काठमाडौं– नेकपा एकीकृत समाजवादीका अध्यक्ष माधवकुमार नेपालले पार्टीको तर्फबाट पठाइएका नयाँ मन्त्रीहरूको टिमले राम्रो काम गर्ने अपेक्षा गरेका छन्।
बुधबार आयोजित विद्यार्थी विशेष जिल्ला कमिटीको सपथ ग्रहण कार्यक्रमलाई सम्बोधन गर्दै उनले आफ्ना मन्त्रीहरूले पनि सकेसम्म राम्रै काम गरेको बताए।
‘यथोचित मूल्याकंन हामी गरौंला। राम्रो कामका निम्ति धन्यवाद दिनेछौं। कमजोरीलाई ध्यानमा राखेर अब जाने टिमले राम्रो काम गरोस् भनेर आशा अपेक्षा गर्दै उहाँहरूलाई नै पठाउनेछौं’, उनले भने।
अध्यक्ष नेपालले आफ्ना मन्त्रीहरू इमानदार भएको भन्दै पार्टीको निर्णय कार्यान्वयन हुने बताए। ‘सबै इमानदार हुनुहुन्छ। पार्टीको आदेश पालना गर्नुहुन्छ। आदेश पालना गरेर राम्रो कार्यकर्ताको रूपमा आफूलाई प्रस्तुत गर्नुहुन्छ भन्ने हामीलाई पूरै विश्वास छ’, उनले भने।
अध्यक्ष नेपालले पार्टीले निर्णय गरिसकेपछि लागू नभएको विषयमा प्रश्न उठिरहेको कुरामा आफ्नो पार्टीले निर्णय गर्दा अन्यत्र भूकम्प गएको बताए। ‘हाम्रो पार्टीले निर्णय गर्यो, अरु पार्टीमा पनि भूकम्प चल्यो होला। हाम्रोमा पनि गर्नुपर्यो भन्ने भएको होला। अरु पार्टीले हामीलाई पनि एक–दुई दिन सोच्नका लागि समय दिनुस् न त भनेका पनि होलान्’, उनले भने।
पुराना मन्त्रीलाई ६ महिनाका लागि पठाइएकाले अहिले मन्त्री फेरेको उनको भनाइ छ। ‘म अहिले मोबाइल हेर्दैथिएँ। त्यहाँ मन्त्रीहरुको (प्रतिक्रिया) देखेँ। राम्रो पनि लाग्यो। ६ महिनाको अवधि हामीलाई दिइएको थियो भनेर मन्त्रीहरुले भनेका छन्। ती मन्त्रीहरुलाई धन्यवाद छ। ६ महिनाको समय भनेकै थियो। बरु ८ महिनासम्म उनीहरु बसे। ज–जसले राम्रो काम गरेका छन्, सबैलाई धन्यवाद दिन चाहन्छौं’, उनले भने।
एकीकृत समाजवादीले पुराना मन्त्रीहरुलाई फिर्ता बोलाएर नयाँ टिम तय गरेको भए पनि सो निर्णय कार्यान्वयनमा आइसकेको भने छैन। फिर्ता बोलाइएका मन्त्रीहरूले प्रधानमन्त्री शेरबहादुर देउवा र माओवादी केन्द्रका अध्यक्ष पुष्पकमल दाहाल समक्ष गुनासो गरेको र प्रधानमन्त्रीले पनि मन्त्री हेरफेरमा रूचि नदिएको समाचार सार्वजनिक भएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
