काठमाडौं- नेकपा माओवादी केन्द्रका अध्यक्ष पुष्पकमल दाहाल 'प्रचण्ड' ले मुस्ताङमा भएको तारा एअर दुर्घटनाको अनुसन्धानका लागि एक टोली बनाई सत्यतथ्य जनसमक्ष ल्याउन सरकारसँग आग्रह गरेका छन्।
सोमबार एक विज्ञप्ति जारी गर्दै माओवादी अध्यक्ष प्रचण्डले पोखराबाट मुस्ताङ जिल्लाको जोमसोम जाने क्रममा आइतबार बिहान थासाङ गाउँपालिका वडा नं २ स्थित पटके लेकको सानोसोरामा तारा एअरको जहाज दुर्घटनाग्रस्त हुँदा चालक दलका तीन सदस्य र १९ जना यात्रुहरुको निधन भएको खबरले मर्माहत बनाएको उल्लेख गरेका छन्।
भौगोलिक विकटताका बाबजुद नेपालमा हवाई यात्रा सुरक्षित र भरपर्दो हुँदाहुँदै पनि बेलाबेलामा हुने दुर्घटनाले केही गम्भीर प्रश्न खडा गर्ने गरेको भन्दै यसप्रकारका दुर्घटनाको कारण पत्ता लगाई आवश्यक सावधानी र सचेतना अपनाउन प्रचण्डले सम्बन्धित सबैमा अपिल गरेका छन्। यसबाट दुर्घटनाको न्यूनीकरण र जनधनको क्षति कम गर्न सकिने विश्वास लिएको उनले विज्ञप्तिमा उल्लेख गरेका छन्।
प्रचण्डले दुर्घटनामा परि निधन भएका विमान कर्मचारी र सम्पूर्ण यात्रुहरुप्रति श्रद्धाञ्जली व्यक्त गर्दै शोकाकूल परिवारजन तथा आफन्तजनमा समवेदना प्रकट गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787795595.png)
-1786602170.png)
-1786513116.png)
