काठमाडौं- गत वैशाख १७ गते बालेन शाहले चुनाव चिह्न लौरो प्राप्त गरेपछि भनेका थिए, 'बुढाबुढीलाई टेकाउन मिल्ने, भ्रष्टलाई सेकाउन मिल्ने।' काठमाडौं महानगरको मेयर बनेर बालेनले उक्त 'लौरो' को उपयोग गर्नुअघि नै काठमाडौंबासीले त्यसलाई प्रयोग गरिसकेका छन्।
बालेनको लौरोबाट महानगरका मतदाताले आफूलाई निर्विकल्प ठान्ने ठूला दल र अरुलाई प्रतिस्पर्धीकै रुपमै स्वीकार्न नचाहने ती दलका उम्मेदवारलाई 'कोर्रा' हानेका छन्।
दललाई सेकाउन जनताको साथ
उक्त लौरोको पहिलो सेकाइ दलहरुलाई मिलेको छ। दलहरुलाई सेकाउने लौरो अब टेकाउने ठाउँमा पुगेको छ। फोहर, अव्यवस्था र अनियमितताले थिलथिलो बनेको काठमाडौंले त्यही लौरो टेकेर विश्वका व्यवस्थित सहरसँग म्याराथन गर्ने सपना देखेको छ।
मेयरमा निर्वाचित भएपछि शाहले काठमाडौंलाई उत्कृष्ट सहर बनाउने घोषणा पनि गरेका छन्। उनले भनेका छन्, 'यो पाँच वर्ष काठमाडौं महानगरपालिकाबाहेक म अन्यत्र समय दिने छैन। काठमाडौं महानगरपालिकालाई व्यवस्थित बनाउन, स्वच्छ बनाउन, पूर्ण विकसित विश्वको उत्कृष्ट सहर बनाउन आफ्नो क्षमता, योग्यता र कुशलतालाई प्रयोग गर्नेछु।'
आफू जन्मेहुर्केको सहर र त्यही सहरबाट चल्ने देशको राजनीतिप्रति बालेनको तीव्र रोष थियो। उनले त्यसलाई सुरुमा र्याप गीतमार्फत् पस्के।
काठमाडौंको गौरीगाउँमा जन्मिएका बालेनले आफूभित्रको आगो संगीतमार्फत् प्रस्तुत गर्ने क्रममा 'बलिदान', ‘आम नेपाली बुबा’, ‘प्रहरी प्रतिकार’, ‘नेपाल हाँसेको’जस्ता गीत सार्वजनिक गरे। जहाँ देशको सामाजिक र राजनीतिक अवस्थाको चित्रण गरिएको छ।
'बलिदान' नामक गीतमा उनले राजनीतिक दलका नेता र पार्टीप्रति आक्रोश पोखेका छन्:
‘नेता जति सबै चोर देश लुटी खा’ छन्,
खाने बेला एक, गर्ने बेला फुटिरा’छन्
नांग्रेस, नेमाले, नाओवादी
सबै मिली देश खाउँ बाँडी हामी’
राजनीतिक दलहरुका क्रियाकलापबाट चिसिरहेको आमजनको मनमा बालेनले बालेको आक्रोश आगोले न्यानो जगायो। स्थानीय तहको निर्वाचनबाट काठमाडौंले बिद्रोह गर्यो।
बालेनको खातामा पुगेका ६१ हजार ७ सय १७ मत बिद्रोह र भरोसाको दोभान हो। इन्जिनियरिङमा स्नातकोत्तरसमेत गरेका बालेनमाथि कतिले काठमाडौं बदल्ने उनको सपनामाथि भरोसा गरेकका छन्। कतिपयले राजनीतिक दलले आम मतदातामाथि गरेको अपमानको बदला लिएका छन् भने कतिपयले सुध्रिनका लागि चेतावनी दिएका हुन्।
राजनीतिक दलहरुले पनि यस्तो महशुस गरेका छन्। नेपाली कांग्रेसका महामन्त्री विश्वप्रकाश शर्मा दलहरुमाथि जबर्जस्त दबाब परेको स्वीकार्छन्। उनले सामाजिक सञ्जालमा लेखेका छन्, 'काठमाडौं महानगरमा बालेनको विजयले हामी (राजनीतिक दल)लाई यसका लागि जबर्जस्त दबाब सकारात्मक ढंगले दिएको छ।'
राजनीतिक विश्लेषक केशव दाहाल दलहरुलाई मतदाताले दिएको चुनौतीका रुपमा यसलाई बुझ्नुपर्ने बताउँछन्। उनी भन्छन्, 'दलहरु तिमीहरु सुध्र। तिमी सुध्रिदैनौं भने नेपाली जनताको विश्वास आर्जन गर्ने योग्यता गुमाउँछौ। जनताले अर्को विकल्प खोज्छन् भन्ने सन्देश यसले दिएको छ।'
काठमाडौं, धरान र धनगढी फगत निर्वाचन क्षेत्र नभएर विशेष ठाउँसमेत रहेको उनी बताउँछन्। 'काठमाडौं संघीय राजधानी हो। यसको महत्त्व छ। दलहरुको राजधानी जित्ने मनोविज्ञान हुन्छ। चियाको कपमा आएको तुफान हो भने भुल हुन्छ। ठूलो राजनीतिक अर्थ छ,' उनले थपे।
टेकाउन सबैको साथ
आम मतदाताले लौरोलाई 'सेकाउन' प्रयोग गरे। यसलाई सेकाउनका लागि सबैले आफ्नो तहबाट मेयर शाहलाई सघाउनु पर्ने राजनीतिक दलका नेताहरु नै बताउँछन्।
कांग्रेस महामन्त्री शर्मा 'बालेन एक्लै हुन् वा एक्लै छन्' नसोचेर जनताबाट निर्वाचित मेयरलाई सघाउनुपर्ने बताउँछन्। कसैलाई पराजित नगरेर जनताको विश्वास जितेकाले सघाउनुपर्ने उनको भनाइ छ।
यसैगरी नेकपा एकीकृत समाजवादीका अध्यक्ष माधवकुमार नेपालले काठमाडौं महानगरपालिकाका नवनिर्वाचित मेयर बालेन शाहलाई बधाई तथा कार्यकालको शुभकामना दिएका छन्। प्रतिबद्धता अनुरुप काठमाडौंलाई उत्कृष्ट सहर बनाउने लगायतका सबै असल कार्यमा आफ्नो पार्टीको सहयोग एवं सहकार्य गर्न तत्पर रहेको प्रष्ट पारेका छन्।
‘यहाँले सार्वजनिक रूपमा प्रतिबद्धता गरे अनुरूप काठमाडौंलाई उत्कृष्ट सहर बनाउने लगायतका सबै असल कार्यमा सहयोग एवम् सहकार्य गर्न हाम्रो पार्टी सदैव तत्पर रहेको छ,’ नेपालले भनेका छन्।
नेकपा एमालेबाट उपमेयर जितेकी सुनिता डंगोले आफू विकास र राम्रो कामकका लागि बाधक नबन्ने बताएकी छिन्। फरक पार्टीबाट निर्वाचित डंगोलले शाहलाई काममा बाधा उत्पन्न गर्न सक्ने आशंका भइरहँदा उनले यस्तो घोषणा गरेकी हुन्।
नतिजा घोषणापछि राष्ट्रिय सभागृहबाट बाहिरिँदै उनले भनिन्, 'युवाहरुले हामीमा आशा देख्नुभएको छ। हामी खुट्टा तान्ने प्रवृत्तिमा लाग्नहुँदैन। म विकास र राम्रो काममा बाधक बन्नेछैन। हामी सबैजना एक ढिक्का भएर काममा लाग्नुपर्छ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1738557849.jpg)
-1764146706.png)
