झापा– नेकपा एमालेका अध्यक्ष केपी शर्मा ओलीको प्रतिनिधिसभा निर्वाचन क्षेत्रमा दमक नगरपालिका पनि पर्छ। झापाको क्षेत्र नं. ५ बाट गएको संसदीय निर्वाचनमा ओलीले निकटतम् प्रतिश्पर्धीभन्दा करिब २८ हजार बढी मत पाएर विजयी भएका थिए। ओलीले ५७ हजार १३९ मत पाउँदा कांग्रेसका खगेन्द्र अधिकारीले २७ हजार ८४२ मत ल्याएका थिए।
आगामी वैशाख ३० गते हुन गइरहेको स्थानीय तहको निर्वाचनमा भने एमालेलाई राप्रपा नेतृत्वको गठबन्धनले कडा चुनौती दिने भएको छ। राप्रपाका राम थापा पुनः मेयरको उम्मेदवार भएका छन्। उपमेयरमा कांग्रेसकी रेगिना भट्टराई उम्मेदवार बनेकी छिन्। गठबन्धनमा नेकपा माओवादी केन्द्र पनि समावेश छ। जसपा भने गठबन्धनमा छैन।
यता, एमाले एक्लै चुनावी प्रतिश्पर्धामा छ। एमालेले निवर्तमान उपमेयर गीता अधिकारीलाई मेयरको र अम्बिका खनाललाई उपमेयरको उम्मेदवार बनाएको छ।
गएको निर्वाचनमा राप्रपा, माओवादी केन्द्र र कांग्रेस क्रमशः दोस्रो, तेस्रो र चौँथो भएका थिए। तीन ठूला दलबीच गठबन्धन भएकाले यसपटक एमालेलाई चुनौती दिने देखिएको छ।
यस्तो थियो २०७४ को मत परिणाम
२०७४ सालमा एमालेले फराकिलो अन्तरमा जित हासिल गरेको थियो। मेयरमा एमालेका रोमनाथ ओलीले राप्रपाका राम थापालाई पराजित गरेका थिए।
रोमनाथ ओलीले १० हजार ८०६ मत पाउँदा राप्रपाका उम्मेदवार थापाले ७ हजार ६५५ मत पाएका थिए। त्यस्तै, माओवादी केन्द्रका उम्मेदवार रेवतराज पुरीले ६ हजार ८९८ र कांग्रेसका उम्मेदवार ढुण्डीराज भण्डारीले ५ हजार ५३९ मत पाएका थिए।
दमकमा पाँच वर्षअघि ४६ हजार ५२३ जना मतदाता थिए। जसमध्ये ७७ प्रतिशत अर्थात्, ३४ हजार २० मत खसेको थियो।
यसपटक दमकमा ११ हजार नयाँ मतदाता थपिएका छन्। कुल ५८ हजार १७६ मतदातामध्ये पुरुष २८ हजार ५२६ र महिला २८ हजार ८८१ जना छन्।
दाबी आ–आफ्नै
राप्रपा–कांग्रेस गठबन्धनबाट उम्मेदवार भएका थापाले घरदैलो कार्यक्रमबाट आफूहरु निकै उत्साही भएको बताएका छन्। नेपाल लाइभसँग कुरा गर्दै उनले दोस्रो, तेस्रो र चौँथो शक्तिबीच तालमेल भएकाले जित्नका लागि कुनै अप्ठ्यारो नरहेको दाबी गरे।
विगतमा एमालेले नगरमा काम गर्न नसकेका कारण पनि आफूहरुलाई सहज भएको उनको दाबी छ। ‘विगत पाँच वर्षको अवधिमा जनता निरास भए। कामै भएन। अहिले घरदैलो गर्दा मतदाताहरुले मलाई साथ दिने वचन दिएका छन्,’ उनले भने।
यता एमाले झापा जिल्ला अध्यक्ष दीपक कार्कीले जिल्लाको अधिकांश स्थानीय तहमा आफ्नो पार्टीले जित हात पार्ने दाबी गरे। गत वर्षभन्दा यस पटक जितको अन्तर पनि बढ्ने उनको दाबी छ। अघिल्लो पटक उपमेयर भएर गीता अधिकारीले धेरै काम गरेकाले पनि आफूहरूलाई अहिले मत माग्न सजिलो भएको उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
