काठमाडौं- वामदेव गौतमले नयाँ पार्टी घोषणा गरेका छन्। मंगलबार उनले नेपाल कम्युनिस्ट पार्टी एकता राष्ट्रिय अभियान नामक पार्टी घोषणा गरेका हुन्। पार्टी भने असार ११ मै जन्माएको भनिएको छ।
पार्टीको सबैभन्दा महत्त्वपूर्ण र मुख्य कार्यभार विघटन भएको नेपाल कम्युनिस्ट पार्टी (नेकपा)लाई फेरि पुनर्गठित गर्नु भएको बताइएको छ। आगामी चुनावअघि एमाले, माओवादी केन्द्र र एकीकृत समाजवादी एकीकृत हुन नसकेको अवस्थामा कार्यगत एकतामा आउने वातावरण सिर्जना गर्ने उद्देश्य राखिएको छ।
नेकपा पुनर्गठन वा कार्यगत एकता नभए आफूले अगाडि सारेका विचारलाई सम्मान गर्ने पार्टीमा एकीकरण हुने भनिएको छ। 'उपरोक्त मध्ये कुने अवस्था सृजना भएन भने हामीले नेकपा एकता राष्ट्रिय अभियानलाई छुट्टै कम्युनिस्ट पार्टीका रुपमा अगाडि बढाउने छौँ', विज्ञप्तिमा भनिएको छ।
पार्टीमा केन्द्रीय कमिटी ७५ सदस्य हुने प्रेस विज्ञप्तिमा जनाइएको छ। 'दैनिक पार्टी सञ्चालनका लागि स्थायी कमिटी निर्माण हुनेछ। त्यसमा १५ जना नबढ्ने गरी सदस्यहरु रहनेछन्। यो पार्टी बहुपदीय प्रणालीमा जानेछ', विज्ञप्तिमा भनिएको छ।
पार्टीमा एक अध्यक्ष, प्रत्येक प्रदेशमा इन्चार्जको जिम्मेवारी बहन गर्ने गरी सात उपाध्यक्ष, संगठनात्मक कामको मुख्य जिम्मेवारी पूरा गर्नेगरी एक महासचिव, एक उपमहासचिव, एक कोषाध्यक्ष र एक सचिव रहने छन्।
एकीकरणको भूमिका निर्वाह गर्दासम्म पार्टीको सम्पूर्ण ढाँचा समन्वय समितिका रुपमा रहने विज्ञप्तिमा उल्लेख छ। समन्वय समितिका रुपमा रहँदासम्म केन्द्रीय सचिवालयमा आठ जना रहने भनिएको छ। जसमा संयोजक वामदेव गौतम, सचिव डीबी कार्की हुनेछन्। सदस्यहरु ओम शर्मा चालिसे, डिल्लीराज भट्टराई, दुर्गा भण्डारी, निमकान्त पाण्डे, भवगति विष्ट र युवराज सफल रहने छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
