काठमाडौं– सशस्त्र प्रहरी बलमा बढुवासम्बन्धी विवाद देखिएको छ। तालिम नै नलिएका प्रहरी अधिकारी बढुवाको प्रक्रियामा रहेको भन्दै उनीहरुको ठाउँमा योग्यलाई बढुवा गर्नुपर्ने माग राख्दै गृह मन्त्रालयमा उजुरी समेत परेको छ।
सशस्त्र प्रहरी प्रधान कार्यालयले गत माघ २१ पहिलोपटक र फागुन १ गते दोस्रोपटक ३ तीन दिन म्याद थप गरेर साधारण समूहतर्फ इन्सपेक्टरबाट डीएसपीमा बढुवा हुनका लागि सूचना निकालेको थियो।
दोस्रो पटकको म्याद थप भएको ५ दिनमै फागुन ५ गते मन्त्रिपरिषद्को बैठकले थप ३६ जना डीएसपीको दरबन्दी स्वीकृत गरेको थियो। त्यस्तै, लेखातर्फ ३ एसपी र १० जना डीएसपीको पद थप्ने निर्णय भएको थियो।
इञ्जिनियरिङतर्फ १ जना डीआईजी र ८ जना डीएसपीको पद थप्ने निर्णय गरेको थियो। स्वास्थ्यतर्फ १ जना डीआईजी, ३ जना डीएसपी, १ जना एसएसपी, र ४ जना एसपीको पद थप भएको थियो।
मन्त्रिपरिषद्को निर्णयानुसार दरबन्दी स्वीकृत हुनेबित्तिकै उक्त दरबन्दीका लागि समेत सुटुक्क बढुवा प्रक्रिया अघि बढाइएको भन्दै सशस्त्र प्रहरीका अधिकृतहरुले गुनासो गरेका छन्।
गुनासो गर्नेहरुले बढुवा समितिदेखि गृह मन्त्रालयसम्ममा उजुरी हालेका छन्।
लेखातर्फ रिक्त रहेको १ डीएसपी पदमा पनि सिसं ४/५/६/७/८ का साथै ९ र नेपाल प्रहरीबाट स्थानान्तरण भएर आएका र लेखाका लागि लिनुपर्ने अनिवार्य तालिम समेत नलिएका गरी १७ जनाको आवेदन परेको थियो। तालिम नै नलिएका प्रहरी बढुवा प्रक्रियामा सामेल भएको भन्दै असन्तुष्टहरुले गृहमा उजुरी दर्ता गराएका छन्।
उजुरीमा माग गरिएको छ, ‘सशस्त्र प्रहरी नियमावली बमोजिम प्राविधिक बाहेक अन्य सबै समूहका सशस्त्र प्रहरी निरीक्षकहरुले गुल्मपति तथा स्टाफ अधिकृत तालिम, डीएसपीहरुले गणपति तालिम लिएपछि मात्रै बढुवाको सम्भाव्य उम्मेदवार हुन पाउने प्रावधान छ। तर, हाल लेखातर्फ मर्यादाक्रम १ देखि ८ सम्मका सशस्त्र प्रहरी निरीक्षकहरुले उक्त अनिवार्य तालिमका साथै अन्य आवश्यक सेवाकालीन तालिम समेत सम्पन्न गरी तयारी हालतमा रहेको अवस्थामा तालिम नै नगरेकालाई बढुवा प्रक्रियामा सामेल गराइएकाले छानबिन गरी बढुवा प्रक्रियाबाट हटाइयोस्।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1748936216.png)
