काठमाडौं– नेकपा एमालेका सांसद खगराज अधिकारीले निलम्बनमा रहेका प्रधानन्यायाधीश चोलेन्द्र शमशेर राणाविरुद्धको महाभियोग तत्काल समितिमा पठाएर छानबिन सुरु गर्न माग गरे।
प्रतिनिधि सभामा समय लिएर बोल्दै उनले आजै महाअभियोगलाई समितिमा पठाउन माग गरे। उनले अहिले प्रधानन्यायाधीश सिंहदरबारको एउटा र सर्वोच्च अदालतको अर्को भएको जनगुनासो आइरहेको दाबी गरे।
महाअभियोगको प्रस्ताव समितिमा नलैजानु प्रतिनीधि सभाको असक्षमता र संविधान विपरीत हुने भन्दै उनले यसको साक्षी प्रतिनिधिसभा हुन नहुने बताए।
‘आजै समितिमा लगैर छानबिन र सुनुवाइ होस्,’ उनले माग गरे, ‘अन्यथा संविधानको चरम दुरुपयोग भएको ठहर हुनेछ।’ राणाविरुद्ध फागुन १ गते महाभियोग दर्ता भएको थियो।
सत्ता पक्षका ९८ सांसदहरुले हस्ताक्षर गर्दै दर्ता भएको प्रतिनिधि सभाले फागुन १२ गते घोषणा गरेको थियो। तर, उक्त समितिको काम अघि बढेको छैन।
पछिल्ला बैठकहरुमा एमालेले लगातार यो मुद्दा उठाइरहेको छ। महाअभियोग प्रस्ताव दर्ता हुनेबित्तिकै राणा निलम्बनमा परेका थिए। उनीविरुद्ध सर्वोच्च अदालतकै न्यायाधीशहरु र काननु व्यवसायीहरुले आन्दोलन गरेका थिए।
सहकर्मी न्यायाधीशहरुले ४० दिन र नेपाल बार एशोसियसनले १०० दिनभन्दा लामो आन्दोलन गरेको थियो। महाभियोग दर्ता भएर निलम्बनमा रहे पनि उनी बालुवाारस्थित सरकारी निवासमा बसिरहेका छन्। हाल सर्वोच्चमा दीपककुमार कार्की कामु प्रधानन्यायाधीशको रुपमा रहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
