काठमाडौं–अर्थमन्त्री जनार्दन शर्मा अहिलेको बजेट कृषिमा धेरै आधारित हुनु भनेको संकटसँग लड्नका लागि एकमात्र उपाय भएको दावी गरेका छन्। राष्ट्रिय सभामा बजेटमाथिको छलफलमा जवाफ दिँदै उनले यस्तो दावी गरेका हुन्।
‘यो बजेटमा त्रुटि होला। तर, केही पनि असल पक्ष नभएको हो ?,’ उनले भने, ‘देशको आवश्यकता हो, यही आवश्यकताको आधारमा बजेट आएको छ।’
देश संकटमा रहेको र त्यसलाई समाधान गर्नका लागि सरकारले विचार गरेरै नीति तथा कार्यक्रममा आधारित भएर बजेटठ ल्याएको शर्माको दावी छ। उनले भने, ‘देश संकटमा छ भन्ने मैले सुनेको छु। यसलाई समाधान गर्नका लागि नै सरकारले परिस्थिति विचार गरेर नीति तथा कार्यक्रममा आधारित बजेट ल्याएको हो’, उनले भने।
यस्तै, कृषिको कुरा गरिएकोमा किन भन्ने प्रश्न आएको भन्दै मन्त्री शर्माले भने, ‘कृषिमा लाग्नुपर्ने रैछ भनेर बुझेकाले जनताले बुझ्ने बजेट ल्याएको छु।’
उनले संघीय संसद्मा सांसदहरूको पनि जिम्मेवारी हुने भनेर आफूले बजेटमा लेखेको भन्दै सरकारले नेतृत्व गर्ने अनि सांसदहरूले कार्यान्वयनमा सहयोग गर्नुपर्ने टिप्पणी गरे।
उनले संरचना पुरानो भएका कारण सरकारले ल्याउने बजेट कार्यान्वयनमा समस्या उत्पन्न हुने बताए। ‘अब भने संरचनासहित विधि र कार्यक्रमसमेत उल्लेख भएको छ। विकसित शक्तिलाई केन्द्रिकृत गरी परिचालन गरिनेछ र बजेट लागू हुनेछ’, मन्त्री शर्माले दावी गरे।
यस्तै मन्त्री शर्माले वर्तमान सरकारले ल्याएको बजेटले कृषिलाई रुपान्तरण गर्ने दावी गरेका छन्। ‘आयात प्रतिस्थापनका लागि पनि कृषिको आवश्यकता भएकाले यो बजेटमा कृषिलाई महत्व दिएको हो,’ उनले भने, ‘के धान फल्न खेत छैन?, मकै फल्ने बारी छैन?, आलू फल्ने खेत छैन?, किन भएन त भनेर यो बजेटले दिन खोजेको छ।’
एक्लै कुनै पनि कार्यक्रम गर्न नखोजेको भन्दै उनले संघ, प्रदेश र स्थानीय सरकारबीच सहकारी गरेरै सरकारले बजेट लागू गर्ने जिकिर गरे। संघीय सरकारले सहयोग गर्ने र त्यसलाई कार्यान्वयनमा स्थानीय सरकारले लैजाने उनको भनाइ छ।
उनले अनुसन्धानको काम पनि स्थानीय सरकारले गर्ने उनले बताए। नेपालमा उत्पादन हुने बीउहरूको सुरक्षा हुन नसेकेको भन्दै उनले देशको संकट समाधान गर्न अहिलेको बजेट उपयुक्त हुने दावी गरे।
अर्थमन्त्री शर्माले उद्योगको विकासका लागि सरकारले काम गर्ने बजेटमा स्पष्ट राखिएको दावी गरे।
‘नेपालमा सिमेन्ट उद्योगमा ठूलो सम्भावना छ। यसका लागि विद्युत र ढुंगा राम्रो भएकाले निर्यात गर्नुपर्छ भनेर सहयोग कार्यक्रम ल्याएका हौं, ८ प्रतिशत ठूला उद्योगलाई प्रोत्साहन र विद्युतमा पनि सहुलियत दिनाले नेपाली उद्योगलाई सहयोग पुग्छ। यति मात्र होइन, साना तथा मझौला उद्योगलाई पनि बजेटले समेटेको छ’, अर्थमन्त्री शर्माले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
