जनकपुर– गएको सोमबार जनकपुरधाम उपमहानगरको पाँच दलीय सत्ता गठबन्धनको बैठकले मेयरमा लालकिशोर साह र उप–मेयरमा किशोरी साहलाई जिताउन सबै मिलेर प्रचारमा लाग्ने निर्णय गर्यो। गठबन्धन दलका कतिपय असन्तुष्ट नेताले स्वतन्त्र उम्मेदवारी दर्ता गरेपछि यस्तो निर्णय गरिएको थियो।
गठबन्धनको भागबन्डामा जनकपुरधामको मेयर जसपा र उपमेयर कांग्रेसको भागमा परेको छ। तर, असन्तुष्ट नेपाली कांग्रेसका नेताहरुले बागी उम्मेदवारी दिएका छन्। कांग्रेसका जनकपुरधाम उपमहानगर कमिटीका अध्यक्ष मनोज साह मेयरका आकांक्षी थिए। मेयर जनता समाजवादी पार्टी (जसपा)को भागमा परेपछि उनले कांग्रेसको नगर सभापतिबाट राजीनामा दिएर स्वतन्त्र उम्मेदवारी दर्ता गराएका हुन्।
सत्ता गठबन्धनको तर्फबाट निवर्तमान मेयर लालकिशोर साह जसपाको तर्फबाट पुनः उम्मेदवार छन्। कांग्रेसका किशोरी साह उपमेयरका उम्मेदवार छन्। त्यस्तै लोकतान्त्रिक समाजवादी पार्टी (लोसपा)बाट मेयरमा मनोजकुमार चौधरी र उपमेयरमा निवर्तमान उपमेयर रीताकुमारी मिश्रले उम्मेदवारी दिएका छन्।
एमालेबाट शिवशंकर साह मेयरमा तथा रुना झा उपमेयरमा उम्मेदवार बनेका छन्। उपमेयरको टिकट पाउने भएपछि रुना झा कांग्रेस परित्याग गरेर एमाले प्रवेश गरेकी थिइन्। त्यसैगरी रमण कन्ट्रक्सनका मालिक एवं निर्माण व्यवसायी बलराम महतो र इन्जिनियर रविकान्त लाललगायतले पनि स्वतन्त्र रुपमा मेयरमा उम्मेदवारी दिएका छन्।
२०७४ सालमा तत्कालीन राजपा हाबी
जनकपुरधाम उपमहानगरमा २०७४ सालको स्थानीय निर्वाचनमा तत्कालीन राष्ट्रिय जनता पार्टी (राजपा) हाबी भएको थियो। राजपाका उम्मेदवार लालकिशोर साहले निकटतम प्रतिश्पर्धीलाई साढ १० हजारभन्दा धेरै मतले पराजित गरेका थिए।
साहले २१ हजार ९०३ मत पाएका थिए। निकटम् प्रतिस्पर्धी कांग्रेसका मनोज साह सुडीले ११ हजार १६४ मत पाएका थिए। एमालेका उम्मेदवार लक्ष्मीनारायण भगतले ४ हजार ८६५, तत्कालीन संघिय समाजवादी फोरमका विष्णुदेव शाहले ३ हजार ६१२ र नेकपा माओवादी केन्द्रका चन्द्रशेखर साहले २ हजार १२८ मत पाएका थिए।
२०७४ सालमा ७५ हजार ५९४ मतदाता थिए। यस पटक ११ हजार मतदाता थपिएका छन्। उनीहरु जितका लागि निर्णायक हुन सक्छन्। अहिले जनकपुरमा कुल ८६ हजार ७६९ मतदाता छन्। जसमा पुरुष ४७ हजार ५०८ र महिला ३९ हजार २५८ जना छन्।
जनकपुरमा यसपटक पनि गठबन्धन उम्मेदवार लालकिशोर साहलाई बलियो प्रतिश्पर्धी मानिएको छ। तर, नेपाली कांग्रेसभित्रको विवाद र जसपामा आएको विभाजन उनीहरूका लागि चुनौती बन्न सक्छ। एमालेले पनि पछिल्लो चरणमा आफ्नो अवस्था सुधार गरेका कारण यहाँ चार पक्षीय प्रतिश्पर्धा हुन सक्छ।
गठबन्धनलाई बागी उम्मेदवारको डर!
जनकपुरमा सत्ता गठबन्धनका मेयर उम्मेदवार साहलाई विरासत जोगाउन सबैभन्दा ठूलो डर कांग्रेस छाडेर स्वतन्त्र उम्मेदवारी दिएका मनोज साहको छ। यसपटक कांग्रेस जनकपुरधाममा आफ्नो बर्चश्व फर्काउने दाउमा थियो। तर, गठबन्धनको भागबन्डामा यो उपमहानगर जसपालाई छाड्नुपर्ने भएपछि कांग्रेसका नेता तथा कार्यकर्ता निराश बनेका छन्।
नगर सभापतिबाट राजीनामा गरेर स्वतन्त्र उम्मेदवार बनेका मनोज साहलाई उम्मेदवारी फिर्ता गराउने कांग्रेस र गठबन्धन दलले प्रयास गरेका थिए। उनले उम्मेदवारी कायम राखेपछि घण्टाघर चुनाव चिह्न पाएका छन्। उनले उक्त चिह्न नमूना मतपत्रमा नभएको भन्दै निर्वाचन कार्यालयमा धर्नासमेत दिएका थिए। पछि आयोगले त्यसलाई सच्चाएपछि घर दैलोमा फर्केका छन्। उनले कांग्रेसकै मत धेरै पाउने हुँदा गठबन्धनलाई चुनौती देखिएको छ।
निधिलाई साख जोगाउने चुनौती
जनकपुरधामको मेयर जसपाको भागमा परे पनि प्रतिनिधिसभातर्फ धनुषा क्षेत्र नं. ३ मा पर्ने भएकाले कांग्रेस नेता विमलेन्द्र निधिको चासो छ। उनी २०७४ सालको संघीय संसदको निर्वाचनमा यही क्षेत्रबाट उम्मेदवार भए पनि राजपाका राजेन्द्र महतोसँग पराजित भएका थिए।
आफ्नो निर्वाचन क्षेत्रका साथै गृह जिल्लासमेत भएकाले गठबन्धनभित्रको विवाद मिलाउन निधि केही दिनअघि जनकपुर पुगेका थिए। उनले नगर सभापति साहलाई स्वतन्त्र उम्मेदवार नहुन मनाउने प्रयास पनि गरेका थिए। महतोले २७ हजार ४९९ र निधिले २४ हजार ४७७ मत पाएका थिए। महतोलाई तत्कालीन वाम गठबन्धनले सघाएको थियो।
यस पटकको निर्वाचनमा गठबन्धनलाई जिताएर निधि आफ्नो आधार खडा गर्न चाहन्छन्। यसपटक जसपा विभाजित भएपछि महतो लोसपातर्फ छन्। त्यही कारण पनि निधि आगामी चुनावका लागि आफूलाई सहज बनाउन लागि परेका छन्।
के भन्छन् उम्मेदवार?
सत्ता गठबन्धनका मेयरका उम्मेदवार लालकिसोर साहले आफूहरु जिततिर अग्रसर भएको बताए। उनले गठबन्धनमा यसअघि विवाद देखिए पनि अहिले आफूहरू मिलिसकेको दाबी गरे। २०७४ सालमा आफूले थालेका कतिपय योजना पूरा गर्न पनि जनकपुरबासीले फेरि आफूलाई जिताउने विश्वास रहेको उनको भनाइ छ।
स्वतन्त्र उम्मेदवार मनोज साहले अहिलको निर्वाचनमा कसले जित्छ भनेर भन्न सक्ने अवस्था नभएको बताए। ‘अहिले नै कसले जित्छ भन्न सकिँदैन। गठबन्धनमा मिलेको छैन। हामीलाई जनताले साथ दिएका छन्,’ उनले भने, ‘विगतमा मेयर भएर धेरै काम नगरेकाले उहाँलाई जनताले मत दिँदैनन् भन्ने हाम्रो विश्वास हो।’
त्यस्तै अर्का स्वतन्त्र उम्मेदवार एवं ठेकेदार बलराम महतोले आफूले जित्ने दाबी गरे। उनले यस पटक जनपुरधामका मतदाताले विकासप्रेमी उम्मेदवार छान्ने दाबी गरे। एमाले उम्मेदवार शिवशंकर साह र लोसपा उम्मेदवार मनोजकुमार चौधरीले सबै प्रतिस्पर्धीहरू अहिले बराबर अवस्थामा रहेको बताए।
दुई जना स्वतन्त्र उम्मेदवारले धेरै मत लैजाने भएकाले जनकपुरधाममा अहिले कुनै प्रष्ट चित्र नआएको स्वयम् कांग्रेसका जिल्ला सभापति योगेन्द्र पञ्जियार बताउँछन्। ‘नेपाली कांग्रेसका केही साथीहरूले विद्रोह गर्नु भएको छ। कांग्रेस आएर मेयर उठ्न खोजेका ठेकेदार बलराम महतोले पनि उम्मेदवारी दिनुभएकाले अहिले अन्योलको अवस्था छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1792292945.webp)
-1786602170.png)
