काठमाडौं– राष्ट्रिय प्रजातन्त्र पार्टीले धनुषाको सबेला नगरपालिका वडा नम्बर ४ का वडा सदस्यका लागि आफ्नो पार्टीका उम्मेदवार समशुल राइन मियाँमाथि आक्रमण भएको जनाएको छ। चुनाव प्रचारका क्रममा मियाँमाथि आक्रमण भएको जनाउँदै राप्रपाले घटनामा संलग्नमाथि कारबाहीको माग गरेको छ।
राप्रपाका प्रवक्ता मोहन श्रेष्ठले एक विज्ञप्ति जारी गर्दै नेकपा एमालेका कार्यकर्ताले आफ्नो पार्टीका उम्मेदवारमाथि आक्रमण गरेको जनाएका छन्।
पार्टीको नीति, विचार, सिद्धान्तको प्रवर्द्धन र आफ्नो चुनावी प्रतिबद्धताको प्रचार गर्दै घरदैलोको क्रममा मतदातासामू गइरहेको अवस्थामा मियामाथि एमालेले उमेदवारी फिर्ता लिन दबाब दिएर आक्रमण गरेको राप्रपाको विज्ञप्तिमा उल्लेख छ।
मियाले पार्टीको पक्षमा दृढतापूर्वक प्रचार गर्ने अडान लिएपछि उनी र उनको परिवारका ७ जना सदस्यमाथि सांघातिक हमला भएको राप्रपाका प्रवक्ता श्रेष्ठले जनाएका छन्।
घटनामा संलग्नलाई पक्राउ गर्न, दोषीलाई कडा कारबाही गर्न र घाइतेको उपचारको प्रबन्ध गर्न राप्रपाले माग गरेको छ।
त्यसैगरी रुकुम पश्चिम जिल्लाको मुसिकोट नगरपालिका वडा नं–१ मा राप्रपाका वडा अध्यक्ष पदका उमेदवार लिलिबिर बिसीको चुनाव प्रचारका क्रममा माओवादीले बाटो छेकेर धम्क्याउने, पार्टीको झण्डा च्यातरे फालिदिने र उमेदवारलाई लछारपछार गरिएको भन्दै राप्रपाले दु:ख व्यक्त गरेको छ।
‘यस्ता घटनाले निर्वाचन मार्फत् उपयुक्त दल र उपयुक्त जनप्रतिनिधि छनौट गर्ने जनताको अधिकार समेत कुण्ठित भएको छ, ’ विज्ञप्तिमा भनिएको छ, ‘भयरहित निर्वाचनको वातावरण बनाउन राप्रपा सरकार र निर्वाचन आयोगको गम्भीर ध्यानाकर्षण गराउँदछ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
