काठमाडौं- सत्ता गठबन्धनमा आबद्ध शीर्ष नेताको बैठक जारी छ। प्रधानमन्त्री निवास बालुवाटारमा बैठक बसिरहेको हो।
बैठकमा प्रधानमन्त्री तथा कांग्रेस सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल प्रचण्ड, नेकपा एकीकृत समाजवादीका अध्यक्ष माधवकुमार नेपाल र जनता समाजवादी पार्टीका अध्यक्ष उपेन्द्र यादव लगायत सहभागी छन्।
नेकपा माओवादी केन्द्रका अध्यक्ष पुष्पकमल दाहाल प्रचण्डले बैठकमा सहभागी हुनुअघि आफूले कर्मचारीका विषय उठाउने बताएका थिए। 'अहिले जुन मागको रुपमा यहाँ प्रस्तुत गरिएको छ। म एकछिनपछि गठबन्धनको बैठकमा जाँदैछु। म यो विषय राख्नेछु', नेपाल राष्ट्रिय कर्मचारी महासंघको केन्द्रीय समितिको बैठकलाई सम्बोधन गर्दै उनले भनेका थिए।
बैठकमा एसपीपीको विषय पनि उठ्ने आकलन गरिएको छ। शनिबार प्रचण्ड, नेपाल, यादव र नारायणकाजी श्रेष्ठले यस विषयमा छलफल गरेका थिए। 'यस सन्दर्भमा आज बिहान मात्रै नेकपा माओवादी केन्द्रका अध्यक्ष पुष्पकमल दाहाल प्रचण्ड, नारायणकाजी श्रेष्ठ र जसपा अध्यक्ष उपेन्द्र यादव सहित हामी बसेका थियौँ', युवा विशेष जिल्ला कमिटीको कार्यक्रममा सम्बोधन गर्दै शनिबार अध्यक्ष नेपालले भनेका थिए, 'यो प्रसंगदेखि अनेक प्रसंगमा कुरा हुँदाखेर प्रधानमन्त्रीसँग फेरि कुराकानी गरौँ। र यो राष्ट्रिय अन्यौललाई चिर्नका लागि हामीले छलफल गरेर सत्यतथ्य जनताका माझमा प्रस्तुत गरौँ भन्ने कुरा गरेका छौँ।'
गठबन्धनकै बैठकका कारण आइतबार अन्तर्राष्ट्रिय सम्बन्ध समितिको बैठकमा प्रधानमन्त्री देउवा सहभागी भएका थिएनन्। समितिको बैठकमा सहभागी अध्यक्ष नेपाल पनि आफ्नो अर्को मिटिङ छ भनेर बाहिरिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
