काठमाडौं- एमाले अध्यक्ष केपी शर्मा ओलीलाई भेट्न माओवादी केन्द्रका नेता नारायणकाजी श्रेष्ठ आइतबार साँझ बालकोट पुगे। त्यहाँ उनले करिब साढे दुई घण्टा बिताएका थिए। भेटमा राष्ट्रियता, वाम आन्दोलन, समसामयिक राजनीतिको विषयमा कुराकानी भएको श्रेष्ठले सार्वजनिक रुपमा बताएका छन्।
वाम एकताको चर्चा चलिरहेको बेलामा ओली-श्रेष्ठको यो भेटलाई अर्थपूर्ण रुपमा हेरिएको छ। जबकि, तत्कालीन नेकपामा ओली र श्रेष्ठ खासै निकट थिएनन्। ओलीकै कारण श्रेष्ठले एकपटक नेकपाको प्रवक्ताबाट समेत राजीनामा दिएका थिए। उनले निरन्तर पुष्पकमल दाहाल प्रचण्डलाई नै साथ दिने गरेका थिए।
अघिल्लो महिना सम्पन्न निर्वाचनमा देशका थुप्रै चर्चित पालिकामा कांग्रेस, माओवादी केन्द्र लगायतका दलहरुले गठबन्धन गरेर एमालेविरुद्ध प्रतिस्पर्धा गरेका थिए। परिणामतः एमालेले २०७४ सालको निर्वाचनको तुलनामा ८९ कम पालिकाको नेतृत्व जितेको छ। माओवादीले पालिकाको नेतृत्व बढाएको भए पनि लोकप्रिय मत भने घटाएको छ।
एमाले र माओवादी केन्द्र एकता हुँदाको शक्ति र सामर्थ्यको आकलन गरेर दुवै पार्टीका कतिपय नेताहरुले पुनः एकताको चर्चा गर्ने गरेका छन्। आफूहरु विभाजन हुँदा कांग्रेसलाई फाइदा पुगिरहेको उनीहरुको ठम्याइ छ। श्रेष्ठको बालकोट प्रवेशलाई यही सन्दर्भसँग जोडेर चर्चा भइरहेको हो।
दुई नेताबीचको भेटलाई माओवादी केन्द्रका नेता देव गुरुङले फरक रुपमा अर्थ्याउन जरुरी नरहेको बताएका छन्। सोमबार संसद् परिसरमा पत्रकारहरुसँग कुरा गर्दै उनले भनेका थिए, 'एमाले अध्यक्ष ओली र नेता नारायणकाजी बीचको भेटघाट एउटै सदनमा, एउटै प्रक्रियामा रहेपछि नहुने प्रश्नै भएन। राष्ट्रिय स्वाधिनताको प्रश्नमा जोसँग विचार मिल्छ हामी उहीसँग चुनावी तालमेल गरेर जान्छौं।'
उसै पनि ओलीले केही समयअघि ज्योतिषीको हवाला दिँदै असार १७ गते सत्ता गठबन्धनमा संकट आउने बताएका थिए। स्थानीय तहको निर्वाचनअघि उनले केही ठाउँमा यो विषयलाई चर्चा गरेका थिए। गत वैशाख २४ गते विराटनगरमा आयोजित एमाले सभामा उनले भनेका थिए- 'शेरबहादुरजी असाध्यै ज्योतिषमा विश्वास गर्नुहुन्छ। त्यसो भए आफ्नो ज्योतिषीलाई बोलाएर सोध्नुस् भनेर मैले जेठको महिना कस्तो छ, असारको महिना कस्तो छ, सोध्नुस्। मैले दिन तोकिएको छु एउटा, असार १७ गते कस्ता ग्रह, दशा, नक्षत्रहरु कहाँ छन्, एकपल्ट ज्योतिषिलाई बोलाएर हेर्न लगाउनुस् त।'
ओलीले सत्ता गठबन्धनमा संकट निम्तिने तर्कमा ज्योतिषी आड लिएको भए पनि धेरैले गठबन्धन तोड्न उनको तर्फबाट प्रयास भइरहेको र त्यसले चुनावपछि कुनै न कुनै आकार लिने निश्चितप्रायः भएको अर्थमा चर्चा गरेका थिए। पछिल्ला भेटघाटले कतै वाम गठबन्धनको गोप्य तर अन्तिम प्रयास भइरहेको हो कि भन्ने आकलन गराइराखेको छ।
यसअघि २०७४ सालमा भएको वाम गठबन्धनको घोषणा पनि अन्तिम समयमा मात्रै सार्वजनिक भएको थियो। त्यतिबेला पनि माओवादी केन्द्र शेरबहादुर देउवा नेतृत्वको सरकारमै थियो र प्रतिपक्षी दल एमालेसँग चुनावी गठबन्धनको लागि तयार भएको थियो। फेरि पनि सोही शैली अपनाइएला कि भन्ने चर्चा पनि छ।
एमालेका ओली निकट नेताहरु, जो माओवादी केन्द्रका नेताहरुसँग पनि भेट गरिरहेका छन्। उनीहरु नै वामगठबन्धनको सम्भावना स्वीकार गर्दैनन्। हालै पनि एमाले नेता प्रदीप ज्ञवाली र माओवादी नेता बर्षमान पुनबीच भेट भएको समाचार सार्वजनिक भएको थियो। ज्ञवालीले सोमबार सचिवालय बैठकपछि पत्रकारहरुसँग भेट भइरहेको तर वाम गठबन्धनको तत्काल सम्भावना नरहेको बताएका थिए। 'निर्वाचनअगाडि वामपन्थी ध्रुवीकरणको या वामपन्थी सहकार्यको तत्काल सम्भावना देखेको छैन', उनको भनाइ छ।
ज्ञवालीले अहिले भइरहेका भेटहरु वामपन्थी सहकार्यका निम्ति केन्द्रित नभएको बरु अरु कतिपय राष्ट्रिय राजनीतिका मुद्दासँग जोडिएको बताए। 'सबै दलसँग मुद्दागत लडाइँ हो। मुद्दामा आधारित भएर आलोचना वा समर्थन गर्छौँ। मुद्दामा एक ठाउँमा हुँदा कसैसँग पनि हामी नजिक हुन सक्छौँ', उनले भने, 'अहिले हामी मुलुकमा उपस्थित निश्चित मुद्दाहरुमा छलफल गरिरहेका छौँ। अहिले तत्काल वामपन्थी सहकार्य र गठबन्धनको सम्भावना देख्दैनौँ।'
सरकारका पछिल्ला गतिविधिहरुले मुलुकको असंलग्नताको नीति छाडेर अमेरिकामैत्री बन्ने खालको बन्दै गएकोमा एमालेले चिन्ता व्यक्त गर्दै आएको छ। माओवादी केन्द्रका पनि कतिपय नेताहरुले सरकारको आलोचना गरिरहेका छन्। स्पष्ट छ, चीनलाई अरुचि हुनेखालका वैदेशिक नीतिहरुलाई एमाले र माओवादी केन्द्र लगायतका कम्युनिस्ट शक्तिहरुले पनि रुचाउने गरेका छैनन्। पछिल्ला भेटको एउटा सन्दर्भ त्यो पनि रहेको ज्ञवालीको भनाइबाट बुझ्न सकिन्छ।
पछिल्लो भेट मात्रै होइन, केही दिनअघि माओवादी केन्द्रका अध्यक्ष प्रचण्ड र एकीकृत समाजवादीका अध्यक्ष माधवकुमार नेपाललाई एमालेतिर संकेत गर्दै प्रधानमन्त्रीको अफरसमेत आएको सार्वजनिक रुपमा बताएका थिए। एमालेले भने यसलाई कांग्रेससँगको बार्गेनिङ क्षमता बढाउने रणनीतिको रुपमा अर्थ्याएको छ। ओलीले गत शुक्रबार विराटनगरमा भनेका थिए- 'मलाई प्रधानमन्त्रीको अफर आयो, म मान्या छैन भनेको सुनिन्छ। आफैं प्रधानमन्त्रीको अफर आयो रे, कसले गर्छ? यो सबै बार्गेनिङ हो।'
ओलीको जस्तै भाषा सोमबार ज्ञवालीले पनि दोहोर्याए। अझ उनले त सयभन्दा माथि पनि कुनै प्रतिशत हुन्छ भने त्यसलाई पनि जोड्न भन्दै शत प्रतिशत गलत कुरा भएको बताए। नेकपा एमालेले अहिले कसैलाई प्रधानमन्त्री अफर नगर्ने उनको भनाइ छ। 'योचाहिँ नेपाली कांग्रेससँग बार्गेनिङ बढाउने, हामीलाई त यताबाट अफर आएको छ, तपाईं हामीलाई आउने चुनावमा ५० प्रतिशत सिट दिने कि नदिने? भन्ने एउटा बार्गेनिङ बढाउने सुनियोजित प्रचारबाजी मात्रै हो', उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
