काठमाडौं–संस्कृति, पर्यटन तथा नागरिक उड्डयनमन्त्री जीवनराम श्रेष्ठले सोमबार पदभार सम्हाल्दै गर्दा दुई वटा महत्वपूर्ण निर्णय गरे। कोभिड–१९ को महामारीले थला पारेको पर्यटन क्षेत्रलाई उकास्ने कार्ययोजना ल्याउने र हनुमानढोकादेखि स्वयम्भुसम्मको सांस्कृतिकसम्पदा पदमार्ग निर्माण गर्ने कामलाई प्राथमिकतामा राख्ने निर्णय गरे।
उनको पहिलो निर्णयमा स्वयम्भु जोडिनुको पनि संयोग रहेको छ। उनी २०२२ मंसिर १५ गते स्वयम्भुमा जन्मिएका हुन्। यही क्षेत्रबाट उनी वडाध्यक्ष भए र संघीय सांसद पनि।
उनी लामो समय खेलकुदको कार्यकारी पदमा रहे। तर खेलकूद क्षेत्रमा प्रवेश भने राजनीतिले नै सहज बनाएको थियो।
२०४२ मा तत्कालीन नेकपा(माले) को वडा सचिवबाट राजनीतिमा प्रवेश गरेका उनले तत्कालीन एमालेका विभिन्न कमिटीमा रहेर काम गरेका थिए। एमालेको भातृसंगठन युवा संघको उपाध्यक्ष पनि भए उनी।
त्यस्तै, नगर कमिटी, जिल्ला कमिटी हुँदै एमालेको आठौं र नवौं महाधिवेशनबाट केन्द्रीय कमिटीमा रहेर आफ्नो राजनीतिलाई अघि बढाएका थिए। २०७८ मा एमाले विभाजन हुँदा उनी माधवकुमार नेपाल नेतृत्वको एकीकृत समाजवादीतर्फ लागे। उनी अहिले उक्त पार्टीका केन्द्रीय सचिव तथा संसदीय दलका सचेतक छन्।
उनी २०४९ सालको स्थानीय निकाय निर्वाचनमा काठमाडौं महानगरपालिका वडा नम्बर १५ बाट वडाध्यक्ष पदमा समेत निर्वाचित भएर स्थानीय सरकारको नेतृत्व गरेका थिए।
उनकोे खेलकुद क्षेत्रको कार्यकारी पदमा प्रवेश भने २०५३ बाट भएको हो। श्रेष्ठले तत्कालीन खेलकुदमन्त्री विष्णु पौडेलको पालामा राष्ट्रिय खेलकुद परिषद्को सदस्य–सचिवको नियुक्ति पाएका थिए। २०६३ सम्म उनी उक्त पदमा रहे। उनको उक्त कार्यकालमा नेपालले खेलकुद क्षेत्रमा केही महत्वपूर्ण उपलब्धि हासिल गरेको थियो।
श्रेष्ठ २०७६ बाट नेपाल ओलम्पिक कमिटीका अध्यक्षका रुपमा छन्। यसअघि ओलम्पिक कमिटीको दुई कार्यकाल महासचिवको रुपमा काम गरिसकेका छन्।
सक्रिय राजनीति र खेलकुद क्षेत्रलाई सँगसँगै अघि बढाएका श्रेष्ठ २०७४ को प्रतिनिधिसभा निर्वाचनमा नेकपा एमालेका तर्फबाट काठमाडौं क्षेत्र नम्बर ८ बाट निर्वाचित भएर संघीय संसदमा प्रवेश गरेका थिए। पार्टी राजनीति र खेलकुदसँगै उनी स्वास्थ्य क्षेत्रमा पनि संलग्न छन्। उनी हाल हाल सामुदायिक स्वास्थ्य सेवा परिषदको संरक्षकका रुपमा छन्।
श्रेष्ठकै गृहवडाका रुपमा रहेको १५ नम्बरबाट अहिले स्थानीय निर्वाचनमा एकीकृत समाजवादीले वडाध्यक्षमा जित हासिल गरेको छ।
उनी २०७४ मा काठमाडौं–८ बाट नेपाली कांग्रेसका उम्मेदवार नवीन्द्रराज जोशीलाई पराजित गर्दै प्रत्यक्षमा निर्वाचित भए। २०७० सालको संविधानसभा निर्वाचनमा भने उनी जोशीबाट यही क्षेत्रमा पराजित भएका थिए। उक्त निर्वाचन क्षेत्रमा गठबन्धनका तर्फबाट श्रेष्ठको दाबी बलियो रहनेछ, किनभने उक्त क्षेत्रका नेपाली कांग्रेसका प्रभावशाली नेता जोशीको निधन भइसकेको छ।
यद्यपि पार्टी फुटको चुनौती भने उनीसामु छँदैछ।
पदबहाली गर्दा पर्यटनलाई उकास्ने र पदमार्ग निर्माणलाई प्राथमिकता दिने भनेर घोषणा गरेका श्रेष्ठ काममा कतिको खरो उत्रिन सक्छन्, त्यसले उनलाई अर्को पटकको सिंहदरबार यात्रा टुंगो लगाउन सहयोग पुर्याउन सक्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_aDpltwY0rK-1782355389.webp)
-1764146706.png)
