काठमाडौं–नेपाली कांग्रेसका सांसद प्रकाश स्नेही रसाइलीले संसदमा पूर्वप्रधानमन्त्री एवं एमाले अध्यक्ष केपी ओलीले तीन घण्टा लगाएर भाषण गर्दा सांसदहरुले ओछ्यानसमेत संसदमै बोकेर आउनुपर्ने अवस्था आएको टिप्पणी गरेका छन्।
प्रतिनिधिसभाको शनिबारको बैठका बोल्दै उनले भने, ‘संसदमा आउँदा बिस्तरा नै ल्याउनुपर्ने भयो। तीन घन्टा एउटै व्यक्तिले लिएपछि संसदको मर्यादा र गरिमा कहाँ रह्यो।'
उनले संसदमा सांसदहरुले बोल्न ३ मिनेटको समय पाउने तर पूर्व प्रधानमन्त्रीहरुले तीन–तीन घन्टा उपदेश दिँदा सांसदहरुमाथि अन्याय भएको दावी गरे। ‘पूर्व प्रधानमन्त्रीलाई प्रश्न छ तपाईंले व्यक्तिगत सम्पत्तिको ट्रस्ट त बनाउनु भयो तर तपाईंको उपचारमा राज्यको कति खर्च भयो त्यो बेचेर पहिला फिर्ता गर्नुस् ’ स्नेहीले भने, ‘तपाईको समयमा प्रधानमन्त्री रोजगार कार्यक्रम सञ्चालन गर्नुभयो। पाँच अर्ब विदेशवाट ऋण लियो तर त्यसले के काम ग¥यो तर त्यो पैसा बाँदर धपाउनेदेखि कार्यकर्तासम्मलाई वितरण गर्दैमा सकियो।’ उनले यो रकम दुरुपयोगका बारेमा अख्तियार दुरुपयोग अनुसन्धान आयोगले छानबिन गर्नुपर्नेमा नगरेको गुनासो गरे।
‘अख्तियारले साना माछामात्र हेर्छ ठूला माछा समाउँदैन, खरदार सुब्बालाई मात्र भ्रष्टाचारको मुद्दा दायर गर्छ,’ उनले भने, ‘तर यस्तो भ्रष्टाचारमा खै अख्तियारले छानबिन गरेको? सर्वोच्च अदालतको भवन निर्माणमा ५० करोडको भ्रष्टाचार भएको छ। तर मलाई भ्रष्टाचार मुद्दा दायर हुनेमा विश्वास छैन।'
बालु्वाटार जग्गा प्रकरणमा नीतिगत निर्णय गर्ने मन्त्रीलाई मुद्दा लगाएको तर खल्तीमा लालपुर्जा बोकेर बस्नेहरुले उन्मुक्ति पाएको उनले टिप्पणी गरे। अहिले श्रीलंकामा मन्त्रीहरुको जुन अवस्था भयो भोलि हाम्रो पनि उस्तै नहोस् भन्दै उनले सडकमा नांगो बनाउने अवस्था आउने बताए। रसाइलीले एमाले अध्यक्ष ओलीप्रति लक्षित गर्दै ‘जसले यो संसदको घाँटी रेटेर हत्या गरे, उनैले ३ घण्टा समय पाउने अनि हामी सांसदले तीन मिनेट पनि समय नपाउने भन्दै गुनासो गरे।
अब पूर्वप्रधानमन्त्रीहरुले बोल्दा ओछ्यान नै लिएर सांसदहरु आउनुपर्ने भएको भन्दै उनले सबै सांसदले आफ्नो जिल्लाको गुनासो राख्न पाउनुपर्ने दावी गरे। पूर्वप्रधानमन्त्रीहरुले घण्टौं उपदेश दिएर जाने अनि पूर्वभीभीआइपीले लिएको सुविधा किन फिर्ता नलिएको भनि प्रश्न गरे। उनले कर्णालीबाट आउने मानिस ठूला अस्पतालमा उपचार त परको कुरा पार्किङसम्म गर्न सक्दैनन् अनि कसरी स्वास्थ्य र शिक्षा कसरी राज्यको दायित्व भयो भनि प्रश्न गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
