काठमाडौं– कैलालीको टीकापुर नगरपालिकाको प्रमुखमा चार महिनाअघि स्थापना भएको नागरिक उन्मुक्ति पार्टीले जित हासिल गरेको छ। त्यहाँ सत्ता गठबन्धन र प्रमुख प्रतिपक्षी नेकपा एमालेका फरक उम्मेदवारलाई पराजित गर्दै नवगठित पार्टीको तर्फबाट प्रमुखमा रामलाल डगौरा थारु निर्वाचित भइसकेका छन्।
नवनिर्वाचित प्रमुख थारुले अब कसरी नगरको विकास निर्माणको कामलाई अघि बढाउँछन् भन्ने विषयमा नेपाल लाइभका लागि बीपी अनमोलले गरेको कुराकानीः
नगरपालिकाको प्रमुखमा निर्वाचित हुनुभयो। यो जितलाई कसरी हेर्नुभएको छ?
यो जित भनेको टीकापुरबासीको जित हो। यो एतिहासिक जित पनि हो। विगतमा चाहिँ एउटै जाति, वर्ग, समुदायको पक्षमा टीकापुरलाई हेर्ने गरिएको थियो। आज टिकापुरबासी हर्षित भएका छन्। सबै हामीसँग जोडिन आइपुगेका छन्। अब टीकापुरलाई जसरी पनि बनाउनुपर्छ भनेर हामीले काम गर्ने हो।
टीकापुर नगरपालिकामा अब तपाईंका प्राथमिकता के–के हुन्?
टीकापुरमा सबैभन्दा पहिले त शान्तिसुरक्षा र सुशासनको पाटोलाई हामीले जोड दिएका छौं। यसलाई साकार गराउन सबै राजनीतिक दल, नागरिक समाज, सरोकारवाला निकायसँग छलफल, अन्तरक्रिया र बहस भइरहेको छ। टीकापुरमा सधैंभरी फाटेको मन आक्रान्त बन्न दिनुहुँदैन। अब सद्भाव कायम गरेर हुन्छ कि, नभए यहाँको विभिन्न गतिविधिलाई ध्यानमा राखेर सबैको समान प्रतिनिधित्व, समान सहभागिता हुनुपर्छ भन्ने हो। त्यो विकास निर्माणको सवालदेखि लिएर आर्थिक पाटो, सामाजिक क्षेत्रमा समावेशी रूपमा लैजानुपर्छ भन्ने हो। सबैको साझा टीकापुर बनाउनेतर्फ नै अब ध्यान जानेछ। मैले त्यसैअनुसार नै काम अघि बढाइरहेको छु।
टीकापुर क्षेत्रमा सबैलाई समेटेर तपाईं कसरी अगाडि बढ्नुहुन्छ?
यसअघि टीकापुरमा सबै ‘मै खाउँ, मै लाउँ’ भन्ने हिसाबले भइरहेको थियो। अब चाहिँ सबैको समान प्रतिनिधित्व हुनुपर्छ भन्ने हो। जनताले दिएको जनमतका आधारमा सबै राजनीतिक दलहरूलाई साथमा लिएर साझा टीकापुर बनाउनका लागि हामी काम गर्नेछौं।
अर्को कुरा, यहाँ जुन जाति, वर्गका नाममा जुन किसिमले टीकापुरलाई भजाउने गरिन्छ, फलानो समुदाय, जाति वर्ग, भेग भनेर विभेदका विभिन्न लाइन र चिन्तन छन्। त्यो चिन्तनलाई अन्त्य गर्नका लागि मैले सम्पूर्ण समुदायसँग छलफल अन्तरक्रिया गरेर अघि बढ्नेछु। हामीले संकुचित भावना मनमा राखेर हुँदैन। सबैको टीकापुर बनाउनका लागि सबैले लाग्नुपर्छ। मैले सबैसँग मिलेर त्यस हिसाबले नै काम गर्ने हो।
चार महिनाअघि पार्टी स्थापना भएर अहिले कैलालीमा पहिलो भएको छ। नागरिक उन्मुक्ति पार्टीलाई टीकापुरलगायतका स्थानीय तहमा मतदाताले रोज्नुको कारण के हो?
टीकापुरलाई मात्रै जोडेर जानु भन्दा पनि नेपालको इतिहासलाई हेर्दै जाँदा २०५२ सालमा नेकपा माओवादीले जन्म लिएको हेरौं। तत्कालीन ठूला दल भनिएकाहरूले जनताका आधारभूत समस्यालाई समाधान गर्न नसक्नुको कारणले माओवादी जन्मियो। डाक्टर बाबुराम भट्टराईले ४० बुँदे माग सरकारलाई राखेर त्यसको सुनुवाइ हुन नसकेपछि अनि 'जनयुद्ध' भएको थियो।
नेपालमा संविधान घोषणा हुँदै थियो। पहिचानको लडाइ हुँदै थियो। त्यो लडाइ सँगसँगै अब यहाँ देशव्यापी रूपमा आन्दोलनका घोषणा पनि भएका थिए। त्यही क्रममा टीकापुरमा पनि आन्दोलन भएको थियो। यहाँ थरुहट क्षेत्रलाई जोडेर थारुवान प्रदेश कायम हुनुपर्छ भनिएको थियो। त्यो कायम गराउनका निम्ति भएको थियो।
राजनीतिक आन्दोलन हो भन्ने कुरा सबैले स्वीकार्दा पनि निर्दोषलाई जब जेलमा हाल्ने काम भयो। ठूला दलले एकातिर राजनीतिक मुद्दा हो भन्ने अर्कोतर्फ व्यवहारमा नगर्ने। अन्यायमा पारिरहने काम भयो। यो कुरालाई आम टीकापुरबासीले बुझ्नुभयो। वास्तवमा यहाँको आदिवासी थारुलाई अन्याय भएको थियो।
यो अन्यायको बारेमा सबै टीकापुरका मानिसहरूले सोच्नुपर्छ भन्ने हिसाबले साथ दिनुपर्छ भनेर नै सबैले साथ दिएका हुन्। अन्यायमा परेको वर्गलाई हामीले सुरक्षित स्थान र गन्तव्य बनाउन सक्नुपर्छ भन्ने सबैले बुझेका हुन्। यसै आधारमा यो पार्टी जन्मिएको हो र त्यसै अनुसार अहिले जनताले पनि हामीलाई म्यान्डेट दिएको अवस्था छ। जनता एकदमै सकारात्मक देखिएका छन्।
त्यस क्षेत्रमा शिक्षा, स्वास्थ्यको समस्या त्यस्तै छ। विपन्न वर्गको उत्थान हुन सकेको छैन। समग्र रूपमा विपन्न वर्गको क्षेत्रमा तपाईंले कसरी काम गर्नुहुन्छ?
टीकापुरमा सबैले जित्ने बनाउनका लागि हामीले एउटा जाति मात्रै हेरेर हुँदैन। यहाँ सबैका मनहरू फाटेका छन्। ती मनहरूलाई हामीले एक ठाउँमा ल्याउनका लागि सबै जाति, वर्ग, समुदायको हकमा काम गर्नुपर्छ। जहाँसम्म हामीले समग्र टीकापुरका समस्या हाम्रा समस्या हुन् भनेर लाग्ने छौं।
ती समस्या चाहे स्वास्थ्यका हुन् या शिक्षाका या त सांस्कृतिक हुन्। सबै जातजातिको फल्ने–फुल्ने अवसर दिनुपर्छ र त्यही आधारमा काम गर्नुपर्छ। जनसंख्याको आधारमा थारु समुदाय अलि बढी भएकाले उहाँहरू त्यसमा बढी पर्नुहोला। विभिन्न समुदायका नागरिक राज्य सत्ताबाट पिल्सिएको र पछाडि परेको अवस्था छ। उहाँहरूलाई पनि हामीले सम्बोधन गर्नेछौं। स्थानीय सरकारको प्रत्याभूति हुनेगरि सबैलाई समान व्यवहार गर्ने हिसाबले कार्ययोजना बनाएर नै हामीले टीकापुर नगर क्षेत्रमा काम गर्नेछौं।
नागरिक उन्मुक्ति पार्टीको आगामी रणनीति कसरी अघि बढ्छ? आसन्न प्रदेश र संघीय निर्वाचनमा पनि तपाईंहरूको उपस्थिति हुन्छ?
जसरी टीकापुरमा विभिन्न समुदाय राज्यबाट विभेद र उत्पीडनमा पारिएको देखेका छौं। सबैलाई उन्मुक्ति गराउने हाम्रो मुख्य उद्देश्य रहेको छ। कुनै क्षेत्र, भेग नभनिकन आम नेपाली जनताहरू जो उत्पीडनमा परेका छन्, उनीहरूको उन्मुक्तिका लागि हाम्रो पार्टी स्थापना भएको हो।
आसन्न प्रदेश र संघीय निर्वाचनमा पनि हामी अगाडि बढ्छौं। हामी आउने चुनावमा पनि गुणात्मक रुपले अघि बढ्छौं र त्यसै हिसाबले हाम्रो पार्टीले पनि रणनीतिक योजना बनाएर अघि बढ्नेछ। अबका दिनमा हामीलाई कसैले पनि सानो र जातीय पार्टी भन्ने छैनन्। जनताले हामीलाई जनमत दिएर प्रष्ट पारिसकेका छन्। अब हामी आउँदो चुनावबाट नै राष्ट्रिय पार्टीका रूपमा स्थापित हुनेछौं।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791090469.jpeg)
