काठमाडौं– सत्ता गठबन्धनको दल नेकपा माओवादी केन्द्रका केन्द्रीय सदस्य दीनानाथ शर्माले सरकारबाट मन्त्री फिर्ता गर्ने नेकपा एकीकृत समाजवादीको निर्णय अपरिपक्व भएको टिप्पणी गरेका छन्।
मंगलवार काठमाडौंमा भएको एक कार्यक्रममा बोल्दै केन्द्रीय सदस्य शर्माले मन्त्रीहरुलाई निश्चित अवधि काम गर्न समय दिनुपर्ने बताए। ४/५ महिनामा कुनैपनि मन्त्रीले कामको परिणाम दिन नसक्ने भएकाले एउटा निश्चित अवधि काम गर्न पाउने अधिकार मन्त्रीलाई दिनुपर्ने शर्माको भनाइ छ।
३/४ महिनामा पालो पुर्याउनका लागि मात्रै मन्त्री बनाउने काम नगरी देश र जनताको विकासका लागि काम गर्न आवश्यक रहेको मन्त्री शर्माले टिप्पणी गरे। यस किसिमका पालो पुर्याउनका लागि मात्रै मन्त्री बनाउने संस्कृतिलाई प्रोत्साहित गर्न नहुने उनको तर्क छ।
‘छिटोछिटो मन्त्री फेर्नु त्यति राम्रो होइन। जनताले त्यसलाई राम्रो मानेका छैनन्। मन्त्री ३/६ महिनामा पालो पुर्याएर चलाउने पद्धतिलाई प्रोत्साहन गर्नु हुँदैन। यसलाई निरुत्साहित गर्नुपर्छ। उसलाई राम्रोसँग एउटा कार्यकाल चलाउन दिनुपर्छ। ७ महिनामा कुनै मन्त्रीले केही परिणाम दिन सक्दैन। यसले देशको विकास गर्दैन,’ शर्माले भने।
आफ्नो पार्टी (माओवादी केन्द्र) मा भने मन्त्री हेरफेरसम्बन्धी कुनै छलफल नभएको शर्माको भनाइ छ। ‘हाम्रो पार्टीले अहिले हामीले पठाएका मन्त्रीहरु फेर्ने कुरा गरेका छैनौँ। हाम्रो त्यसबारेमा छलफलको एजेण्डा नै बनेको छैन,’ शर्माले भने, ‘मन्त्रीलाई छिटो फिर्ता गर्नुले गलत परम्पराको विकास हुन्छ। हामीले के पाउने, के नपाउने भन्दापनि राज्यसत्ता कसरी सञ्चालन गर्ने भन्ने हिसाबले परिपक्व निर्णय आगामी दिनमा गर्न आवश्यक छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788264467.png)
-1786602170.png)
-1786513116.png)
