबाट कृषि क्षेत्रको उत्थान हुनै नसक्ने स्पष्ट पारे।
उनले भने, ‘हामीले सरकार छोडेको मात्रै हिसाव गर्दा मात्रै चामल कसरी आयात भयो? कृषि प्रदान देश। ६० प्रतिशत जनता कृषिमा संलग्न छन्। यस्तो अवस्थामा कृषि प्रदान देशमा, यस्तो उर्वर देशमा, जहाँ यति हिमाल, पहाड, उर्वर फाँटहरु छन्। जहाँको जनसंख्या ३ करोडभन्दा कम छ। त्यस्तो देशमा किन हामी खाद्यन्नमा पनि आत्मनिर्भर हुन नसकेर ४९ अर्वको आयात गर्छौ चामल मात्रै।’
उनले हरेक वर्ष किसानलाई मल आपूर्ति नहुने र बाली लगाउने बेला मात्रै सबैको चासो किन हुने भन्दै प्रश्न गरे। उनले भने, ‘हरेक साल किसानलाई चाहिने बेलामा मल आपूर्ति हुँदैन। यो किन यस्तो हुन्छ? यतिबेला मल चाहिन्छ भन्ने सबैलाई थाहा छ। त्यही कुरा ६ महिना अगाडिदेखि प्रयास गरे हुन्थ्यो नि?’
संसद्मा उभिएर मिठो बोले पनि मल ल्याउने विषयमा सरकारले किसानलाई अल्मल्याएको अध्यक्ष ओलीको आरोप छ।
उनले अघि भने, ‘अस्ती प्रधानमन्त्री शेरबहादुर देउवाजीले संसद्मा संसदमा उभिएर भन्नु भयो–किसानलाई मलको आपूर्तिको व्यवस्था तत्काल गरिनेछ र किसानले मल पाउनेछन्। वाणी मिठो थियो। कुरा राम्रो थियो। तर, ल्याउने प्रबन्ध कहीँ पनि गरिएको छैन, केही पनि गरिएको छैन भने मल कहाँबाट आउँछ? अर्थात अलमल्याउने काम भएको छ। अलमल्याउने कामबाट, छक्याउने कामबाट कृषि क्षेत्रको उत्थान हुन सक्दैन।’
अध्यक्ष ओलीले मलको अभाव हुन नदिन सरकारले बेलैमा आवश्यक व्यवस्था गर्न नसकेको पनि पटक–पटक दोहोर्याए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768635488.png)
-1764146706.png)
-1768395492.png)
