काठमाडौं- नेपाली कांग्रेसको स्थानीय तह निर्वाचन परिचालन समितिले शहरी क्षेत्रका स्वतन्त्र उम्मेदवार र युवाहरु कांग्रेसका लागि चुनौती रहेको निष्कर्ष निकालेको छ। स्वतन्त्र र युवाहरुबाट सिर्जित चुनौतीलाई मध्यनजर गर्दै आगामी चुनावका लागि विशेष रणनीति बनाउन सुझाव दिएको छ।
स्थानीय तहको निर्वाचनको समीक्षा गर्दै दिइएका सुझावमा प्रचार सामाग्रीका लागि आधुनिक सूचना प्रविधिको अत्याधिक प्रयोग गर्ने, चुनावमा आउने असन्तुष्टि रोक्न सुरुदेखि नै उपयुक्त व्यवस्थापन गर्ने, टिकट वितरण प्रणालीलाई वैज्ञानिक र व्यवस्थित बनाउने, लोकप्रिय, स्वच्छ छवि, क्षमतावान र जनतामा भिजेको व्यक्तिलाई उम्मेदवार बनाउनुपर्ने, पार्टीका अजेन्डा स्थानीय तहसम्म पुर्याउन आधुनिक प्रविधिको प्रयोग गर्नुपर्नेलगायत सुझाव दिइएको छ।
स्थानीय तहमा गठबन्धनबाट कांग्रेसले ६१ प्रतिशत प्रमुख र ७४ प्रतिशत उपप्रमुखमा जितेको तथ्यांक राखिएको छ। गठबन्धनलाई कम्तिमा आगामी प्रदेश र प्रतिनिधि सभाको निर्वाचनसम्म कायम राख्नुपर्ने निष्कर्ष पनि प्रतिवेदनमा निकालिएको छ। गठबन्धन प्रभावकारी बनाउन केन्द्रको जस्तै संयन्त्र जतिसक्यो चाँडो प्रदेश, जिल्ला र निर्वाचन क्षेत्रसम्म बनाउनुपर्ने बताइएको छ।
गठबन्धनमा कसले कहाँ, कति सिट पाउने भन्ने ककुरा निर्वाचन प्रक्रिया सुरु हुनुभन्दा अघि नै टुंग्याउनुपर्ने, घोषणा पत्रको लेखन, वितरण, प्रचारप्रसार र चुनाव परिचालन कार्य समन्वयात्मक रुपमा गर्नुपर्ने र सकेसम्म गठबन्धन भएका सवै ठाउँ जिताउन आपसी समन्वय गर्नुपर्ने निर्वाचनको समीक्षा प्रतिवेदनमा उल्लेख गरिएको छ।
गठबन्धनमा कांग्रेसको बार्गेनिङ शक्ति बढाउन समयमै हरेक जिल्ला र निर्वाचन क्षेत्रको तथ्यांक संकलन गर्नुपर्ने सुझाव पनि समितिले दिएको छ। समिति कांग्रेस उपसभापति पूर्णबहादुर खड्काको संयोजकत्वमा बनेको थियो। उक्त समितिले प्रदीप पौडेल नेतृत्वकको उपसमितिको प्रतिवदेनलाई समेत आधार मानेर यो प्रतिवेदन तयार पारेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
