काठमाडौं- विश्वभरका अर्बपतिहरुको सूची सार्वजनिक भएको छ। विश्वका धनीहरुको सूची सार्वजनिक गर्दै आएको फोर्ब्सले यस वर्षका अर्बपतिहरुको सूची सार्वजनिक गरेको छ। जसमा नेपाली उद्योगी पनि परेका छन्।
नेपाली कांग्रेसका केन्द्रीय सदस्य एवं प्रतिनिधि सभा सदस्यसमेत रहेका उद्योगी विनोद चौधरी डलर अर्बपतिको सूचीमा अटाएका हुन्।
त्यतिमात्र होइन भारतबाहेकको दक्षिण एसियाली देशबाट अर्बपतिको सूचीमा अटाउने उनी एक्ला हुन्।
भारतबाहेक दक्षिण एसियाली देशहरु पाकिस्तान, भुटान, श्रीलंका, बंगलादेश, माल्दिभ्स र अफगानिस्तानका कुनै पनि उद्योगी/ व्यवसायी अर्बपतिको सूचीमा आटाएका छैनन्। चौधरी २०१३ देखि लगातार सूचीमा परिरहेका छन्।
यसपटक उनी अर्बपतिहरुको सूचीको १९२९ नम्बरमा परेका छन्। फोर्ब्सका अनुसार उनको सम्पत्ति पनि बढेको छ। गत वर्ष १.४ अर्ब रहेको चौधरीको सम्पत्ति यसवर्ष बढेर १.५ अर्ब डलर पुगेको फोर्ब्सले जनाएको छ।
फोर्ब्सका अनुसार सन् २०१९ मा चौधरीको सम्पत्ति घटेको थियो। २०२०मा केही सुधार आएको उनको कमाइमा यस वर्ष वृद्धि आएको छ।
महामारी र सुस्त बजारले यस वर्ष विश्वका अर्बपतिहरुलाई प्रभावित गरेको फोर्ब्सले जनाएको छ। गत वर्षको तुलनामा यस वर्ष अर्बपतिहरुको संख्यामा कमी आएको भए पनि अर्बपतिहरुको सम्पत्ति भने वृद्धि भएको पाइएको छ।
विश्वका २ हजार ६६८ अर्बपतिहरुको सूची जारी गरेको फोर्ब्सले गत वर्षको तुलनामा ८७ जना कम भएको जनाएको छ। अर्बपतिहरुको सूचीमा सबैभन्दा गिरावट रुसमा देखिएको छ।
गत वर्षको तुलनामा रुसमा ३४ अर्बपति कम भएका हुन्। १ हजार भन्दा धेरै अर्बपतिहरु गत वर्षको भन्दा धनी भएका छन्। २३६ जना नयाँ अर्बपतिहरुसमेत थपिएका छन् जसमा बारबाडोस, बुल्गारिया, एस्टोनिया र उरुग्वेबाट पहिलो पटक अर्बपति सूचीमा अटाएका हुन्।
अमेरिका अहिले पनि विश्वको सबैभन्दा धनी हो किनकी कूल ४. ७ ट्रिलियन मूल्यका ७३५ अर्बपति छन्। जसमा एलन मस्क पनि रहेका छन् जो पहिलोपटक विश्वको अर्बपतिहरुको सूचीमा एक नम्बरमा छन्।
चीन दोस्रो नम्बरमा रहेको छ। जहाँ ६०७ जना अर्बपति रहेका छन्। भारतमा १ सय ६६ अर्बपति रहेका छन्। भारतमा सूचीको टप टेनमा दुई जना परेका छन्। भारतका गौतम अदानी र मुकेश अम्बानी क्रमश ९ औं र १० औं नम्बरमा अटाएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_dAAVqRhDaH-1773571207.jpg)
-1764146706.png)
