काठमाडौं– सरकारमा रहेका मन्त्री फिर्ता बोलाउने विषयमा नेकपा एकीकृत समाजवादीमा विवाद देखिएपछि नेकपा एमालेका नेता योगेश भट्टराईले पार्टी विभाजन पूर्वको अवस्था 'स्मरण' गराएका छन्।
तत्कालीन नेकपा विभाजित भएर नेकपा एमाले र नेकपा माओवादी केन्द्र ब्यूँतिएपछि एमालेमा आन्तरिक संघर्ष चलिरहेका बेला माधव कुमार नेपालको साथमा रहेका भट्टराईले पार्टी विभाजनको पक्षमा रहेका 'खेलाडी'लाई आफूहरुले त्यतिबेलै चिनेको पनि उल्लेख गरेका छन्।
'एकीकृत समाजबादी पार्टीको अहिलेको अवस्था देख्दा उबेला मैले पार्टी विभाजन नगर्न कमरेड माधवकुमार नेपाललाई गरेको अनुनय, विनय र एमाले विभाजनको औचित्य छैन भनी दिएको तर्क अनि नेपालको कम्युनिस्ट आन्दोलनलाई तहसनहस पार्ने षड्यन्त्रको सिकार नबन्न गरेको अनुरोध र केही भन्दा पनि उहाँले नमानेपछि कुनैदिन परिस्थिती तपाईंको काबुभन्दा बाहिर जाने छ भनेर उहाँबाट छुट्टिएको पलको स्मरण भईरहेको छ,' भट्टराईले सामाजिक सञ्जालमा लेखेका छन्।
आफूहरुले त्यतिबेला नै चिनेका खेलाडीहरु माधव नेपाल र झलनाथ खनालले विस्तारै चिन्दै जानेपनि भट्टराईको भनाइ छ। 'हेर्दै जाउँ हामीले त्यतिबेला नै चिनेका खेलाडीहरु कमरेड माधव नेपाल र कमरेड झलनाथ खनालले बिस्तारै चिन्दै जानुहुनेछ। आत्मबोध र पश्चाताप: सिर्फ कहिले?' भट्टराईले भनेका छन्।
नेकपा एकीकृत समाजवादीका १० जना सांसदहरुले मन्त्रीहरु फेर्ने पार्टी निर्णय नमान्ने भन्दै गरेको 'विद्रोह'प्रति लक्षित गर्दै भट्टराईले सामाजिक सञ्जालमा उक्त टिप्पणी गरेका हुन्।
नेकपा एकीकृत समाजवादीबाट सरकारमा रहेका स्वास्थ्य तथा जनसंख्या मन्त्री विरोध खतिवडा, शहरी विकासमन्त्री रामकुमार झाँक्री, संस्कृति, पर्यटन तथा नागरिक उड्डयन्त्री प्रेम आले, श्रम, रोजगार तथा सामाजिक सुरक्षामन्त्री कृष्ण कुमार श्रेष्ठ तथा सांसद्हरु कृष्णलाल महर्जन, गोपाल बहादुर बम, बिनादेवी बुढाथोकी, पुष्पा कुमारी कर्ण कायस्थ, धन बहादुर बुढा र निरा जैरुले मन्त्री फेर्ने निर्णयप्रति असहमति जनाएका छन्।
यसअघि पार्टीको केन्द्रीय सचिवालयको बैठकले गरेको निर्णय नमान्ने भन्दै उनीहरुले मन्त्री फिर्ताबारे छलफल गर्न संसदीय दलको बैठक बोलाउन अध्यक्ष माधव कुमार नेपाललाई ध्यानाकर्षण पत्र बुझाएका छन्।
१० जना सांसद्हरुले सरकारमा रहेका पार्टीका नेता (मन्त्री)हरुलाई अपराधीको जस्तो व्यवहार गरिएको भन्दै असन्तुष्टि समेत पोखेका छन्।
'पूर्व जानकारी पाउँदा स्वाभाविक प्रक्रियाबाट मन्त्री पदबाट राजीनामा गरेर आउछौं भनेर नेतृत्वलाई मन्त्रीहरुले दिएको विश्वासमा ठेस पुर्याउने र पटक पटक अपराधीलाई जस्तो व्यवहार गरियो, यस्तो व्यवहार कदापि ठिक मान्न सकिँदैन,' ध्यानाकर्षण पत्रमा भनिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
