धनगढी– स्थानीय तहको निर्वाचनमा अन्तरघात गरेर पार्टीका उम्मेदवारलाई हराउन भूमिका खेलेको भन्दै नेकपा एमाले कैलाली जिल्ला कमिटीका अध्यक्ष रतन थापालाई पदबाट हटाइएको छ।
एमालेको सुदूरपश्चिम प्रदेश कमिटीले अध्यक्ष थापालाई अनुशासनको कारबाही गर्दै पदबाट हटाउने निर्णय गरेको हो। स्थानीय तहको निर्वाचनमा जिल्लामा आफ्नै पार्टीका उम्मेदवारलाई पराजित गराउन सक्रिय रहेको भन्दै उनलाई अध्यक्ष पदबाट हटाउने निर्णय गरिएको हो। उनको पार्टी सदस्यता भने कायमै राखिएको छ।
‘प्राप्त भएका सिफारिस, प्रमाण तथा दस्तावेजहरुलाई मध्यनजर गर्दा कैलाली जिल्ला कमिटीका अध्यक्ष रतन थापाले पार्टीको विधानको धारा ८० को १, २, ३, ४, ५, ६, १२ र १३ बमोजिमको गम्भीर प्रकृतिको अनुशासनको उल्लंघन गरेको बैठकले ठहर गरको छ,’ प्रदेश सचिव धर्मराज पाठकले भने।
पार्टीका कैलाली जिल्ला इन्चार्ज नारदमुनी रानाले प्रदेश कमिटीमा गरेको अनुशासनको कारबाहीको सिफारिस तथा प्रदेश कमिटीमा सिफारिस साथ प्राप्त भएका तथ्य, प्रमाण तथा दस्तावेजहरुको अध्ययन तथा प्राप्त भएका सिफारिसहरुलाई ध्यानमा राखी सो निर्णय गरेको बताइएको छ।
‘पार्टीको जिल्ला अध्यक्ष जस्तो जिम्मेवार व्यक्तिबाट गम्भिर प्रकृतिको अनुशासनको उल्लंघन भएको तथा कारबाहीको लागि जिल्ला पार्टीको सचिवालयको बैठकको निर्णय, जिल्ला इन्चार्जको सिफारिस, सम्बन्धित भूगोलका केन्द्रीय सदस्यहरुको राय समेतको आधारमा पार्टी विधानको धारा ८१ बमोजिम निजलाई कैलाली जिल्ला कमिटीको अध्यक्ष पदबाट निस्काशसन गर्ने निर्णय गरिएको छ,’ उनले भने।
अध्यक्षबाट थापालाई हटाइएपछि बहालवाला उपाध्याक्षलाई कार्यवाहक जिल्ला अध्यक्षको जिम्मेवारी दिने निर्णय गरेको उनले बताए।
‘रिक्त रहेको पदमा पार्टी विधानको धारा ६८ को २ बमोजिम बहालवाला उपाध्यक्षलाई कार्यबाहक जिल्ला अध्यक्षको जिम्मेवारी दिएर पार्टी कामलाई अगाडि बढाउन कैलाली जिल्ला कमिटीलाई निर्देशन गर्ने निर्णय गरिएको छ,’ उनले भने।
प्रदेश सचिव पाठकका अनुसार साउन १५ गतेभित्र जिल्ला अधिवेशन प्रतिनिधि परिषद्को बैठक आयोजना गरि जिल्ला अध्यक्ष चयन गरिने छ।
‘जिल्ला कमिटीको अध्यक्ष चयन गर्नका लागि मिति २०७९ साल साउन १५ गते भित्र जिल्ला अधिवेशन प्रतिनिधि परिषद्को बैठकको आयोजना गरि पार्टी विधान बमोजिम अध्यक्ष चयन गर्न जिल्ला कमिटी कैलालीलाई निर्देशन गर्ने निर्णय गरिएको छ,’ उनले भने।
बैठकमा प्रदेश अध्यक्ष दामोदर भण्डारी, प्रदेश इन्चार्ज तथा केन्द्रीय सचिव लेखराज भट्ट, कैलाली जिल्ला इन्चार्ज नारदमुनी राना, प्रदेश कमिटी पदाधिकारी लगायत उपस्थित थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779634726.png)
-1764146706.png)
-1779545841.jpg)
