धनगढी– टीकापुर घटनामा जेल जीवन बिताइरहेका रेशम चौधरीको प्रभाव क्षेत्रका रुपमा चिनिन्छ, टीकापुर नगरपालिका। बैशाख ३० गते हुन लागेको स्थानीय तहको निर्वाचनमा टीकापुरको नेतृत्वका लागि रेशम चौधरीकी पत्नी रञ्जीता श्रेष्ठ नेतृत्वको नागरिक उन्मुक्ति पार्टीले प्रमुख दलहरूसँग प्रतिस्पर्धा गर्दैछ।
तीन महिनाअघि दर्ता भएको सो पार्टीबाट प्रमुखमा रामलाल डगौरा थारु र उपप्रमुखमा उल्कादेवि विश्वकर्माले उम्मेदवारी दिएका छन्। २०७४ को स्थानीय निर्वाचनमा तत्कालीन मधेसी जनअधिकार फोरम (लोकतान्त्रिक) पार्टीका लौटन चौधरी दोस्राे स्थानमा रहँदै पराजित बनेका थिए। लौटन विजयकुमार गच्छदारसँगै नेपाली कांग्रेसमा पुगे भने केही वडामा निर्वाचित जनप्रतिनिधिहरू नागरिक उन्मुक्ति पार्टीमा समाहित भएका छन्।
आठ वडा रहेको टीकापुर नगरपालिकामा २०७४ को स्थानीय तहको निर्वाचनमा नेकपा एमालेका उम्मेदवार तपेन्द्र रावल प्रमुखमा निर्वाचित भएका थिए भने उपप्रमुखमा नेपाली कांग्रेसकी केशरी विष्ट निर्वाचित भएकी थिइन्। चार वडा माओवादी केन्द्र, तीन वडा मधेसी जनअधिकार फोरम (लोकतान्त्रिक) र एक वडामा नेकपा एमालेले विजयी भएका थिए।
तर, अहिले आफूहरू प्रमुख प्रतिस्पर्धी रहेको बताउँछन्, रामलाल। भन्छन्, ‘दुई गठबन्धन भए पनि यहाँ हामी प्रमुख प्रतिस्पर्धी रहेका छौं। हाम्रो नारा, अजेण्डा नै हाम्रो जित्ने आधार हो।’ दर्ता भएको चार महिनामै नागरिक उन्मुक्ति पार्टीले टीकापुरमा आफ्नो बलियो पकड बनाउन लागेको अन्य दलहरूको पनि समीक्षा छ।
‘हामी सबैभन्दा अगाडि छौं। हामी सबै वडा जित्छौं भन्ने लागिरहेको छ’ उनले भने, ‘जातीय विचार, टीकापुर घटना, झुटा मुद्दा लगाई पक्राउ गर्नु, लाल आयोगको प्रतिवेदन सार्वजनिक गर्नुपर्ने माग, संविधान संशोधन गराउन दबाब दिने, खुटिया नदीदेखि बर्दियाका दुई गाउँपालिकालाई जोडेर छुट्टै जिल्ला बनाउन दबाब दिने लगायतका मुद्दा र अजेण्डाप्रति नागरिककाे आकर्षण छ।’
उनले ४२ प्रतिशत थारु समुदाय, १४ प्रतिशत दलित समुदाय तथा टीकापुर घटनामा झुटा मुद्दा लगाइएकाे विराेधमा रहेका केही वर्गहरूले आफ्नो पार्टीलाई समर्थन गरेको बताए। अघिल्लोपटक फोरमबाट निर्वाचित तीनै जना वडाध्यक्षहरू आफ्नै पार्टीबाट उम्मेदवार भएको चौधरीले बताए। उनको दाबी छ, ‘गठबन्धन दल र नेकपा एमाले हाम्रो पार्टीभन्दा कमजोर छन्।’
टीकापुर नगरपालिकामा ४७ पदका लागि २ सय ८६ जनाले उम्मेदवारी दर्ता गराएका थिए। निर्वाचन अधिकृतको कार्यालय टीकापुरका अनुसार प्रमुख पदमा १२ जना र उपप्रमुख पदमा ११ जनाको उम्मेदवारी परेको थियो। प्रमुख पदमा नौ जना राजनीतिक दलबाट तथा तीन जना स्वतन्त्र र उपप्रमुखमा नौ जना राजनीतिक दलबाट र २ जनाले स्वतन्त्र उम्मेदवारी दर्ता गराएका थिए । जसमध्ये नगर प्रमुख पदका उम्मेदवार माओवादी केन्द्रका आशा चौधरी, स्वतन्त्र उम्मेदवार विष्णुप्रसाद ढुंगाना, उपप्रमुखतर्फ स्वतन्त्र प्रकाश खड्काले उम्मेदवारी फिर्ता लिएका छन्।
टीकापुर नगरपालिकामा नेकपा एमालेले नगर प्रमुखमा श्याम खत्री र उपप्रमुखमा उपमा केसी, नेपाली कांग्रेसबाट नगर प्रमुखमा नवराज रावल, नेकपा माओवादी केन्द्रबाट उपप्रमुखमा खडकबहादुर शाह चुनावी प्रतिस्पर्धामा छन्।
यस्तै, नेपाली कांग्रेस बीपीबाट उपप्रमुखमा मिनादेवी साउँद, जनता समाजवादी पार्टीबाट प्रमुखमा धरमबहादुर घर्तिमगर र उपप्रमुखमा पिंकी बिक, राप्रपाबाट प्रमुखमा गोविन्द रिमाल र उपप्रमुखमा सरस्वती बोहरा, नेपाल लोकतान्त्रिक पार्टीबाट प्रमुखमा प्रेमबहादुर चौधरी र उपप्रमुखमा पार्वती चौधरी, संघीय लोकतान्त्रिक मञ्चबाट प्रमुखमा गोपाल कर्मी र उपप्रमुखमा सुनिता विक, मौलिक जरोकिलो पार्टी नेपालबाट प्रमुखमा राजकुमार विष्ट र उपप्रमुखमा हिरादेवी थारु पनि चुनावी मैदानमा छन्।
सत्ता गठबन्धनका उम्मेदवार नेपाली काँग्रेसका नवराज रावलले भने कुनै दल आफ्नो प्रतिस्पर्धी नरहेको दाबी गरे। उनले भने, ‘काँग्रेस, नेकपा माओवादी केन्द्र, एकीकृत समाजवादी लगायत पाँच दलीय गठबन्धनका कारण नगरपालिकामा म बलियो उम्मेदवार हुँ।’
नेपाली काँग्रेसका कैलाली सभापति नरेशकुमार खत्रीले सत्ता गठबन्धनका उम्मेदवार सरल, सहज, नगरवासीले रुचाएका व्यक्ति भएकाले उनलाई प्रतिस्पर्धामा कुनै गाह्रो नभएको बताए।
अघिल्लो निर्वाचनमा प्रमुख पदमा विजयी भएको नेकपा एमाले भने यसपटक तेस्रो दल हुने सो क्षेत्रका राजनीतिक दलहरूको आँकलन छ। २०७४ को निर्वाचनमा ३९ हजार एक सय ९२ मतदाता रहेकोमा २६ हजार ९२९ मत खसेको थियो।
सोमध्ये नेकपा एमालेका नगर प्रमुखका उम्मेदवार तपेन्द्र रावलले पाँच हजार ९५९ मत प्राप्त गरी निर्वाचित भएका थिए भने उनका प्रतिस्पर्धी तत्कालीन मधेसी जनअधिकार फोरम (लोकतान्त्रिक) पार्टीका लौटन चौधरीले पाँच हजार ५३४ मत प्राप्त गरेका थिए।
सो स्थानीय तहमा नेपाली कांग्रेसका उम्मेदवार तेस्रो र नेकपा माओवादी केन्द्र चौंथो दल बनेको थियो।
५२ हजारभन्दा बढी मतदाता
टीकापुर नगरपालिकामा ५२ हजारभन्दा बढी मतदाता छन्। जिल्ला निर्वाचन कार्यालय कैलालीका अनुसार सो नगरपालिकामा २५ हजार ६४ पुरुष, २७ हजार ८०७ महिला र अन्य एक गरी ५२ हजार ८७२ मतदाता छन्।
आसन्न स्थानीय तहको निर्वाचनमा टीकापुरमा १६ वटा मतदानस्थल र ५७ मतदान केन्द्र रहने छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766673313.png)
-1764146706.png)
-1766648928.png)
-1763721444.png)
