.JPG)
भक्तपुर बहुमुखी क्याम्पसको मतदान केन्द्रमा मत दिने तयारीमा ज्येष्ठ नागरिक। तस्बिर : निमेषजंग राई
काठमाडौं– स्थानीय तहको निर्वाचनमा मतदाताको उत्साह देखिएको छ। निर्वाचन आयोगले देशभर ७५ प्रतिशतसम्म मतदान हुनसक्ने आकलन गरेको छ।
हामीले काठमाडौं उपत्यकाका केही मतदानस्थल पुगेर ज्येष्ठ नागरिकलाई यसपटकको निर्वाचनमा उनीहरूको अनुभव र अपेक्षाबारे सोधेका छौँ। धेरै मतदाताले मतदान गर्न कठिन नभएको बताएका छन्। उनीहरुले रोजगारी सिर्जना र स्वास्थ्य क्षेत्रको सुधार होस् भन्ने चाहेको पनि बताए। अब बन्ने स्थानीय सरकारले रोजगारी सिर्जनालाई प्राथमिकतामा राख्नुपर्ने र बढ्दो वैदेशिक रोजगारीलाई रोक्नुपर्ने पनि उनीहरुले बताएका छन्।
ललितपुर महानगरपालिका वडा नं. ३ को आइडियल मोडल विद्यालयमा मतदान गरेकी ७९ वर्षीया बेटीमाया महर्जनले पञ्चायतदेखि गणतन्त्रसम्म धेरै पटक मतदान गरिन्। यसपटक उनले आफ्नै घरआँगनका जनप्रतिनिधिले विकासका पूर्वाधार बनाइदिउन् भन्ने अपेक्षा भएको बताइन्।
‘जनतालाई सास्ती नहोस्। देशमा शान्ति कायम होस्। कोहि पनि उपचार नपाएर नमरुन्। खान लाउन नपाएको देख्न नपरोस्,’ उनले भनिन्।
सावित्री धिताल
६० वर्षिया सावित्री धितालले पनि सोही मतदान केन्द्रमा मतदान गरिन्। उनका छोरा वैदेशिक रोजगारीमा छन्। उनका श्रीमान् स्वर्गीय निर्मल धिताल पञ्चायतकालको निर्वाचनमा काभ्रेबाट उम्मेदवारसमेत बनेका थिए।
पहिलाको चुनावमा धाँधली हुने र झैँझगडा पनि धेरै हुने उनी बताउँछिन्। तर, अहिले शान्तिपूर्ण मतदान हुने गरेको भन्दै उनले खुसी व्यक्त गरिन्। उनले पनि रोजगारी र स्वास्थ्यमा नै चासो राखिन्।
‘मेरो छोराजस्ता लाखौँ युवा देशमा रोजगारी नपाएर विदेशिएका छन्। देशमै रोजगार मिलोस्। यहि काम गरेर खाने वातावरण बनोस्। विकास विस्तारै हुँदै जान्छ,’ उनले भनिन्। यहाँका युवाशक्ति विदेश जान बाध्य भएको देखेर आफूलाई चुनावमा भोट हाल्न पनि दिक्क लाग्ने गरेको उनी बताउँछिन्।
फोहोर व्यवस्थापन र खानेपानीको व्यवस्था होस् भन्ने उनको अपेक्षा छ। बागमती किनारामा बसेका वास्तविक सुकुम्बासीको पहिचान गरी तिनीहरूको व्यवस्थापन हुनुपर्ने उनी बताउँछिन्।
सोही मतदान केन्द्रमा भेनिएका सुरेश महर्जनले भने यो पटक मतदान झन्झटिलो भएको बताए। ‘परिचय पत्र पाँच ठाउँ देखाउनुपर्ने बनाएका छन्। त्यसले गर्दा अलमल र झन्झट भयो,’ उनले भने। उनले पनि ललितपुर महानगरपालिकामा फोहोर र खानेपानीको व्यवस्थापन नहुँदा जनताले सास्ती पाएको बताए।
भक्तपुर नगरपालिकाको वडा न. १ स्थित भक्तपुर बहुमुखी क्याम्पसको मतदान केन्द्रमा बिहान निकै भिडभाड थियो। तर, दिउँसो छिटपुट मतदाता मात्र मतदानमा सहभागी छन्। त्यहाँ ९३ वर्षीया विष्णुमाया शिल्पकार बुहारीको सहयोगमा मतदान गर्न आएकी छिन्।
उनले पनि यसपटक मतदान गर्न सहज भएको बताइन्। ज्येष्ठ नागरिकलाई सहजै मतदानको व्यवस्था गरिदिएको भन्दै उनले खुसी व्यक्ति गरिन्।
सोही केन्द्रमा भेटिएका बाबुकाजी धौबञ्जारले यसपटक स्थानीय विकासको अपेक्षा गरेर आफ्नो मताधिकार प्रयोग गर्न आएको बताए। उनले पनि अब रोजगारी सिर्जना गरेर युवालाई विदेशिनबाट रोक्नुपर्ने बताए।
त्यस्तै कृष्णा तिवारी छोराको साहारामा मतदान गर्न सोही मतदान केन्द्रमा आएकी छिन्। ह्विल चेयरमा आएकी उनले सडकको राम्रो व्यवस्था गर्न अबको स्थानीय सरकारलाई सुझाव दिइन्।
गोविन्द अमात्य
उता, काठमाडौँ महानगरपालिका वडा नं. २९ को नेपाल कमर्स क्याम्पस मतदान केन्द्रमा दिउँसो भेटिएका गोविन्द अमात्य मतदान गरेर बाहिर निस्किँदैथिए। बानेश्वरको सर्यटोलका स्थायी बासिन्दा अमात्यलाई पनि यो पटकको निर्वाचन व्यवस्थित भएको बताए। ‘पहिला बिहानै आएर लाइन लाग्नुपथ्र्यो। तर, अहिले भने जतिखेर आए पनि केही बेरमा नै मतदान गर्न पाइने भएछ,’ उनले भने।
अबको स्थानीय सरकारले स्वास्थ्य क्षेत्रमा राम्रो काम गरिदियोस् भन्ने चाहेको उनले बताए। ‘यहाँका निजी अस्पताल महँगो छ। सबैले पैसा तिरेर उपचार गर्न सक्दैनन्। त्यसैले सरकारी तवरबाट उपचार गर्ने वातावरण सिर्जना गरिदिए हुन्थ्यो,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
