चितवन- नेकपा एमालेका अध्यक्ष केपी शर्मा ओलीले प्रधानमन्त्री एवं नेपाली कांग्रसका सभापति शेरबहादुर देउवा र माओवादी केन्द्रका अध्यक्ष पुष्पकमल दाहाल 'प्रचण्ड'लाई कारबाही किन नगरेको भन्दै निर्वाचन आयोगसँग प्रश्न गरेका छन्।
प्रधानमन्त्री देउवाले माओवादी केन्द्रकी उम्मेदवार रेनु दाहाल र प्रचण्डले काठमाडौं महानगरमा कांग्रेस उम्मेदवार सिर्जना सिंहलाई मत मागेको भन्दै आयोगले कारबाही गर्नुपर्ने ओलीको भनाइ थियो।
सोमबार भरतपुरको सभालाई सम्बोधन गर्दै ओलीले निर्वाचन आयोगले अन्य दलको झण्डा बोक्ने साना दल र अन्यलाई कारबाही गर्ने धम्की दिएको भए पनि सत्तारुढ दलहरुलाई कारबाही नगरेको भन्दै आक्रोश पोखे।
‘निर्वाचन आयोग भन्छ आफ्नो बाहेक अरु पार्टीको झण्डा बोक्न पाइँदैन। प्रचण्डलाई किन कारबाही नगरेको, सिर्जना सिंहलाई काठमाडौंमा भोट माग्दा’ उनले भने ‘शेरबहादुर देउवालाई रेनु दाहाललाई मत देउ भनेर माग्दा किन कारबाही भएन?’
निर्वाचन आयोगले ह्विप जारी गर्न नमिल्ने भन्दै उनले जनतलाई धम्काउन कसैले पनि नमिल्ने बताए। गठबन्धनका नेता एवं माओवादी केन्द्रका अध्यक्ष प्रचण्डप्रति लक्षित गर्दै ओलीले भने ‘धम्काएको भरमा भोट लिन खोज्ने कार्य आचारसंहिता विपरित हो कि हैन?’
उनले नेपाली कांग्रेसका कार्यकर्ताप्रति सहानुभुति देखाउनु पर्ने अवस्था आएको टिप्पणी गरे।
‘कांग्रेसका कार्यकर्ताले कसरी मन थामेका होलान्। जिन्दगीभर कांग्रेस बनेर हिँडेकाहरु कसरी बसेका होलान्’ उनले भने ‘एउटा गीत जस्तो पोहोर पनि ढाट्यौ आमा यसपालि पनि .......।’ त्यस्तै उनले चितवन पुगेर प्रचण्डले रेनुले नजिते गठबन्धन नटिक्ने, जिते २० वर्ष टिक्ने भनि गरेको टिप्पणीको आलोचना गरे। ‘छोरीले जिते भने २० वर्ष गठबन्धन टिकाउने रे ’ उनले भने ‘२० वर्षसम्म छोरी , अनि ज्वाई, अनि भाईलाई जिताउने अनि कांग्रेसको पालो कहिल्यै आउला विचरा।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
