काठमाडौं– केही दिनअघि बलिउड अभिनेता सलमान खानले दक्षिण भारतीय फिल्मको चर्चाको विषयलाई लिएर प्रश्न गरेका थिए, ‘आखिर हिन्दी फिल्म दक्षिण भारतमा किन चल्दैन?’ प्रसंग थियो बढिरहेको दक्षिण भारतीय फिल्मको प्रभाव।
पछिल्लो समय भारतसँगै अन्य देशमा बढिरहेको दक्षिण भारतीय फिल्मको प्रभावको विषयलाई लिएर उनले यो प्रश्न गरेका थिए।
वैशाख १ बाट प्रदर्शनमा आउन लागेको फिल्म ‘केजिएफ २’का अभिनेता यशले सलमानको प्रश्नको जवाफ दिएका छन्। फिल्मको प्रचारलाई लिएर व्यस्त यशले एक अन्तर्वार्तामा सलमानको प्रश्नको जवाफ दिएका हुन्।
यशले दक्षिण भारतमा हिन्दी फिल्म चल्दै नचल्ने अवस्था नभएको बताए। उनका अनुसार दक्षिण भारतीय फिल्मलाई यस्तो किसिमको साथ कहिल्यै दिइएको थिएन। हिन्दी भाषामा डब गरेर फिल्मलाई प्रदर्शन गर्न सुरु गरिएसँगै यो चलनको सुरुवात भएको यशले बताएका छन्। उनका अनुसार दक्षिण भारतीय फिल्म हिन्दी भाषामा आउन थालेसँगै दर्शक यसको कथासँग परिचित भएको र उनीहरुलाई यी फिल्महरुले मनोरञ्जन दिने भएकाले दक्षिण भारतीय फिल्महरुले इतिहासमै कहिल्यै नपाएको चर्चा पाएका हुन्।
यशले विगतमा दक्षिण भारतीय फिल्म क्षेत्रलाई कसैले पनि यस्तो महत्व नदिएको बताए। मनोरञ्जनका लागि ‘मजाक’को रुपमा हेरिने क्षेत्रका फिल्महरुले भन्ने कहानी र फिल्म बनाउने शैलीको फरकपनले यी फिल्महरुलाई विस्तारै चर्चामा ल्याएको उनले बताए।
यशले भने, ‘यस्तो रातारात भएको होइन। यो केही वर्षदेखि चलिरहेको परम्परा हो। अन्ततः अहिले दर्शकहरुले फिल्मको कन्टेन्ट, एक्सप्रेसन र निर्देशनलाई सम्झन थालेका छन्। दर्शक ‘बाहुबली’, एस एस राजमौली, प्रभास र अहिले केजिएफसँग जोडिने मौका पाएका छन्।’
यशले आफ्नो परम्परा र संस्कार अरुको भन्दा फरक भए पनि यी कुराहरु कमजोरी नभएर तागत भएको बताए। उनले यी सबै पक्षहरुका कारण दक्षिण भारतीय फिल्महरु चर्चामा आएको बताए।
वैशाख १ बाट प्रदर्शनमा आउन लागेको यशको फिल्म ‘केजीएफ २’ अहिले निकै चर्चामा छ। फिल्मको प्रचारका लागि निर्देशकदेखि कलाकारहरुसमेत व्यस्त छन्। भारतसँगै नेपालमा पनि फिल्मको पहिलो दिनको प्रदर्शनको विषयलाई लिएर एड्भान्स बुकिङ व्यापक रुपमा भएको छ। फिल्मको हिन्दी भर्जनले केही साताअघि प्रदर्शनमा आएको फिल्म ‘आरआरआर’को एड्भान्स बुकिङमा भएको रेकर्डलाई पनि तोडेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
