भरतपुर– भरतपुर महानगरपालिकाको मेयरमा दोस्रो कार्याकालका निर्वाचित रेणु दाहालले महानगरबासीलाई ७ हजार लिटर खानेपानी नि:शुल्क उपलब्ध गराउने निर्णय गरेकी छन्। मेयरको रुपमा पद्भार सम्हालेपछि दाहालले २ वटा निर्णय गरेकी छन्।
दाहालले महानगरभित्रका बासिन्दालाई मासिक ७ हजार लिटर खानेपानी निःशुल्क उपलब्ध गराउने र १ लाख बराबरको छोरी बिमा कार्यक्रम सञ्चालन गर्ने निर्णय गरेकी हुन्।
पहिलोपटक प्रमुख हुँदा उहाँले भरतपुर अस्पतालमा उपचारका लागि आउने महिला र ज्येष्ठ नागरिकका लागि बहिरङ्ग सेवा टिकट निःशुल्कको निर्णय गरेकी थिइन्। दाहालले यो निर्णयले महानगरवासी लाभान्वित हुने बताइन्।
दाहालको निर्णयपछि महानगरभित्रका झण्डै ५२ प्रतिशत जनताले बुधबारदेखि नै निःशुल्क खानेपानी पाउने भएका छन्। यसका लागि वार्षिक २ करोड ५० लाख हाराहारी खर्च हुने महानगरको अनुमान छ।
महानगरभित्र खानेपानी व्यवस्थापन बोर्ड र उपभोक्ता समितिमार्फत् खानेपानी वितरण गरिँदै आएको छ। बोर्डका उपभोक्ता ३५ हजार छन्।
बोर्डका प्रमुख प्रजापति दाहालका अनुसार २५ भन्दा बढी उपभोक्ता समितिमार्फत् महानगरमा खानेपानी वितरण गरिँदै आएको छ। महानगरका ९० प्रतिशत जनताले सरकारी निकायबाट वितरण गरिएको स्वच्छ खानेपानी उपभोग गर्दै आएका छन्।
महानगरले बुधबार गरेको दोस्रो निर्णयमा महानगरपालिकामा स्थायी बसोबास गर्नेहरूबाट जन्मिएका छोरीका लागि १ लाखको जीवन बिमा गरिने भएको छ। महानगरका लेखा प्रमुख जगन्नाथ अर्यालका अनुसार पहिलो वर्ष १ हजार ७५० जनाको बिमा हुने अनुमान छ। सरकारी स्वास्थ्य संस्थामा जन्मिएका छोरीहरूले यो अवसर प्राप्त गर्नेछन्।
राष्ट्रिय बिमा संस्थानमार्फत् बिमा गर्न लागिएको हो। एक जनालाई वार्षिक ३ हजार ३०० महानगरपालिकाले १५ वर्षका लागि बुझाउने छ। पन्ध्र वर्षपछि ती छोरीले १ लाख पाउने गरी बिमा गर्न लागिएको हो। अर्यालका अनुसार आउँदो १५ वर्षमा २६ हजार २५० जनाले सुविधा लिने अनुमान गरिएको छ।
पद्भार ग्रहण गर्दै दाहालले महानगरवासीले आफ्नो अघिल्लो कार्यकालका कामलाई अनुमोदन गरेको भन्दै पहिलो प्राथामिकतामा अधुरा काम रहेको बताइन्। 'भरतपुर महानगरपालिकालाई देशका अन्य पालिकाले सिको गर्ने बनाउँछाँ,' दाहालले भनिन्।
महानगरपालिकाका उपप्रमुख चित्रसेन अधिकारीले महानगरवासीका आवश्यकता आफूहरूले बुझेको उल्लेख गर्दै सोहीअनुरुपका योजना अघि बढाइने बताए। उनले भने, 'अबको पाँच वर्षमा भरतपुरलाई देशकै सुन्दर सहर बनाइने छ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766819606.png)
-1766813412.png)
-1764146706.png)
-1763721444.png)
-1766648928.png)
