काठमाडौं– नेकपा माओवादी केन्द्रकी सांसद रेखा शर्माले आगामी निर्वाचनमा प्रत्यक्षतर्फ महिलाको उम्मेदवारी कम्तिमा ३३ प्रतिशत पुर्याइनुपर्ने बताइन्।
प्रतिनिधि सभाको आइतबारको बैठकको विशेष समयमा बोल्दै उनले प्रतिनिधि र प्रदेश सभा निर्वाचनमा त्यसका लागि कानुनी वा अन्य व्यवस्था गर्न राजनीतिक दलका नेता र सरकारलाई आग्रह गरिन्।
‘यस निर्वाचन प्रणालीको तत्काल विकल्प हामीसँग छैन। विगतका निर्वाचनका अनुभव हेर्दा हामीले देख्यौं, दलहरुले प्रत्यक्षतर्फ महिलाहरुको उम्मेदवारी पर्याप्त मात्रामा दिन नसक्दा स्थिति कस्तो बन्यो भने, हाम्रो जुन मिश्रित निर्वाचन प्रणाली छ, समावेशी निर्वाचन प्रणाली छ, समानुपातिक निर्वाचन प्रणाली भनेको महिलाको निम्ति हो र प्रत्यक्ष निर्वाचन प्रणाली भनेको पुरुषका निम्ति हो भन्ने सन्देश गएको छ। त्यो आफैंमा बेठीक हो’, उनले भनिन्।
शर्माले समानुपातिकतर्फबाट पुरुषहरु पनि आउनसक्ने, प्रत्यक्षतर्फबाट महिला पनि आउनसक्ने व्यवस्था हुनु जरुरी रहेको बताइन्। प्रदेश र संघीय निर्वाचन ऐन बनाइरहँदा त्यहाँ सबै दलका महिला सांसदहरुले संशोधन हालेको भए पनि अत्यन्तै हतारमा कानुन बनाइकाले संशोधनलाई ऐनमा समेट्न नसकिएको बताइन्।
‘जसरी समानुपातिकतर्फ ५० प्रतिशत महिला हुनुपर्ने व्यवस्था छ, त्यसैगरी प्रत्यक्षतर्फ पनि कुनै बाध्यात्मक कानुनी व्यवस्था नभएको हुनाले दलहरुलाई महिलाको उम्मेदवारी यति प्रतिशत दिनुपर्ने कुनै बाध्यात्मक व्यवस्था छैन,’ उनले भनिन्, ‘प्रत्यक्षतर्फ महिलाहरूको सिट घटिरहँदा, उम्मेदवारी घटिरहँदा जसरी हामीले मिश्रित निर्वाचन प्रणालीलाई समानुपातिक निर्वाचन प्रणाली भनिरहेका छौं, यसको मर्म पूरा हुन सकेको छैन।’
शर्माले अहिलेको निर्वाचन प्रणाली अनुसार निष्ठाको राजनीति गर्ने राजनीतिज्ञ, महिला, दलित लगायतका उत्पीडित समुदायका मान्छेहरु चुनाव लड्न नसक्ने स्थिति बनेको बताइन्।
उनीहरुले निर्वाचनदेखि डराउनुपर्ने अवस्था सिर्जना भएको उनको भनाइ छ। ‘तर पनि यसैपटक र अहिल्यै निर्वाचन प्रणालीको विकल्प खोजिहाल्ने स्थितिमा हामी छैनौं। यस स्थितिमा छलफल र बहस गर्दै जानुपर्ने अवस्था छ’, उनले भनिन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788253593.png)
-1786602170.png)
-1786513116.png)
