काठमाडौं- १३औं दक्षिण एसियाली खेलकुद (साग)का दोहोरो स्वर्ण पदक विजेता मन्डेकाजी श्रेष्ठले चीनको हान्झाउमा हुने १९औं एसियाली खेलकुद नखेल्ने भएका छन्।
एसियाली खेलकुदको प्रारम्भिक छनोटका रुपमा रहेको प्रथम कृष्णप्रसाद भट्टराई स्मृति राष्ट्रिय कराते प्रतियोगितामा भाग नलिएपछि उनले एसियाड खेल्ने छैनन्। एसियाड सेप्टेम्बर १० देखि २५ सम्म हान्झाउमा हुँदैछ।
मण्डेले दुई वर्षअघि स्वदेशमा भएको १३औं सागमा पुरुष एकल काता र टिम कातामा स्वर्ण जितेका थिए। टिम कातामा उनलाई महसुस मोक्तान र प्रवीण मानन्धरले साथ दिएका थिए।
१३औं सागमा करातेको टिम काताका मण्डेका सहकर्मी महसुसले प्रथम कृष्णप्रसाद भट्टराई स्मृति राष्ट्रिय कराते प्रतियोगिताको पहिलो दिन एकल कातामा स्वर्ण पदक जितेका थिए।
ललितपुरको सातदोबाटोस्थित कराते हलमा सुरु भएको प्रतियोगिताको पहिलो दिन महसुसले फाइनलमा २४.८ अंक जोडेका थिए। मण्डे राष्ट्रिय प्रतियोगितामा नेपाल पुलिस क्लबको काता प्रशिक्षकका रुपमा सहभागी छन्।
आफू नेपाल पुलिस क्लबको प्रशिक्षकको जिम्मेवारी सम्हालिरहेको बताउँदै नयाँ खेलाडीलाई मौका दिने उनले बताए।
‘सधै हामीले मात्रै खेलेर कहाँ हुन्छ र? हामीभन्दा राम्रा राम्रा खेलाडी उत्पादन भइरहेका छन्। उनीहरुले पनि खेल्ने मौका पाउन भनेर मैले यो निर्णय लिएको हुँ,’ उनले नेपाल लाइभसँग भने।
३७ वर्षीय मण्डे करातेको कातामा विशेष दख्खल राख्छन्। उनले सागमा पदक जित्न १० वर्ष निरन्तर संघर्ष गर्नुपरेको थियो। यसअघिका दुई साग उनका लागि सुखद् रहेन। सन् २०१० मा बंगलादेशमा ११औं साग हुँदा उनी २६ वर्ष पुगिसकेका थिए। त्यतिबेला उनी सागका लागि छनोट भएका थिए।
बंगलादेश सागका लागि उनले स्वर्णको लक्ष्यसहित गतिलो तयारी पनि गरेका थिए। तर, प्रतियोगिता सुरु हुनुअघि एक्कासि उनको सपनामा तुषारपात भयो। उनले प्रतिस्पर्धा गर्ने भनेको स्पर्धालाई अन्तिम समयमा आयोजकले ११औं सागमा समावेश नै गरेन। त्यसैले उनले त्यो साग खेल्ने अवसर नै पाएनन्।
१२औं सागमा आफ्नो सपना साकार पार्ने योजना बोकेर उनी निरन्तर तयारीमा लागिरहे। तर, सन् २०१६ मा भारतमा सम्पन्न बाह्रौं सागमा पनि कराते खेललाई समावेश गरिएन।
तर, उनले घरेलु समर्थकको बीचमा स्वर्ण जित्ने अवसर पाए। आफूले १० वर्षअघि देखेको सपना मण्डेले घरेलु मैदानमा पूरा गरे।
‘मेरो सपना साकार भइसकेको छ। देशमै स्वर्ण जित्नु त्यो जीवनको सबैभन्दा सुखद् क्षण हो। अब नयाँ खेलाडीलाई आफ्नो अनुभव बाँड्ने छु,’ उनले भने।
उनले खेल छाडेपनि तत्कालै सन्यास भने नलिने बताएका छन्। ‘नयाँलाई मौका दिनको लागि बाटो छाड्देको हुँ। तर, सन्यास लिने भनेर घोषणा गरिसकेको छैन,’ मण्डेले भने।
महसुस एकल काता च्याम्पियन
नेपाल पुलिस क्लबका महसुस मोक्तानले प्रथम कृष्णप्रसाद भट्टराई स्मृति राष्ट्रिय कराते प्रतियोगिताको एकल कातामा स्वर्ण पदक जितेका छन्।
महसुस दुई वर्ष अघि स्वदेशमा भएको १३औं सागका टिम काताका स्वर्ण पदक विजेता हुन्। फाइनलमा महसुसले २४.८ अंक जोडे।
एपीएफ क्लबका स्वर्णिम महर्जनले रजत पदक जिते। स्वर्णिमले २३।४ अंक जोडेका थिए। त्रिभुवन आर्मी क्लबका प्रविण मानन्धर र प्रदेश १ का रोहित राईले कास्य पदक जिते। प्रविण पनि १३औं सागका टिम काताका स्वर्ण पदक विजेता हुन्।
नेपाल लोकतान्त्रिक खेलकुद संघ र ललिलपुर जिल्ला प्रमुख डोजोको संयुक्त आयोजनामा भएको प्रतियोगितालाई राष्ट्रिय खेलकुद परिषद् (राखेप) र नेपाल कराते महासंघले १९औं एसियाली खेलकुदको प्रारम्भिक छनोटको मान्यता दिएको छ।
तीन दिनसम्म चल्ने प्रतियोगितामा ७ प्रदेश, ३ विभाग ९सेना, प्रहरी र एपिएफ० का २ सय १० खेलाडीको सहभागिता रहेको छ।
प्रतियोगितामा महिलातर्फ ८ र पुरुषतर्फ ९ इभेन्ट्समा २१ स्वर्ण, २१ रजत र ४२ कास्य पदकका लागि प्रतिस्पर्धा हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
