धनगढी– जिल्ला समन्वय समिति (जिसस) कैलालीको निर्वाचन रोचक बन्दै गएको छ। दुई दिनअघि जिसस निर्वाचनका लागि एमाले र नागरिक उन्मुक्ति पार्टीसँग तालमेल गरेको माओवादी केन्द्र शनिबार पुन: गठबन्धनमा फर्किएपछि निर्वाचन रोचक बनेको हो।
कैलाली जिसस निर्वाचन आगामी ३० गते हुँदैछ । मुख्य निर्वाचन अधिकृतको कार्यालयका अनुसार आइतबार उम्मेदवारको मनोनयनपत्र दर्ता गर्ने कार्यतालिका छ। १३ पालिका रहेको कैलालीमा जिसस निर्वाचनका लागि २६ जना मतदाता रहेका छन्।
शनिबार कैलालीको मसुरियामा नेपाली नेपाली कांग्रेस, नेकपा माओवादी केन्द्र तथा नेकपा एकीकृत समाजवादीका नेताहरूबीच भएको बैठकले कैलाली जिसस निर्वाचनमा गठबन्धनलाई निरन्तरता दिने सहमति भएको हो ।
कांग्रेस कैलालीका सभापति नारायणदत्त भट्टले भने, 'हामी तीन पार्टीबीच जिसस निर्वाचनमा पनि गठबन्धनलाई निरन्तरता दिने निर्णय भएको छ।'
बैठकमा कांग्रेस जिल्ला सभापति भट्ट र जिल्ला सचिव केशवराज मिश्र, माओवादी केन्द्रका जिल्ला इन्चार्ज हरि ज्ञवाली तथा जिल्ला अध्यक्ष लाजुराम चौधरी र एकीकृत समाजवादीका जिल्ला इन्चार्ज तथा प्रदेशमन्त्री दीर्घबहादुर सोडारी र उपाध्यक्ष विमल जोशीको उपस्थिति रहेको थियो।
सहमति अनुसार कांग्रेसले जिसस प्रमुख र एक सदस्य, माओवादी केन्द्रले उपप्रमुख र तीन सदस्य तथा एकीकृत समाजवादीले तीन सदस्य लिने भएका छन्।
यसअघि गत बिहीबार (१९ गते) स्थानीय निर्वाचनमा कैलालीको सबैभन्दा ठूलो दल बनेको रेशमलाल चौधरी संरक्षक रहेको नागरिक उन्मुक्ति पार्टी, नेकपा एमाले र माओवादीबीच जिससमा गठबन्धन गर्ने सहमति भएको थियो।
तीन पार्टीका नेताहरूबीच नागरिक उन्मुक्ति पार्टीलाई जिसस प्रमुख र दुई सदस्य दिने सहमति भएको थियो। त्यस्तै, एमालेले उपप्रमुख र एक सदस्य तथा माओवादी केन्द्रले चार सदस्य लिने सहमति भएको थियो।
जिसस निर्वाचनका लागि कैलालीमा कांग्रेसका आठ, नागरिक उन्मुक्तिका सात, एमालेका पाँच, माओवादी केन्द्रका चार, एकीकृत समाजवादीका एक मतदाता रहेका छन् भने एक जना स्वतन्त्र रहेका छन्।
धनगढी उपमहानगरपालिका मेयरमा विजयी गोपाल हमालले अहिलेसम्म जिसस निर्वाचनमा तटस्थ बस्ने बताउँदै आएका छन्। जिससमा विजयी हुन १४ मत आवश्यक पर्छ। कांग्रेस, माओवादी केन्द्र र एकीकृत समाजवादी मिल्दा १३ जना पुग्छन् भने नागरिक उन्मुक्ति र एमाले मिलेर १२ जना हुन्छन्।
माओवादी केन्द्रका जिल्लास्तरीय नेताहरूले दुई दिनअघि एमाले र नागरिक उन्मुक्ति पार्टीसँग जिसस निर्वाचनमा तालमेल गर्ने सहमति गरेपनि केन्द्रबाट निर्देशन आएकाले पछाडि फर्किनुपरेको बताइन्छ।
माओवादी केन्द्रका जिल्ला अध्यक्ष लाजुरामले भने, 'दुई दिनअघिसम्म केन्द्रको कुनै निर्देशन आएको थिएन। हामीले जिल्लास्तरमा विभिन्न राजनीतिक दलहरूसँग छलफल गर्ने क्रममा नागरिक उन्मुक्ति र एमालेसँग तालमेल गर्ने निर्णय गरेका थियौं। तर, अहिले केन्द्रबाट ‘गठबन्धनलाई निरन्तरता दिनु भन्ने सर्कुलर’ आयो।'
१९ गते तीन दल (उन्मुक्ति, एमाले र माओवादी) बीचको बैठकमा सहभागी नागरिक उन्मुक्तिका केन्द्रीय सदस्य दामोदर पण्डित भन्छन्, 'हामी अहिले माओवादी, कांग्रेस र समाजवादीबीच भएको सहमतिबाट तरंगित भएका छैनौं। एमाले र हाम्रो मिलाएर १२ जना छौं। निर्वाचनमा हामी विजयी हुनेमा ढुक्क छौं।
जिसस प्रमुखका लागि कांग्रेस जिल्ला कार्यसमितिले पदमबहादुर कलेल र केशव पन्तको नाम सिफारिस गरेको बताइएको छ।नागरिक उन्मुक्ति–एमाले गठबन्धनले प्रमुखमा उन्मुक्ति पार्टीबाट जानकी गाउँपालिका–६ का निर्वाचित वडाध्यक्ष इन्द्र चौधरीलाई उम्मेदवार बनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
