काठमाडौं– नेकपा एकीकृत समाजवादीका 'सम्मानित नेता' गठबन्धनले आफ्नो पार्टीको अपमान गरेको बताएका छन्।
समाजवादी प्रेस संगठन नेपाल, जिल्ला शाखा काठमाडौंले बुधबार आयोजना गरेको कार्यक्रमलाई सम्बोधन गर्दै नेता खनालले गठबन्धनकै कारण आफ्नो पार्टीले ल्याउने जति सिट र मत प्राप्त गर्न नसकेको समेत बताए।
नेता खनालले अहिले ९ लाख मतदाताको पार्टीप्रति समर्थन रहेको भनेपनि त्यो संख्या झन्डै २० लाख रहेको दाबी गरे। अहिलेको स्थानीय तह निर्वाचनमा प्राप्त गरेको उपलब्धिलाई रक्षा गर्दै देशको हितको लागि नमूना काम गर्नुपर्ने खनालको भनाइ छ।
'अहिले हामीले ९ लाख मतदाता छन् हाम्रा भन्छौँ, ९ होइन २० लाखभन्दा बढी मत छ हाम्रो। त्यो २० लाख मत हामीले संकलन गर्न सकेनौँ। यसमा हाम्रा पनि केही त्रुटी कमजोरीहरु रहे,' खनालले भने, 'र त्यो गठबन्धन भन्ने जुन छ, त्यसले हामीलाई त बहुत अपमान गर्यो। त्यो अपमानपूर्ण ढंगले व्यवहार गरिएको हुनाले हामीले प्राप्त गर्नुपर्ने जति मत पनि प्राप्त गर्न सकेनौँ। त्यति सिट पनि प्राप्त गर्न सकेनौँ।'
नेता खनालले रुस र युक्रेनको युद्धका कारण देखाउँदै सरकरले पेट्रोलियम पदार्थमा गरेको मूल्यवृद्धिको विरुद्धमा आफ्नो पार्टी रहेको पनि बताए। उनले नेकपा एकीकृत समाजावादी मूल्यवृद्धिको पक्षमा नरहेको भन्दै सरकारले अविलम्ब मूल्यवृद्धिका बारेमा हेरफेर गर्नुपर्ने बताए।
नेता खनालले नेपालको सीमा अंकित गर्ने कुरामा आवाज उठाउनुपर्ने आवश्यक्ता रहेको पनि बताए। फोहोरको समस्या समाधानका लागि अविलम्ब आवाज उठाउनुपर्ने र आम जनताले निर्वाचन लड्नसक्ने अवस्था बनाउन आवश्यक रहेको पनि खनालको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
