काठमाडौं–स्थानीय तहको निर्वाचनमा राष्ट्रिय पार्टी बन्न नसकेका साना आठ दलले अस्तित्व रक्षा गरेका छन्। तीमध्ये चारवटा दलले पहिलोपटक जितेका छन्। जित्नेमा तीन दलले पहिलोपटक निर्वाचनमा भाग लिएका हुन्।
स्थानीय तहको निर्वाचनमा ८० वटा दलले सहभागिता जनाएका थिए। ६ वटा राष्ट्रिय दलहरुसहित आठ साना दलले जित निकाल्न सफल भएका हुन्। जित्नेमध्ये तीनवटाले यही वर्षदेखि निर्वाचनमा सहभागिता जनाएका थिए।
पहिलोपटक निर्वाचनमा भाग लिएकामध्ये नागरिक उन्मुक्ति पार्टीले चारवटा पालिका, जनमत पार्टीले दुईवटा पालिका र जनता प्रगतिशील पार्टीले एकपालिका जितेका छन्। यसपल्ट १२ स्वतन्त्र उम्मेदवारसमेत विजयी भएका छन् भने एक जना जितनिकट छन्।
राप्रपाको हिसाब बराबर
राष्ट्रिय प्रजातन्त्र पार्टीले २०७४ को प्रतिनिधिसभा निर्वाचनमा प्रत्यक्षमा एक सिट जिते पनि तीन प्रतिशत मत पुर्याउन नसक्दा राष्ट्रिय पार्टी बन्न सकेन। २०७४ सालकै स्थानीय तहको निर्वाचनमा राप्रपाले चार पालिका जितेको थियो। यसपल्ट पनि चारवटा पालिका जितेर हिसाब बराबर गरेको छ।
गत वर्ष नेपालगञ्ज उपमहानगरपालिकासमेत जितेको राप्रपाले तीन ठाउँमा जित दोहोर्याउन सकेन। तर, थप तीन ठाउँमा जितेर चारवटा पालिकामा कायम राख्न सफल भयो।
राप्रपाले झापाको दमक नगरपालिका र हल्दिबारी गाउँपालिका, कपिलवस्तुको शिवराज नगरपालिका तथा काठमाडौंको शंखरापुर नगरपालिका जितेको छ।
नागरिक उन्मुक्तिको मुद्दा अनुमोदन
स्थानीय तहको निर्वाचनको केही महिनाअघि मात्रै निर्वाचन आयोगमा दर्ता भएको दल हो नागरिक उन्मुक्ति पार्टी। उक्त पार्टीले कैलाली जिल्लाका चारवटा स्थानीय तह जितेको छ। टीकापुर प्रकरणका दोषीका रुपमा जेलमा रहेका रेशम चौधरीकी श्रीमती रञ्जिता श्रेष्ठ चौधरीको अध्यक्षतामा खुलेको पार्टीले टीकापुर नगरपालिकाकै प्रमुख पनि जितेको छ।
उक्त पालिकामा रामलाल डगौरा थारु प्रमुखमा निर्वाचित भएका हुन्। यसैगरी जानकी गाउँपालिकाको अध्यक्षमा गणेश चौधरी र उपाध्यक्षमा लालमतीदेवी कठरिया, भजनी नगरपालिकाको मेयरमा केवल चौधरी र उपमेयरमा राजु तिरुवा र जोशीपुर गाउँपालिकाको अध्यक्षमा चित्रबहादुर चौधरी र उपाध्यक्ष रेखादेवी कठरियाले जितेका छन्।
गठबन्धनले जोगियो जनमोर्चा
राष्ट्रिय जनमोर्चाले चारवटा पालिकाको प्रमुख र दुईवटा पालिकामा उपप्रमुख जितेको छ। पाँचदलीय सत्ता गठबन्धनको एक घटक जनमोर्चालाई गठबन्धनले जोगाएको हो।
अर्घाखाँचीको भूमिकास्थानमा गठबन्धनका तर्फबाट जनमोर्चाका उम्मेदवार झविलाल थापा एमालेका रेशम थापालाई हराउँदै विजयी बने। यसैगरी बाग्लुङको वरेङ गाउँपालिकामा कृष्णप्रसाद शर्मा र जैमुनी गाउँपालिकामा नरबहादुर पुनले एमाले उम्मेदवारलाई पराजित गर्दै प्रमुख जिते। प्यूठानको मल्लरानीमा पनि एमालेका शिवराज श्रेष्ठलाई हराउँदै जनमोर्चाका कृष्णहबहादुर खड्का विजयी बनेका हुन्।
सिके राउत दुईमा सिमित
तराईलाई स्वतन्त्र देश बनाउने हिंसात्मक गतिविधि छाडेर शान्तिपूर्ण राजनीतिमा आएका सिके राउतको जनमत पनि यसपल्ट परीक्षण भएको छ। जनमत पार्टी खोलेर उनले विभिन्न जिल्लाका सय भन्दा बढी पालिकामा उम्मेदवार उठाएका थिए।
चुनावअघि किसानका मुद्दालाई उठाएर आन्दोलनको रुपसमेत दिए पनि अपेक्षित नतिजा हासिल गर्न सकेनन्। जनमत पार्टीका नेता वीरेन्द्र माझीले सप्तरीको हनुमान नगरी कंकालिनी नगरपालिका प्रमुख जिते। यसैगरी बालन–विहुल गाउँपालिकाले खेमचन्द्र यादवले प्रमुख र रेणु यादवले उपप्रमुखमा जनमत पार्टीबाटै जित हात पारे।
मर्चबारीमा जोगिए हृदेयश
राजनीतिमा लामो समयदेखि भए पनि पार्टीविहीन रहेका हृदेयश त्रिपाठी २०७४ सालमा एमालेको सूर्य चिह्न लिएर आफूलाई प्रतिनिधिसभा सदस्य बनाए। यसपल्ट आफ्नै जनता प्रगतिशील पार्टी खोलेका उनको प्रभाव भने देखिएन।
रुपन्देही मर्चबारी गाउँपालिकाको अध्यक्ष र उपाध्यक्ष हृदेयश शून्य हुनबाट जोगिएका छन्। अध्यक्षमा गयाप्रसाद बरई र उपाध्यक्षमा आशा सिंहले जिते भने सात वडामध्ये दुईटा वडाध्यक्षसमेत उक्त पार्टीको भागमा परेको छ।
भक्तपुर नगरमा नेमकिपा
नेपाल मजदुर किसान पार्टी उपत्यकाबाहिरबाट खुम्चिँदै भक्तपुरमा सिमित भएको छ। भक्तपुर नगरपालिकामा भने उक्त पार्टीले एकछत्र जित निकालेको छ।
भक्तपुरको प्रमुखमा सुनिल प्रजापति दोहोरिँदा अन्य दलले प्रतिस्पर्धासमेत गर्न सकेनन्। प्रजापतिले २९ हजार २ सय ५२ मत ल्याउँदा निकटतम प्रतिस्पर्धी कांग्रेसका रामप्रसाद कासुलाले ३ हजार ४ सय ७ मत प्राप्त गरेका छन्।
उपप्रमुखमा नेमकिपाकै रजनी जोशीले २९ हजार ७ ५९ मत प्राप्त गरिन् भने निकटतम प्रतिस्पर्धी एमालेकी रञ्जना खर्बुजाले २ हजार ९ सय ८८ मत ल्याइन्।
विवेकशील साझालाई सफलता
विवेकशील साझा पार्टी गएको निर्वाचनमा एक्ला–एक्लै हुँदा पनि काठमाडौं महानगरमै प्रतिस्पर्धी बन्ने लक्षण देखाएका हुन्। तर, गएको पाँच वर्षमा दुई पार्टीको नाम एक भयो तर बाँकी छिन्नभिन्न अवस्थामा पुगे।
प्रभाव घट्दो क्रममा रहेको यो पार्टीले बाराको फेटा गाउँपालिका जितेर आफूलाई जोगाएको छ। अध्यक्षमा रुस्तम अन्सारी र उपाध्यक्षमा निलम साहले जितेका छन्।
तमलोपाको अस्तित्व कायम
तराई–मधेस लोकतान्त्रिक पार्टी गठन गर्ने अधिकांश नेताहरु त्यसलाई त्यागेर अन्यत्र पुगिसके। पार्टीको नाम फेरेर अर्कै बनाए पनि उक्त पार्टीको अस्तित्व भने कायम रहेको छ। यो निर्वाचनमा दिलीपकुमार पाण्डेयले बाराको महोत्तरी गाउँपालिका प्रमुख जितेर पार्टीको अस्तित्व जोगाइदिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
