काठमाडौं–नेकपा एकीकृत समाजवादी पार्टीका वरिष्ठ नेता एवम् पूर्वप्रधानमन्त्री झलनाथ खनालले वामएकताको आवश्यकता रहेको बताएका छन्। शुक्रबार प्रतिनिधि सभाको बैठकमा भाग लिन नयाँ बानेश्वस्थित संसद् भवन पुगेका नेता खनालले सञ्चारकर्मीसँग कुरा गर्दै वाम एकता मुलुकको आवश्यकता भएको बताए।
‘मुलुकको आवश्यकतालाई हेर्ने हो भने वाम एकता आवश्यक हो। तर, आफूलाई वामपन्थी आन्दोलनका मूल नेता भनेर दावी गर्नेहरू जो छन् ती नेता नै एकताको पक्षमा छैनन्,’ उनले भने।
उनले वाम एकताको आवश्यकताबारे मूल नेताहरूले नै नबुझ्दासम्म वामपन्थी एकता सम्भव नभएको दाबी गरे। ‘मुख्य नेताहरू नै वाम एकताको पक्षमा छैनन्। त्यसकारण नेताहरूले आवश्यकता किन हो? यसको ऐतिहासिकता के हो? भन्ने कुरा जहिलेसम्म बुझ्दैनन्, त्यतिबेलासम्म वामपन्थी एकता सम्भव नै हुँदैन।’
सञ्चारकर्मीहरूको जिज्ञासाको जवाफ दिँदै खनालले बजेटमाथि छलफल भइरहेको बेलामा सांसदहरूको न्यून उपस्थिति हुनु राम्रो नभएको बताए । संसद्लाई उपेक्षा गरेमा नराम्रा परिणामहरू आउने उनले दावी गरे।
‘यो राजनीतिक पार्टीहरुले र स्वयम् सांसदहरूले संसद्लाई कसरी हेर्नुहुन्छ, त्यसको महत्वलाई कसरी बुझ्नुहुन्छ, त्यहाँ हुने बहस, छलफल र आफैंले पनि त्यसमा सहभागी हुने कुराको महत्वलाई कत्तिको गम्भिरतापूर्वक लिनुहुन्छ भन्ने कुरामाथि पनि निर्भर गर्छ,’ उनले भने, ‘यसरी संसद्प्रति उपेक्षा गरिनु राम्रो होइन। उपेक्षा गर्दै गयो भने यसले धेरै नराम्रा परिणामहरू ल्याउन सक्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775299473.png)
-1764146706.png)
