काठमाडौं- प्रतिनिधि सभाको बुधबारको बैठकमा विनियोजन विधेयक, २०७९ को विभिन्न शीर्षकहरुमाथि छलफल थियो। चारवटा मन्त्रालय केन्द्रित छलफल हुने कार्यसूची थियो। त्यसकारण यो छलफलमा मन्त्रीहरुको संसदमा उपस्थित अनिवार्य हुन्छ।
बुधबार ११ बजेका लागि बैठक तोकिएको थियो। १५ मिनेट ढिलोगरी संसदको घन्टी बज्यो र त्यो झन्डै निकैबेरसम्म बजिरह्यो। लामो समय घन्टी बज्नुको कारण थियो- संसद्भित्र मन्त्रीहरु नदेखिनु। त्यहीबीच आइपुगे- उद्योग, वाणिज्य तथा आपूर्ति मन्त्री दिलेन्द्रप्रसाद बडू।
मन्त्री उपस्थित नहुँदा बैठक सुरु हुन नसकेकाले दिक्क भएका सांसद्हरुले मन्त्री बडूलाई ताली बजाएर स्वागत गरेको सांसद झपट रावल बताउँछन्। 'संसदीय इतिहासमा मन्त्री आउँदा ताली बजेको यो पहिलोपटक हुनुपर्छ', उनी भन्छन्।
ताली स्वागतार्थ नभई नेपाल सरकारका मन्त्रीहरुले संसदीय मर्यादाको ख्याल नगरेको व्यंग्य स्वरुप थियो। उनै मन्त्री बडू पनि लामो समय संसद् बैठकमा भने बसेनन्।
लामो समय घण्टी बजेको विषयलाई लिएर एमाले सांसद् विमला विकले रोष्ट्रममै पनि चर्चा गरिन्। 'सभामुख आउनुभन्दा अगाडि पाँच मिनेट घन्टी बज्नुपर्ने, आज झन्डै २५ मिनेट बज्यो। घडी बिग्रेको रहेछ कि जस्तो पनि लाग्यो हामीलाई। यसो बुझ्दा त मन्त्रीज्यू नआएर घण्टी बजिरहेको रहेछ', उनको व्यंग्यमिश्रित आलोचनामा उनले भनिन्, 'यस्तै हो संसदको गरिमा? म सरकारको ध्यानाकर्षण गर्न चाहन्छु।'
बुधबार आयोजित चार मन्त्रालयको बजेटमाथि छलफलको कार्यसूची थियो। विकले पनि उद्योग, वाणिज्य तथा आपूर्ति मन्त्रालय खर्च एक रुपैयाँ राख्न प्रस्ताव गर्न रोस्ट्रम पुगेकी थिइन्। तर उनले विभिन्न मन्त्रालयका नेतृत्व गरेका मन्त्रीको खोजी गरिन्। कारण थियो, सदनमा अनुपस्थिति।
'मैले आजको कार्यसूची पाएको छु। यहाँ आज कृषि तथा पशुपन्छी विकास मन्त्रालयको बारेमा छलफल हुन्छ। मैले कृषि मन्त्री चिनेको छु, तर यहाँ देख्दिनँ। उद्योग, वाणिज्य तथा आपूर्ति मन्त्रालयको बारेमा छलफल हुने सूची छ। मैले उद्योग मन्त्री पनि चिन्छु, तर यहाँ देख्दिनँ। संघीय मामिला मन्त्री पनि चिन्छु, तर देख्दिनँ। सञ्चार तथा सूचना मन्त्रीलाई पनि चिन्छु, तर देख्दिनँ। आफ्नो मन्त्रालयको बारेमा छलफल भइरहँदा, सांसद्हरुले मन्त्रालयको बजेटको बारेमा कुरा गरिरहँदा मन्त्रीहरु आउनुपर्दैन? संसद्प्रति मन्त्रीहरुको उत्तरदायित्व हुन्छ कि हुँदैन? यसतर्फ सभामुखज्यूले रुलिङ गर्दा राम्रो हुन्छ', उनले भनिन्।
मन्त्रीको अनुपस्थितिलाई लिएर एमालेकै अर्का सांसद् विजय सुब्बाले पनि व्यंग्य गरे। 'पहिले पहिले हामीले मन्त्रीहरु खोज्दा 'आज संसद् छ, संसद्मा जानुपर्छ, भेट हुन सक्दैन' भन्थे, पहिलाका मन्त्रीहरु। आजभोलिका मन्त्रीहरु संसद्मा आउँदैनन्', उनले भने, 'त्यसै त संसद्को गरिमा, महिमा, वजन घटाइएको अवस्था छ। घट्दै गएको छ। यस्तो बेलामा संसद्को गरिमा र महिमा बढाउनुपर्ने सरकारका मन्त्रीहरु मेरो मन्त्रालयका बारेमा सांसद्हरुले के बोल्छन् भन्नेसम्म ख्याल नगर्नेहरुले, यस्ता मन्त्रीहरुले चलाउने सरकार, चलाइआएको सरकारबाट हामीले के आशा गर्ने?'
प्रतिपक्षी दलका सांसद् मात्रै होइन, मन्त्रीहरुको खोजी सत्ता पक्षकै सांसदले पनि गरेका थिए। तिनैमध्ये हुन्, कांग्रेसका सांसद् दिव्यमणि राजभण्डारी। उनले विभिन्न शीर्षकमा छलफल गरिराख्दा आज मन्त्रीहरु कहाँ हुनुहुन्छ? भन्दै प्रश्न गरेका थिए। 'सत्ता पक्षले सहयोग गरेन भन्नुहुन्छ। सत्ता पक्षकै सांसद्हरुले आफ्नो कुरा राख्न खोज्दा मन्त्रीहरु हुनुहुन्न। प्रतिपक्षका सांसद्हरुले चार्ज गरिरहँदाखेर हामी रातो नीलो भएर बस्नुपर्छ। आज एक मन्त्री हुनुहुन्छ, जो चारै वटा मन्त्रालयसँग मतलब नभएको मन्त्रीज्यु हुनुहुन्छ। तर भएका मन्त्रीहरु कहाँ हुनुहुन्छ, थाहा छैन', उनले भने।
राजभण्डारीको सम्बोधनपछि सभामुखको भूमिका निर्वाह गरिरहेकी पुष्पा कुमारी कर्ण कायस्थले दुई मन्त्रीहरु देशबाहिर रहेको सूचना यसअघि नै पढेर सुनाइएको बताएकी थिइन्। 'कृषि तथा पशुपन्छी विकास मन्त्री र सञ्चार तथा सूचना प्रविधि मन्त्री देशबाहिर रहनुभएकोले उहाँहरुको कार्यभार अहिले क्रमशः भौतिक पूर्वाधार मन्त्री र गृहमन्त्रीले सम्हाल्नुभएको पत्र सभामै पढेर सुनाइएको स्मरण गराउन चाहन्छु,' उनले भनिन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768821025.png)
-1768820888.png)
-1764146706.png)
