काठमाडौं– प्रधानमन्त्री शेरबहादुर देउवा संसद्को अन्तर्राष्ट्रिय सम्बन्ध समितिको बैठकमा अनुपस्थित भएपछि सांसदहरूले त्यसमा प्रश्न उठाएका छन्। उनीहरूले प्रधानमन्त्रीले संसदीय समितिको गरिमा कायम गर्न नसकेको बताए। भीम रावललगायतका सांसदहरूले विरोध जनाएका थिए।
त्यसपछि नेपाली कांग्रेसकी सांसद पुष्पा भुसालले त्यसको प्रतिवादन गरिन्। उनले 'कुतर्क' गरेर प्रधानमन्त्रीको चरित्र हत्या गरिएको भन्दै आपत्ति जनाइन्।
'विषयवस्तुभित्र छलफल भएन। व्यक्ति (प्रम)केन्द्रित भयो। यही विषयमा राजनीति गर्न थालियो। कुतर्क गरेर चरित्र हत्या गर्न खोजियो। कसैको राजनीतिक जीवनमाथि प्रश्न गर्ने काम भयो', भुसालले भनिन्, 'त्यसो गर्ने हो भने हामी पनि ३० /४० वर्ष पुराना खोजर ल्याउँछौं। निजी बहस बाहिर गरौं।'
त्यहीबीचमा एमाले सांसद रावलले भुसाललाई रोकेर जवाफ दिए। उनले प्रधानमन्त्री नआएको विषयमा छलफल गर्ने कुरा व्यक्तिकेन्द्रित र राजनीति नभएको रावलले बताए।
'प्रधानमन्त्री आउजे भनेपछि किन नआएको भन्न नपाइने? सेनापतिले यही समितिमा एसपीपी सन् २०१९ देखि आईपीएसमा जोडिने भन्ने प्रावधान हटाउन पत्र लेखेको बताउनुभयो। त्यही विषयमा प्रधानमन्त्रीबाट स्पष्टता खोजिएको हो। यो कसरी चरित्रहत्या भयो?', रावलले सोधे ।
समिति सभापति पवित्रा खरेलले पनि समितिमा उठेको विषय व्यक्तिगत नभएको बताइन्। उनले समितिले प्रधानमन्त्रीलाई बोलाएपनि नआएको उल्लेख गरिन्।
'विषयवस्तु बाहिर गएको छैन। प्रधानमन्त्री संसदीय समितिमा नआएको विषय सुरूमै उठेको हो। मैले जानकारी गराएँ। तपाईं (पुष्पा भुसाल)ले बोल्नुभयो। त्यही विषयमा कुरा भइरहेको हो', खरेलले भनिन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
