काठमाडौं– लोकतान्त्रिक समाजवादी पार्टी (लोसपा) ले सरकारलाई ११ बुँदे ज्ञापनपत्र बुझाएको छ। लोसपाका नेताहरुले मंगलबार प्रधानमन्त्री शेरबहादुर देउवालाई भेटेर ज्ञापनपत्र बुझाएका हुन्।
टीकापुर हत्याकाण्डमा दोषी ठहर भइ जेलमा रहेका रेशम चौधरीको रिहाइ तथा संविधान संशोधन लगायतका माग गर्दै ज्ञापनपत्र बुझाइएको हो।
यस्तै, नागरिकता विधेयक, मधेश आन्दोलन र थरुहट आन्दोलनमा क्रममा थुनामा रहेका बन्दीहरुको मुद्दा फिर्ता र रिहाइ लगायतका विषय समावेश गरेर ज्ञापनपत्र बुझाइएको लोसपाका एकजना नेता शरदसिंह भण्डारीले बताए।
‘संविधानअनुसार जन्मसिद्ध नागरिकका सन्तानलाई अविलम्ब नागरिकता प्रमाणपत्र प्रदान गर्ने र वैवाहिक अंगीकृतसम्बन्धी हालसम्म कायम रहेको कानुनी व्यवस्थालाई निरन्तरता दिने,’ ज्ञापनपत्रमा भनिएको छ ‘जेलमा रहेका नेता रेशम चौधरी लगायतका राजनीतिकबन्दीहरुलाई अविलम्ब रिहाइ गरियोस्।’
मधेस तथा थरुहट आन्दोलन लगायत विभिन्न आन्दोलनमा लगाइएका मुद्दा फिर्ता गर्न, महोत्तरी र कैलालीमा रहेका बन्दीहरुलाई अविलम्ब रिहाइ गर्नुपर्ने माग ज्ञापनपत्रमा गरिएको छ ।
सरकार आफूहरुको मुद्दामा सकारात्मक संकेत देखिएकाले ज्ञापनपत्र वुझाएको नेता भण्डारीले बताए। सरकारमा सहभागी हुने विषयभन्दा पनि आफ्ना मागहरुको बारेमा प्रधानमन्त्रीसँग कुरा भएको र मागबारे प्रधानमन्त्री सकारात्मक रहेको आफूहरुले पाएको भण्डारीको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772271039.png)
