काठमाडौं– सीके राउत नेतृत्वको जनमत पार्टीले स्थानीय निर्वाचन २०७९ को परिणाम सकारात्मक र उत्साहजनक रहे पनि अपेक्षाकृत नभएको ठहर गरेको छ।
सो पार्टीले परिणाम अपेक्षाकृत नहुनाको कारण सत्ता गठबन्धनद्वारा गरिएको राज्य–शक्तिको चरम दुरुपयोग र धाँधली, प्रहरी प्रशासनको संरक्षणमा भएको मतको खरिद बिक्री, समाजमा व्याप्त गरिबी र जनचेतनाको कमी, विरोधी पार्टीका नेता कार्यकर्ताहरूद्वारा फैलाइएको भ्रम र देखाइएको डरत्रासका साथ–साथै आफ्नै पार्टीभित्र सशक्त उम्मेदवारको अभाव लगायतका कारण पहिचान गरेको छ।
पार्टीले जेठ २१ गते केन्द्रीय कार्यकारिणी समितिको जिल्ला पदाधिकारीहरूसँगको बैठक, जेठ २२ गते केन्द्रीय समितिको विस्तारित बैठक तथा जेठ २३ गते केन्द्रीय कार्यकारिणी समितिको बैठक सम्पन्न गरेको थियो। ती बैठकहरूमा स्थानीय निर्वाचनको समीक्षा गरिएको थियो।
जनमत पार्टीले आगामी निर्वाचनमा अन्य पार्टीसँग गठबन्धन गर्ने पनि बताएको छ। ‘स्थानीय निर्वाचनमा दुई–दुईवटा गठबन्धन रहेकोमा जनमत पार्टी एक्लै प्रतिस्पर्धामा उत्रिँदा अपेक्षित परिणाम आउन नसकेकोले आगामी निर्वाचनको लागि जनमत पार्टी अरू पार्टीसँग गठबन्धन गर्न खुला रहने निर्णय गरेको छ। राष्ट्रिय, प्रादेशिक, जिल्ला वा निर्वाचन क्षेत्रमध्ये कुनै स्तरमा गठबन्धन हुनसक्नेछ’, बैठकपछि जारी विज्ञप्तिमा भनिएको छ।
उसले नेपाल सरकारले किसान आन्दोलनको ११ बुँदे माग बजेटमार्फत् सम्बोधन गर्ने भनेर आश्वासन दिएकोमा किसान आन्दोलनका मागहरू सम्बोधन गर्नुको साटो मलखाद खरिद गर्न बजेट समेत नबढाएको र किसानका समस्याहरू समाधान गर्न कुनै ठोस पहल नगरेकोले किसान आन्दोलनलाई पुनः अगाडि बढाउने निर्णय पनि गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
