काठमाडौं– काठमाडौं महानगरले बसन्तपुर डबलीमा बनाएको कंक्रिट संरचना भत्काउन सुरु गरिएको छ। विश्व सम्पदा क्षेत्रको अस्तित्व नै संकटमा पर्नेगरी महानगरले बसन्तपुर डबलीमा रातारात कंक्रिट संरचना बनाएको थियो।
स्थानीय र अभियन्ताले डबलीमा मापदण्ड विपरीत कंक्रिटको संरचना बनाउँदा विश्व सम्पदामा नै गम्भीर असर पुग्ने भन्दै विरोध जनाएपछि हनुमानढोका दरबार हेरचाह अड्डाले भत्काउन सुरु गरेको हो।
विश्व सम्पदा सूचीमा सूचीकृत हनुमानढोका दरबार क्षेत्रमा यसरी कंक्रिट र सिमेन्टको प्रयोग गरेर संरचना बनाउन पाइँदैन। तर,काठमाडौं महानगरपालिका प्रमुख विद्यासुन्दर शाक्यको ठाडो निर्देशनमा ८ वटा राष्ट्रिय झण्डा राख्न डबली छेउमै कंक्रिट र सिमेन्टको प्रयोग गरेर संरचना बनाएपछि यसको स्थानिय तथा पुरात्तव विदहरुले आपत्ति जनाएका थिए।
राष्ट्रिय झण्डा ससम्मान अन्य स्थानमा राख्नु पर्ने स्थानियले माग गर्दै आएका थिए। पुरातत्व विभागसँग समन्वय नगरी डबली भत्काएर महानगरले मनपरी ढंगबाट संरचना निर्माण गरेको भन्दै उक्त काम तत्काल रोक्न गत ६ फागुनमा महानगरलाई पत्र पठाएको थियो।
तर, विभागको पत्रलाई बेवास्ता गर्दै महानगरले विश्व सम्पदा सूचीमा सूचीकृत वसन्तपुर डबलीमा कंक्रिटको संरचना निर्माण गरेको हो। विभागले तत्काल काम रोक्न अर्को पत्र पठाएपनि दुईवटा पत्र पाइसकेको महानगरले त्यसको समेत बेवास्ता गर्दै संरचना तयार पारेको थियो।
त्यसपछि, महानगरकी उपमेयर हरिप्रभा खड्गीले सम्पदानै धरापमा पारेको भन्दै संरचना भत्काउन घन चलाएकी थिइन्।युनेस्को र पुरातत्त्वको मापदण्ड विपरीत करिब ३ फिट गहिरो ८ वटा कंक्रिटको आधार संरचना निर्माण गरिएको छ।
आधार संरचनामा ३५/३५ फिटको स्टिलका ८ वटा पोलहरुमा नेपालको राष्ट्रिय झण्डा फहराउने महानगरको योजना मापदण्ड विपरित भएको कारण यसको सर्वत्र विरोध भएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
