काठमाडौं– अर्थतन्त्र कमजोर बनाउन भूमिका खेलेको, महत्वपूर्ण सूचना चुहाएको र पूर्वप्रधानमन्त्री केपी शर्मा ओलीको निर्देशनमा काम गरेर सरकारलाई असफल बनाउन लागिपरेको आरोपमा सरकारले राष्ट्र बैंकका गभर्नर महाप्रसाद अधिकारीमाथि छानबिन सुरु गरेको छ।
बिहीबारको मन्त्रिपरिषद् बैठकले अधिकारीमाथि छानबिन गर्न जाँचबुझ समिति गठन गर्ने निर्णय गरेपछि उनी स्वत: निलम्बनमा परेका छन्।
गभर्नर अधिकारीलाई निलम्बन गर्ने निर्णयले राजनीतिकसँगै अन्य क्षेत्रमा पनि तरंग ल्याइदिएको छ। विपक्षी दल नेकपा एमालेका नेताहरुले अर्थमन्त्री जनार्दन शर्माले आफ्नो अक्षमता लुकाउन गभर्नर अधिकारीमाथ कारबाही गरिएको आरोप लगाएका छन्।
यस्तै, चुनावको मुखमा गभर्नर निलम्बन गर्ने निर्णय सत्तारुढ गठबन्धनकै लागि प्रत्युत्पादक हुने पनि कतिपयको विश्लेषण छ।
नेकपा एमालेका उपमहासचिव विष्णु रिमालले आफ्नो अक्षमता छोप्न गभर्नरमाथि कारबाही गरिएको टिप्पणी गरेका छन्।
‘आफ्नो अक्षमता छोप्न अरूमाथि जाई लाग्नेलाई हाम्रो तिर भन्थे–‘ढङ्ग मरु–कसो गरूँ! निरन्तर बिग्रिरहेको अर्थतन्त्रलाई ठीक बाटोमा ल्याउन सबैसँग सहयोगको याचना गर्नुपर्ने बेला प्रिय अर्थमन्त्रीजी, अर्थकै ‘वैधानिक’ सल्लाहकार गभर्नरलाई निलम्बन गरेर महान काम गर्नुभयो। हिजो अस्ति के कसो करोड-सरोडको चर्चा हुनु आज “अटेर-गवर्नर”लाई निलम्बन गर्नु “स्याल कराउनु र बाख्रा हराउनु” जस्तै हो त?’रिमालले सामाजिक सञ्जालमा लेखेका छन्।
एमालेकै केन्द्रीय सदस्य एवम् प्रचार विभाग उपप्रमुख विष्णु रिजालले गभर्नर अधिकारीलाई निलम्बन गर्ने निर्णयलाई 'टाउको दुखेको औषधी नाइटोमा' लगाएको भन्दै टिप्पणी गरेका छन्।
'तस्करीको लाइन खुलाएर अर्थतन्त्र ध्वस्त बनाउने अर्थमन्त्रीलाई बर्खास्त गर्नुपर्नेमा अर्थतन्त्र सुधारका लागि सरकारलाई सुझाव दिइरहेका गभर्नरलाई निलम्बन गरेर परमादेशी सरकारले 'टाउको दुखेको औषधी नाइटोमा' लगाएको छ। यसले मुलुकलाई द्रुततर गतिमा श्रीलंकाको बाटोमा लैजानुबाहेक केही गर्दैन,' रिजालले सामाजिक सञ्जालमा लेखेका छन्।
राप्रपा नेपालका अध्यक्ष तथा पूर्व उपप्रधानमन्त्री कमल थापाले अर्थतन्त्र कमजोर बन्दै गइरहेको अवस्थामा हचुवाको भरमा गभर्नरलाई निलम्बन गर्ने सरकारको निर्णय अदूरदर्शी रहेको टिप्पणी गरेका छन्।
'अर्थतन्त्र कमजोर बन्दै गइरहेको अवस्थामा हचुवाको भरमा नेपाल राष्ट्र बैंकको गभर्नरलाई निलम्बन गर्ने सरकारको निर्णय अदूरदर्शी गैरजिम्मेवार र निन्दनीय छ। यसले समग्र आर्थिक क्षेत्रमा गलत सन्देश प्रवाहित भएको छ। यो निर्णय तत्काल सच्याउनु राम्रो हुन्छ। प्रम शेरबहादुर देउवाको ध्यान जाओस्,'थापाले सामाजिक सञ्जालमा लेखेका छन्।
विवेकशील साझा पार्टीका अध्यक्ष रवीन्द्र मिश्रले हुँदाहुँदा अब राष्ट्र बैंक पनि प्रत्यक्ष राजनीतिक हस्तक्षेपमा परेको टिप्पणी गरेका छन्।
'हुँदाहुँदा राष्ट्र बैंक नि प्रत्यक्ष राजनीतिक हस्तक्षेपमा पर्यो। सर्बोच्चदेखि प्रहरी/प्रशासन/विश्वविद्यालय, केही बाँकी छैन। बाँकी, नेपाली सेना मात्र छ। त्यो नि कहिले विथोलिने हो थाहा छैन। भोगौँ। जे रोप्यौँ त्यही फल्ने हो। कमजोरी हुनु र नियतवस राष्ट्रघाती हुनमा आकाश/जमिनको अन्तर छ,' मिश्रले सामाजिक सञ्जालमा लेखेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789010467.jpg)
-1786602170.png)
