काठमाडौं– बागमती प्रदेशमा मुख्यमन्त्री राजेन्द्र पाण्डेले सहमति पालना गरेर पदबाट राजीनामा नदिएकाले उनलाई हटाउन भन्दै सत्तारुढ नेपाली कांग्रेस र माओवादी केन्द्रका प्रदेश सभा सदस्यको हस्ताक्षर सुरु भएको छ।
नेपाली कांग्रेसका सांसद छिरिङ दोर्जे लामाका अनुसार पछिल्ला केही दिनयता मुख्यमन्त्री परिवर्तनका लागि निरन्तर छलफल चलिरहेको छ।
‘विगतमा गरेको सहमति कार्यान्वयनका लागि आज पनि सत्तारुढ दलकाबीचमा छलफल भइरहेको छ,’ उनले भने, ‘सहमति हुन नसके भोलि काठमाडौंका केन्द्रीय नेताहरूसहित छलफल हुने छ।’
नेकपा एकीकृत समाजवादीका मुख्यमन्त्री पाण्डेले ६/६ महिना मुख्यमन्त्री हुने सहमति पालना नगरेको भन्दै नेपाली कांग्रेसले पछिल्लो समय दबाब बढाएको थियो। बिहीबारसम्म पनि मुख्यमन्त्रीले सहमतिअनुसार पद हस्तान्तरण गर्ने मन नदेखाएपछि कांग्रेस र माओवादीहरूले भित्री रूपमा हस्ताक्षर नै संकलन गरेको कांग्रेसका अर्का सांसदले बताए।
दुवै दलका सांसदहरूले हस्ताक्षर गरेर दलको कार्यालयमा दिएका छन्। आवश्यक परेमा मात्र त्यसको उपयोग हुने नत्र राजनीतिक सहमतिका आधारमा पाण्डेलाई राजीनामा दिन लगाउने कुरा भइरहेको ती सांसदले जानकारी दिए।
नेकपा एमालेको सरकार ढालेर नयाँ सरकार निर्माण गर्दा ६ महिना पाण्डेको नेतृत्वमा अनि नेपाली कांग्रेसका इन्द्रबहादुर बानियाँको नेतृत्वमा सरकार बनाउने सहमति भएको थियो। पाण्डेले सहमति कार्यान्वयन नगरेपछि केही दिनअघि मात्रै उक्त सहमतिको पत्र सार्वजनिक भएको थियो।
२०७८ साल कात्तिक ७ गते तीन दलबीच सहमति भएको हो। सहमतिमा सत्तागठबन्धनका तर्फबाट मुख्यमन्त्री पाण्डे, कांग्रेस बागमती अध्यक्ष इन्द्रबहादुर बानियाँ र नेकपा माओवादी केन्द्रका नेता सालिकराम जमरकट्टेलको हस्ताक्षर छ।
सोही सहमतिका आधारमा २०७८ साल कात्तिक ११ गते एकीकृत समाजवादीका पाण्डे मुख्यमन्त्री बनेका थिए। त्यसपछिको दोस्रो आधा अवधि कांग्रेसका बानियाँ मुख्यमन्त्री हुने सहमति थियो।
मंसिरमा सरकारले प्रदेश र संघको निर्वाचनको तयारी थालेको छ। झण्डै नौ महिना मुख्यमन्त्री बनिसकेका पाण्डेलाई सहमति कार्यान्वयनका लागि बानियाँका तर्फबाट आन्तरिक दबाब दिन हस्ताक्षर संकलन सुरु गरिएको हो।
तर, सत्ता गठबन्धनका शीर्ष नेताहरूले प्रदेशको नेतृत्व हेरफेरमा छलफल नै नगरेपछि उक्त सहमति अलपत्र परेको हो। बागमतीको मुख्यमन्त्रीमा सहमतिअनुसार कांग्रेसले पाएमा सुदूरपश्चिम एकीकृत समाजवादीले दाबी गर्ने तयारी गरेको छ।
तत्कालीन समयमा पाण्डेलाई मुख्यमन्त्री बनाउन माओवादीका २३, नेपाली कांग्रेसका २२, एकीकृत समाजवादीका १३ र जसपाको एकसहित ५९ सांसदको समर्थन रहेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
