काठमाडौं- राष्ट्रपति विद्यादेवी भण्डारीले महाभियोग पछि निलम्वनमा रहेका प्रधानन्यायाधीश चोलेन्द्र शमशेर राणाका विषयमा प्रधानमन्त्री शेरबहादुर देउवासँग चासो राखेकी छन्।
मंगलबार साँझ राष्ट्रपतिसँगको भेटवार्ताका लागि शीतलनिवास पुगेका प्रधानमन्त्री देउवासँग उनले राणामाथिको महाभियोगबारे चासो राखेकी हुन्।
करिब दुई घन्टा भएको छलफलम राष्ट्रपति भण्डारीले महाभियोगको प्रसंग निकाल्दै किन अलपत्र हो भनि प्रश्न गरेको स्रोतको भनाइ छ।
नियमित भेटका लागि शीतलनिवास पुगेका प्रधानमन्त्री देउवालाई फागुन १ गते महाभियोग लागेर निलम्वनमा रहेका राणाको प्रक्रिया संसदमा कहिले अघि बढ्छ भनि उनले प्रश्न गरेकी थिइन्।
संसदमा पेस भएको महाभियोगको प्रस्तावलाई छिटो निकास दिनुपर्ने राष्ट्रपतिको भनाइ थियो। प्रधानमन्त्री देउवाले यो संसदमा विचाराधीन रहेको र छानबिनका लागि समिति गठन गरेकोसम्मको जानकारी आफूलाई भएको बिफिङ त्यसक्रममा गरेका थिए।
प्रधानमन्त्रीको उक्त जवाफपछि राष्ट्रपति भण्डारीले महाभियोग प्रस्ताव दर्ता गरेपछि संसदिय प्रक्रियामै नलैजाने भन्ने कार्य लोकतान्त्रिक नहुने भएकाले लामो समय रोक्नु उपयुक्त नहुने बताएको स्रोतको भनाइ छ।
राष्ट्रपतिको भनाइ पछि प्रधानमन्त्री देउवाले संसदीय प्रक्रियाबारे बुझ्ने र मन्त्री तथा समामुखसँग छलफल गर्ने जवाफ दिएका थिए।
एसपीपी, बाढी पहिरो ,काठमाडौंको हैजादेखि आगामी निर्वाचनको मितिसम्मको विषयमा दुई जनाबीच कुराकानी भएको थियो। भेटमा राष्ट्रपतिले समसायमिक विषयका साथै चोलेन्द्र र एसपीपीका विषयमा धेरै चासो राखेकी थिइन्।
पछिल्लो समय प्रमुख प्रतिपक्ष नेकपा एमाले संसद बैठकमा राणाको कुरा उठाउँदै आएको छ। एमालेका नेता खगराज अधिकारी र लालबाबु पण्डितले केही दिन अघि प्रतिनिधि सभा बैठकमा राणा विरुद्धको महाभियोग किन रोकिएको हो भनि जवाफ माग गरेका थिए।
उनीहरुको प्रश्नमा सभामुखले ध्यान नदिएपछि सुनुवाइ हुन सकेको छैन। सहकर्मीको ४० दिन लामो आन्दोलन र नेपाल बार एसोसिएसनको सय दिन लामो आन्दोलनपछि सत्तारुढ दलका ९८ सांसदहरुले फागुन १ गते राणाविरुद्ध महाभियोग दर्ता गरेका थिए।
राणाविरुद्ध न्यायीक विचलनमा परेर न्याय सम्पादन गरेको, आफन्तबाट विचौलिया गराएको, भ्रष्टाचार गरेको र न्यायलयको शुद्धीकरणमा भूमिका नखेलेको आरोप महाभियोगमा लगाइएको छ।
राणा महाभियोग लागेर निलम्वनमा रहेपछि सरकारी निवास बालुवाटारमा बस्दै आएका छन्। राणाको कार्यकाल करिब ३ महिना बाँकी नै रहेको छ।
संसदबाट महाभियोग पारित नभए केही समय राणा सर्वोच्चको नेतृत्वमा फर्कन पाउनेछन्। यही कुरा बुझेर सत्ता पक्षले उक्त महाभियोगको प्रस्तावलाई अघि बढाएको छैन। राणाविरुद्ध महाभियोग पारित गराउनका लागि प्रमुख प्रतिपक्ष दल नेकपा एमालेको मत अनिवार्य भएको र एमाले राणाकै पक्षमा उभिएकाले उक्त महाभियोग सत्ता पक्षले रोकेको देखिन्छ।
राणाको महाभियोग टुङ्गो नलाग्दा सर्वोच्च अदालत कामुको भरमा चलिरहेको छ। वरिष्ठ न्यायाधीश दिपकुमार कार्कीले अहिले कायममुकाय प्रधानन्यायाधीशको रुपमा जिम्मेवारी सम्हालिरहेका छन्। उनले यही असोजमा अनिवार्य अवकाश पाउँदै छन्। राणाको महभियोग पारित भएमा सर्वोच्चको नयाँ नेतृत्वमा हरिकृष्ण कार्की आउने छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788243684.jpg)
_hy6IYH2vIF-1751945573.jpg)
-1786602170.png)
-1786513116.png)
