काठमाडौं– कुनै बेलाका सुपरस्टार अभिनेता हुन् दिलिप रायमाझी। २२ वर्षअघि प्रदर्शनमा आएको फिल्म ‘आदिकवि भानुभक्त’बाट अभिनयमा पाइला राखेका उनले एक समय त्यत्तिबेलाका सर्वाधिक चर्चित नायक राजेश हमाललाई नै चुनौती दिने अवस्था सिर्जना भएको थियो।
तर, उनै दिलिप केही समय यता पर्दामा कम देखिएका छन्। विभिन्न रियालिटी शोमा त उनको उपस्थिति छ। तर, चलचित्रमा भने उनी पुरानै शैलीमा देखिएका छैनन्।
दिलिपले पछिल्लो पटक २०१८ मा ‘नाइ नभन्नु ल ५’मा काम गरेका थिए। उक्त फिल्म सफल फिल्म श्रृङखलाकै निरन्तरता भएता पनि हलमा अघिल्ला फिल्मले जस्तो सफलता पाएको थिएन्। फिल्मको अभिनयपछि दिलिप केही रियालिटी शोमा निर्णायकको भूमिकामा पुगे। नृत्यमार्फत नै आफ्नो करिअर सुरु गरेका दिलिपले ‘द डान्सिङ स्टार्स विथ नेपाल’ कार्यक्रममा निर्णायकको भूमिका निभाएका थिए।
अन्नतः दिलिपको अभिनय रहेको फिल्म चार वर्षपछि प्रदर्शनमा आउँदै छ। शुक्रबारबाट उनको अभिनय रहेको फिल्म ‘लक्का जवान‘ देशभर प्रदर्शन हुँदै छ। शिवहरी पौड्यालको निर्देशनमा बनेको यो फिल्म हास्यव्यंग्यमा आधारित रहेर सामाजिक कथा भन्ने फिल्म हो।
दिलिपका लागि यो फिल्म ‘कमब्याक’को अवसर हो। फिल्मका अन्य निर्माण पक्ष र कलाकारका लागि पनि फिल्म एउटा चुनौती बनेको अवस्था छ। दर्शकमाझमा दक्षिण भारतीय फिल्मको धेरै क्रेज र हास्यव्यंग्य विधामा पनि नौलोपनको खोजी बढिरहेको बेला यो फिल्मले कस्तो परिणाम ल्याउँछ, त्यो त हेर्न बाँकी नै छ।
तर, फिल्म राम्रोसँग चलेमा दिलिपलाई भने राम्रै फाइदा पुग्छ। नयाँ पुस्तामा फेरि देखिने अवसर र पुराना पुस्ताको यादलाई फेरि ताजा बनाउने बाटो। के दिलिपलाई फाप्ला त ‘लक्का जवान’?
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
