हिमपातले मनाङमा यार्सागुम्बा संकलन रोकियो

अर्थ समाचार

रासस शुक्रबार, जेठ १३, २०७९ ०९:३५

मनाङ– औषधिजन्य जडीबुटी यार्सागुम्बा संकलन रोकिएको छ। हिमाली जिल्ला मनाङमा हिमपात भएपछि यार्सागुम्बा संकलनका लागि खर्कमा पुगेका संकलकहरू फर्किएका हुन्।

हिमपातले गर्दा यार्सागुम्बा संकलन गर्न सक्ने अवस्था नभएपछि बेँसी फर्किएको धादिङका मिलन तामाङले बताए।

'मनाङमा पानी परेपछि भ्राताङ लेकमा हिउँ पर्दा यार्सागुम्बा संकलन गर्न नसकेर बेँसीतर्फ फर्किएका हौँ, ठेक्कामा काम गर्न यहाँ आएका हौँ', उनले भने।

नार्फुको हुलाबाट लेकमा यार्सागुम्बा संकलन गर्ने गरेको धादिङ रिहीका ४६ वर्षीय एक्का तामाङले बताए। दैनिक नौ–दशवटा यार्सागुम्बा संकलन गर्न सकिने उनले बताए। डेढ महिनामा २०० यार्सागुम्बा संकलन गरेको उनी बताउँछन्।

धादिङका १९ जनालाई यार्सागुम्बा संकलन गर्नका लागि ठेकेदारले ४२ लाख पूर्जी काटेको सोही ठाउँका ३० वर्षीय एसु तामाङले बताए। हालसम्म ५२० यार्सागुम्बा संकलन गरेको उनले बताए।

ठेकेदारले यार्सागुम्बा संकलकलाई प्रतिगोटा ४०० रूपैयाँ दिने गरेको एसुले बताए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।